in beer, veritas

Nidalikyat ko’s lamisa 

Sa gibantog nga manunuwat 

Nagpanikad og pangutana 

Unsaon ba’g panday og balak? 

Kay nagkapuliki sa akong dila 

Ang mga sinultihan sa mga kaliwat.  

Sa iyang pagtuya-tuya,

He said, “Write...i

n the -- 

Cebuano      that you *hic* 

Know...” 

Dayon sa pagtagak sa iyang mata, 

Mingsunod iyang ulo 

Ug ming-slide sa lamisa,

Nalup-og, nahinanok (ma'y ra 

Wa matabyog ang botelyang 

Tuboran sa kinaadman), 

Ningsutoy ko pag-order,

Nagtuo’g lagmit dunay makutlo 

Gikan sa ikaupat nga botelya ni San Miguel 

O di kaha, masipaan og Puwang Kabayo. 

Basin pa diay makasuka ta’g something sa papel.

___________________________________________

*alang sa Pilsen ug Red Horse, kang Januar Yap (nga nahubog 

sa karaang Kahayag Cafe), ug sa tanang mambabalak nga maoy 

nakaingon nganong duna ko'y mga balak karon (bisan og way 

klaro intawon, kaluoy sa Ginoo).

 -- CHARISSE MARI S. FONACIER 

Cebu City, Philippines

tinidor

Gikan natagak ang tinidor ni Judelyn,
nakahinumdom siya sa sa giingon
sa iyang iyaan nga ulay:
Duna'y laki’ng mobisita.

Sakto. Nagpaabot pod baya siya
sa iyang ka-eyeball.

Namalihog siya ni Kanor
nga mokuha'g tinidor sa counter.
Padayon siya sa pagkaon, gilamian
gihapon sa piniritong bangus
samtang gamantinir sa nahabilin
nga kutsara.


-- CHARISSE MARI S. FONACIER
Cebu City, Philippines

latagaw

Wala maghupot og angkla
ang akong bangka
nga gidagit sa mga bawod
padu'ng sa imong pantalan.

Pasagdi kining paglutawlutaw.
Sa mga eskina sa imong lungsod
hangopa ang akong paglatagaw.

Ayaw hugta'g higot ang pisi.
Gani, ayaw pagngisi og sakay
kay ako ug akong baroto
lumalabay ug daghan pang isla
nga kaplagon pag-adto.


-- CHARISSE MARI S. FONACIER
Cebu City, Philippines

tantrum

Saba diha uy! Laparohon tika ron.
Ingon ka ako'y kinakusgan
Sa mga tawong imong nailhan.

Pultahan ra gani imong gisirad-an--
akoa man lagi'ng gihilakan.


-- CHARISSE MARI S. FONACIER
Cebu City, Philippines

bungog

Gikapoy ka na tingali'g basa
sa akong blogspot:
Katloan ka balak.
Napulo'g usa ka awit.
Liboang adhetibo
mahitungod kanimo.

Gipul-an ka na siguro.
Sobra ko ka-emo?
Lagi, di ko maimo.
Sum-ol na, no?
Puros reklamo,
Tuyok-tuyok,
libot-libot.
Mora ra ba'g duna'y maabtan.
Ambot kaha kon asa.

Gikapoy ka na tingali'g basa.
Naabot ka man lagi ngari
sa kataposang linya?

(Ha ha, katloan ug usa.)


-- CHARISSE MARI S. FONACIER
Cebu City, Philippines

ika-20 sa septembre 2007

Kalimot ko da.
Bisperas na man pud diay karon.
Kalimot ko'g handom
Sa mga baby boomers
Nga gibombahan
Og tubig ug granada
Sa mga kadalanan.

Apan unsa'y handumon,
Mura pod ko'g naa didto da.

Moundang na ko'g pamakak:
Gikapoy ko
Gikan sa trabaho.

Busa inig ka ugma
Dili na ko kakuyog
Sa pag martsa-martsa
kay ngitngit na among balay
ug masirad-an unya ko
sa VECO.

-- CHARISSE MARI S. FONACIER

Cebu City, Philippines

kilom-kilom sa skywalk

Alas singko traynta pa sa hapon:
Nanghuy-ab na ang adlaw luyo sa bukid;
Katulogon ang dalan Escario
kay lagi,
holiday.

Ang buwan nagkumbayot
sa usa ka balkonahe sa condo,
gilaay
kay lagi,
holiday.

Ang skywalk,
nga nagtanga
sa kasubo nga daw sa robot,
miguroy kanako
padung ngadto,
nagpakuyog
kay lagi,
holiday.

Ug sa sugyot sa kilom-kilom,
atbang sa kahil, ako ang morado;
miginhawa ko'g law'm;
gigakos ko
ang kangiob sa semanang milabay
sa usa ka oras nga pahuway
sulod ning kalaay
kay lagi,
holiday.


-- CHARISSE MARI S. FONACIER
Cebu City, Philippines