1.31.2011

ang pagsulti, ang pagpaminaw
















Sa usa ka dapit, matod pa ni Anne Dillard,
dunay usa ka tawo nga nagtudlo
nga pasultihon ang usa ka bato. Dinhi,
ning akong pagpakigsulti kanimo,
daw nakigsulti ako sa usa ka bungbong.
Wa ko hisayri kon kinsa ang magmalampuson:
Ang bato nga makasulti
o ang bungbong nga maminaw.


-- URIAS A. ALMAGRO
New Berlin, Wisconsin, USA

tinagsip
















Buot mosuki ang bulan sa pagpanghilabot sa adlaw
Nga bisan unta sa gamayng dan-ag man lang,
Tugotan kini sa pag-iwag sa kagabhion
Aron santaon ang bagutbot sa kabitoonan.
Gigil-asan na ang dagat sa pagpunay og kana-as.
Dili ta paaboton nga mokagiw ang mga lumod
Sa wala nay pagbalik.


-- JESSELITO V. BARING
Cebu City, Philippines

1.29.2011

pangaliyupo sa latagaw nga kaliwatan
















Pasagdi ang aso
asul nga hangin
iyawat hangpon sa mga panganod
kining diyutayng daob
nga among gihalad
atol sa mga panaw nga gitugot kanamo
sama nga kanunay sa among atubangan
adunay pultahan
tin-aw nga adlaw
nga naghulat sa kabungtoran



-- VICENTE VIVENCIO BANDILLO
Koror, Palau

tugatuga'g sayaw














(dihang na-eliminate si Michael Bolton sa "Dancing With the Stars")

ang kalibotan nihunong tuyok-atras
natuk-an si Placido Domingo impas
ang gataob dagat kalitnong nihubas
nakakitag abat si Andrea Bocelli
ang bikini sa langit gisi nabali

ang mga libudsuroyng lobo niuwang
nasud-ipan ang gitara ni Bob Dylan
ang mga kabayo galumpatbahihi
niambangol si Luciano Pavarotti
ang mga baka niinga nakaihi


-- MELQUIADITO M. ALLEGO
Palm Harbor, Florida, USA

1.28.2011

paghangop sa palahubog
















Nabuntagan na pod. Nakatilaw na sab siya
Og dukot nga dila sa iyang pinaangkan.
Hinampak, nganong niuli pa man ka?

Nanug-ab ang mga dunggan sa mga silingan,
Gapista og libak. Iyang hagok lahos sa orasyon.

Kon dili siya mobangon, kinsa pa’y modapit
Pag-usab sa kangitngit? Ikaw, nga igo ra
galad-ok sa laway sa kahinanok, pasagdi siya.

Ayaw ihikaw ang higayon nga iyang tilokon
ang mumho nga kahayag sa maayong gabii.


-- MICHAEL U. OBENIETA
Topeka, Kansas, USA

sa likod sa balay nga gabok
















sa likod sa balay nga gabok
wala mamunga ang saging nga imong gitisok

ang nanaghan hinoon mao ang mga baki
nga nagpunay og kokak sa kilid sa kanal
tupad sa bagtok nga giulod

walay bunga ang imong paningkamot
wala usa’y bulak ang akong paghikalimot



-- RIC S. BASTASA
Katipunan, Zamboanga del Norte, Philippines

1.26.2011

pag-inusara
















Wanang sa kangitngit.
Way laing nahimutang.
Ako ra. Ug sa akong atubangan
ang usa ka salamin.
Sa iyang aninag, mao ray
akong nakit-an
ang hanap kong nawong.
Ug sa akong likod,
ang baga nga kangitngit.


-- URIAS A. ALMAGRO
New Berlin, Wisconsin, USA

tulo ka haiku ni Buson
















Ang huyohoy sa kabuntagon
mihapuhap
sa balhibo sa sapiring.

Bugnaw nga kabuntagon.
Ang tingog sa kampana
mibiya sa kampana.

Sa karaang lim-aw,
natigulang ang baki
uban sa mga tagak nga dahon.


(hubad sa mga Inenglis nga hubad ni Tony Barstone)

-- GRATIAN PAUL R. TIDOR
Dipolog City, Philippines

1.25.2011

pusod
















Ang imong mga hapuhap sama sa orasyon
nga buot paminawon sa akong panit.
Ang imong mga tudlo mokudlit og bag-ong
kalikopan sa akong tibuok lawas.

Dinhi sa lawak, ang atong mga kamot sumpay
sa atong pusod, gaan nga gapisat natong duha.
Ug kining kangitngit atoa karong higala.
Dali na, ga. Balik-baliki pa ko pag-ila-ila.



-- CINDY VELASQUEZ
Cebu City, Philippines

salmo sa pagano
















Sugo Niya nga ang silingan higugmaon
nga sama sa paghigugma sa kaugalingon.

Ang krus miabot kanamo uban ang pinuti
Ug kami gihasi sa mangtas nga mga pari.

Bisan sa dihang makabsan na sa gininhawa
Kapasayloan alang sa kaaway ang hangyo Niya.

Dili maayong balita ang dala sa mga dangan
Nga misuyop sa katam-is sa among kayutaan.

Ug sila nga kuno nagamantala sa Iyang pulong
Mao kunoy nagadala sa suga nga dili mapalong.

Kangitngit ang mikuyanap sa among kalibotan
Sa dihang mikaylap na sila sa among kayutaan.

Gisangyaw nila ang kuno hingpit nga kaluwasan
Alang kanamo nga pagano ug "walay mga tinuohan".

Apan ang kaluwasan unsaon man sa pag-angkon
Nga kami himoon man diay nga ilang mga ulipon?


-- ANIJUN MUDAN-UDAN
Malaybalay, Bukidnon, Philippines

1.24.2011

tinnitus
















Ang mga gangis naninggit sulod sa imburnal. Sila
nalumos nagpungapunga nalubong sa lamoglamog
sa pagpasibaya. Ang martilyo nipilit niungot
sa paknganan. Paralitikong inutil
gatikungkong sa langob sa nitiliis nga tingog
nikuriring

Ug ang mga gangis nagpadayon pagsiyagit. Sila
nabilanggo sa huyonghuyong sa mga lagkit atuli.
Aber, paminawa silang nagtingkagol sa ataul
sa udtonggabii sa dalunggan mong
gibuog. Samtang ikaw nalipong
nasarasay.


-- MELQUIADITO M. ALLEGO
Palm Harbor, Florida, USA

paghangad
















Sama rang panganora
Ang nakita ni Ric ibabaw
Ug saylo lag diyotay sa iyang
Hubon. Inigkalarag sa yelo
Sa karbonatong Houston
Hidlawon siya sa bahihi
Sa kabayo sa alingasang Colon
Magkuray siya dili tungod
Sa katugnaw sa kabuntagon
Apan tungod, kay sa iyang
Pagsuksok sa suok,
Gikupoan man siya sa talan-awon
Sa maputing baybayon
Nga kaniadto gitila-tilaan
Sa hinigugmang kilumkilom.

Ang gapasong dragon
Dili na mohadla niya
Ang mga bangaw gipangsunog
Na sa kahidlaw sa Adlaw ug
Ang balod sa Sogod igo na lang
Sa pagpanghupaw.



-- OMAR KHALID
Medellin, Cebu, Philippines

1.22.2011

budhi
















Nagpahipi sa pahiyom sa pakigsandurot
Ang lubos itom nga dila sa panghimaraot.


-- VICENTE VIVENCIO BANDILLO
Koror, Palau

balikero
















motidlom og balik
ang mga nanglutaw'ng bato sa sapa

moiktin ang iring
nga nagpakaaron-ingnong iro

manurok og balik
sa pipila ka segundo
ang balhibo sa gihimolbolang
manok bisaya

ang gumamela dili na mamuwak
og sampaguita
dihang mamapha
ang nasukamod nga mga pulong sa dila



-- GREG F. FERNANDEZ
Muscat, Sultanate of Oman

1.21.2011

bilar alang sa albularyo
















1.
Gakurog nga ngipon, napaksit nga ngabil. Nakatilaw na ko

sa kabangis sa snow, napiang na sa dalin-as nga kaputi
tadlas sa espidno. Kalami ihangad sa anino sa American Airlines
nga gilamoy sa dag-om. Kisaw sa takig, bugwak sa ubo-ubo
gikan sa kiting. Gikitkit sa hangin ang ganganga nga kugan
sa dughan.
Mother, mother, I am sick...

2.
Kalawaton ko ikaw, O Tingtugnaw, pinaagi sa pinasugwak nga halad
sa akong kulihad. Tugbang unta akong katagbaw sa gabuswak
nga pulbora matag 4th of July bugti sa gapagaw nakong bagutbot.
Bisan gapislango, moalisngaw unta akong ginhawaan sa alimyon
sa tinustos ug lana sa lubi gikan sa kamot ni Noy Tyago.

Giuhaw ko sa iyang tuba. Tam-is ang kainit sa kamingaw.



-- MICHAEL U. OBENIETA
Topeka, Kansas, USA

pangandoy
















mas nindot unta kon
maghawiray ang mga kamot sa kaulag
ug gugma,

ang halok ug ang paghaploy
sa bilahan kuyog sa kabalaka
kon nahupong ka na ba
sa akong dila ug ginhawa
mas nindot unta kon ang kalag

ug lawas usa na
sa usa ka panghambog diha sa seremonya
sa kaminyoon

apan sa paglabay sa katuigan
sa pagpangahulog sa dahon
ug pagpiko sa atong mga tudlo ug siko
ug pagkahilis sa mga ludhanan

magbulag ra gihapon ang duha
ang kalag magpahipi lang gihapon sa dapi-dapi
dili mopakita
ang hunahuna modap-ig sa kilid sa dalunggan
magpamati lamang
samtang ang lawas makigbisog
sa iyang pagkahugno
sa pagkunot sa agtang
sa pagputi sa buhok
sa pagluyloy sa mga pagbati

karon hunahuna na lang ang nabilin
samtang ang kalag
nagpaabot sa iyang sakyanan
ang lawas
naglingkod sa kilid sa pultahan
lantaw sa hagdan
paingon sa ubos
nagsusi sa lapok


-- RIC S. BASTASA
Katipunan, Zamboanga del Norte, Philippines

1.19.2011

binilanggo
















Higala, dunay mga rehas nga nag-ulang kanato.
Mahimo’ng sa ilang mga lusat itunol ta
ang atong mga kamot ug kita maglamanohay.
Apan lain ang imo ug ang akong nahimotangan.
Higala, kaniadto sama ang atong mga damgo,
sama ang mga dalan nga atong gisubay.
Karon kini mao ang atong gisangkoan:
ikaw ug ako sama’ng binilanggo
sa tagsatagsa ta ka kalibotan.


-- URIAS A. ALMAGRO
New Berlin, Wisconsin, USA

usa ka langgam
















Usa ka langgam mibuwag sa iyang panon
Mihapit og tugpa sa bintana sa kusina
Mikapa-kapa, mibirig-birig
Nag-aghat kanako
Pag-apil sa iyang sayaw-kuratsa.
Ug sa paglupad niya, sa iyang pagbiya,
Nagbilin kinig handomanan:
Ang gilay-on mabuntog sa usa ka pagkiay.



-- TEODOSIA “Dindin” P. VILLARINO
Manama, Bahrain

1.14.2011

VII
















Pakighilawas kanimo
Kaamgid sa paglad-ok sa tubig sa dagat
Matag pakapin kong tungab
Misamot na hinoon lakad kauhaw ko
Hangtod way makatagbaw ning kaulag
Busa imnon ko ang tibuok dagat


(hinubad sa Iningles nga balak ni Kenneth Rexroth)


-- MELQUIADITO M. ALLEGO
Palm Harbor, Florida, USA

pagtultol og balik sa parian
















Diring dapita adunay kaminyoon sa mga abog sa kagahapon
ug sa mga aso sa jeep sa Labangon, Talamban ug Basak.
Ang mga estatwa ni Vicente Sotto ug mga kauban ni Lapu-lapu
sa dalan sa Mabini namukaw sa gakutoy nga gutling, nahawla
sa kahaw-ang sa langit. Nagkabus-ok ang mga camera
sa mga Koreano sa tunga-tunga sa naghagok nga udtong tutok.
Nakita nako ang gisalup-itan nga tingsi daplin sa karsada.
Gitultol nako og balik ang Parian. Nibukhad ang kagul-anan.


-- CINDY VELASQUEZ
Cebu City, Philippines

1.12.2011

wala himatikdi nga sila diay mga manulonda
















Usa ka gabii niana, human sa inyong panihapon, dihay nanuktok sa pultahan. Tulo ka lalaki ug tulo ka babaye, nga dili ninyo kaila ug morag gikan pa sa halayong dapit, nangita og kasak-an bisan usa lang kuno ka gabii. Tungod kay ang gamay ninyong balay puno na man sa mga paryente nga wala kamo masayod kanus-a pa mamauli sa probinsiya, inyong gitanyag ang luna sa likod sa balay, sementado apan wala pay atop, ang dugay na ninyong giplanohan nga ekstensyon nga wala pa gihapon masugdi. Tin-aw ang langit, walay dag-om, mao nga mapasalamaton silang midawat sa pinobre ninyong tanyag. Giagda ninyo silag panihapon apan human na kuno sila, mao nga gikuyogan na lang nimo sila sa hawan sa likod. Himanhiman gibukhad nila ang gibitbit nilang mga banig ug nanghigda sila ubos sa mga bituon. Sa dayon na nimong katulog nadungog nimo ang ilang kulokabildo, ang ilang mga hagawhaw ug katawa, ug matag karon ug unya molutaw ang pinugngang mga agik-ik nga daw mga nota nga kinutlo gikan sa usa ka hawot nga sonata. Apan igong milapas ang tungang gabii nakadungog kag kusog nga tuktok sa pultahan sa likod. Ang inyong mga bisita nanawag, mireklamo nga dili sila komportable sa gawas. Mga musikero kami, nila pa nga naglumbay pagsulod sa balay. Kon mapirmahan na ang among kontrata mobayad lagi kami. Kinahanglan nga makapahuway kami og tarong kay anaa kamiy awdisyon ugma. Pagamita kami bisan usa lang sa inyong kwarto, usa lang. Apan usa ray among kwarto, nimo pa, gani kami sa akong asawa ania ra mangatulog sa sala, tan-awa kon pila kami kabuok nga naghuot diri. Ang akong mga ugangan ania karon miduaw kanamo ug sila ang nag-okupar sa kwarto. Paminaw lang kanamo nga manganta ug makasabot ra ka, ug mosalig ka kanamo, nila pa. Dayon ang edaran nga lider-lider nagsugod pag-angay sa iyang gitara nga sa imong tan-aw naglutaw sa hangin sama sa pan nga bahaw. Ang batan-ong babaye, hayan ang ilang bokalista, mitisar ug nangigham. Sa iyang pagpahiyom milutaw ang iyang kandiis ug makita ang iyang ngipon nga giatutong. Hunong, misinggit ka, sa dihang nagsugod na sila paglinya ug nagdungan paghanggab og hangin. Mitutok sila kanimo nga daw dili makatuo sa ilang nabati, dayon nagtinan-away. Nakita nimo ang anino sa ilang pahiyom nga natagak gikan sa ilang mga ngabil sama sa singsing nga sa paghuyop sa hangin nahislot gikan sa mga tudlo sa kamot sa kalaberang gibitay. Wala silay tingog-tingog nga nanghipos sa gagmay nilang dala, nagpanglingo. Masudyaong tinan-awan nga ilang gidalit kanimo sa ilang pagtalikod.


-- VICENTE VIVENCIO BANDILLO
Koror, Palau

tando dili
















Nakatilaw na kag tagam?
Naligsan na kag mirisi?
Natikasan sa puhon?
Natunok sa intawon?

Nahagkan na kas agay?
Napukasan na kas hala?
Nahilos sa abi?
Nadutlan sa sige?


-- ADONIS G. DURADO
Cebu City, Philippines

1.09.2011

pagpamalak, pagpamakak

"The poet does not tell the truth, he lives it;
and living it, he becomes a liar.” -- Rene Char











O ang mga bakak
nga akong gisulat
sa akong pagpamalak.
Mga gagmay ug mga dagko’ng bakak.
Way kalainan.
Sa hanap nga mga panid
sa lapokong mga utlanan
hisabtan mo ako
pinaagi sa akong mga bakak.
Di mo ako hisabtan pinaagi sa matuod.


-- URIAS A. ALMAGRO

New Berlin, Wisconsin, USA

batong kaluha

SUGILANON
Kahulogan karon sa piyesta dinhi, apan wala koy ganang mosaulog. Ikaduha na rong gabii nga dili ko makatulog dayon tungod sa panghitabo sa amo, labi na sa Batong Kaluha. Ania, isugid ko.

Sa pagbalikbalik nako sa among lungsod sa Adlawan wala kaayo ko makahapit sa may dagat kay kini laging magsigeg tumod og utanon sa Carbon, wala nay panahon nga magtutampisaw didto. Dili sama sa kaniadtong bata-bata pa ming tulo ka magsuon ug buhi pa silang Tatay ug Nanay, kinsa maoy nag-atiman sa among gamayng negosyo, kay magsige mig salum-salom sa Look dili kay makausa o makaduha ra sa usa ka semana apan hapit gyud matag adlaw. Kay lagi duol man ang among gipuy-an sa baybayon.

Mas kanunay man gud mi didtong magtiayon sa siyudad kay sa amo sa probinsiya sulod sa pipila ka tuig samtang nagdako ang mga bata sa kilid ni Annie, akong manghod nga nabiyudag sayo ug nga walay kaugalingong anak. Siya na lay akong gibinlan sa mga bata kay si Nadia, ang among kamanghoran, mibalhin mag puyo sa Iligan kuyog sa iyang nabana...
([PADAYON pagbasa pinaagi sa pagpindot sa ngan sa magsusulat sa ubos.)


-- ERLINDA K. ALBURO
Cebu City, Philippines

1.07.2011

lamat sa las vegas
















Wala’y luna ang luha dinhi sa karaang disyerto. Taliwala sa lunop
sa mga turista, bisan ang makililimos duol sa Caesar’s Palace—
gakwentas og kwadradong karton nga gisulatan sa iyang pakiluoy
og hinabang aron kuno siya makauli didto sa ilaha sa Wyoming—
dili minghoy. Hapit gisud-ipan dihang gisitsitan niya ang dalaga
nga lupig pa’y gidaman, nasaag gikan sa banyo. “Hot,” sangpit pa
sa karaho, “What’s your name, miss?” Wala siya tagda samtang
nakay-ag ang kilumkilom sa kundat sa mga dagitab nga labaw pa
og pagawal sa bangaw. Nibalit-ad gikan sa linaw sa tugkaran
sa Bellagio, nakigbayle ang tubig, nibusikad duyog sa gahaguros
nga huni. Sa atbang, layo apan tugbang sa gamingaw nga tingog
ni Piaf ang layaw nga kahayag sa Eiffel Tower. Ay, ayaw pamilok.
Basin dagiton ka sa kidlap sa camera samtang makigdumog anang
gakampat nga bawod sa pasundayag: Galutaw nga gondola sa sapa-
sapa sa Venetian. Langit-langit sa Palazzo. Tuliyok sa tsubibo
luyo sa New York-New York gikan sa gingharian sa Excalibur.
Piramidi sa Luxor. Giduslitan ang huyohoy gawas sa lasang diha
sa lobby sa The Mirage Hotel Casino. Gahuwat sa kainit gikan
sa imong bulsa ang mga tigsundog nilang Super Mario Brothers,
Spider-Man, Michael Jackson, ug Elvis Presley. Wala’y nilingi ni
Marilyn Monroe, wala’y maskara batok sa kunot, kagot sa ngipon,
ug pahiyom. Wala’y luna ang luha dinhi sa karaang disyerto.


-- MICHAEL U. OBENIETA
Topeka, Kansas, USA

pares
















Kon wala’y kahilom,
di nato mabatian
ang tingog sa huyohoy
nga mihalok sa gatabyog nga dahon,
ang gihunghong sa buyog
ngadto sa gapaduding nga bulak,
ang tiyabaw sa nagmanya nga pispis
nga gapaabot sulod sa salag,
ug ang kapa-kapa sa pako
sa nabalaka nga maya.

Kon wala’y gabii,
di nato masayran
nga duna diay gisipitan
nga dilaab ang mga aninipot,
walay manag-uyab
nga magdunga’g hangad
sa gayunyon nga mga bituon,
walay momata’g sayo
duyog sa tuktogaok

wala’y magtambay sa baybay
ug mosaksi sa kisaw sa bidlisiw



-- GRATIAN PAUL R. TIDOR
Dipolog City, Philippines

1.06.2011

hilom ang balay ug linaw ang kalibotan
















Hilom ang balay ug linaw ang kalibotan.
Ang magbabasa nahimong libro; ug beranong gabii

Sama sa kahimatngong panimuot lalang sa libro.
Hilom ang balay ug linaw ang kalibotan.

Ang mga pulong gilitok daw morag walay libro,
Way labot ang magbabasang misandig ibabaw sa pahina,

Gustong mosandig, gustong mas labaw sa tanan
Ang eskolar kansang libro tinuod, kansang

Beranong gabii pareho sa kahingpitan sa hunahuna.
Hilom ang balay tungod kay kinahanglang maingon niini.

Ang kahilom kabahin sa kahulogan, kabahin sa kaisipan:
Ang agianan sa pagkab-ot sa kahingpitan sa pahina.

Ug ang kalibotan malinawon. Ang matuod sa kalmang kalibotan,
Diin walay laing kahulogan, sa iyang kaugalingon

Malinawon, iyaha mismo berano ug kagabhion, iyaha mismo
Ang magbabasa ulahing gasandig ug gabasa didto.



(hubad sa Iningles nga balak ni Wallace Stevens)

-- MELQUIADITO M. ALLEGO
Palm Harbor, Florida, USA

dihang ga-brownout usa ka gabii















Nabadbad ang ginaid nga balikas 
Gikan sa alingagngag sa akong amahan.
Nagpamati lang sab sa mga mosunod nga esena 
Niadtong gisundan namong' gubat nga salida. 
Ang kaguliyang nga namugna 
Tungod sa kalit nga paghikyad sa kangitngit 
Nakig-indig sa nagkayuring nga suliyaw sa mga gangis. 
Migawas ko ngadto sa among nataran 
Ug midagkot og sigarilyo. 
Sa akong pagbulhot-bulhot sa aso, 
Maoy akong nayanghagan 
Ang naingo’g ayagan nga bayhon sa buwan 
Nga mao pa'y pagsubang didto sa silangan, 
Ang wa'y sukod nga wanang 
Diin nagpunsisok ang mapiratong mga bitoon, 
Ug ang mga aninipot nga naghadla- 
Hadla sa may mansinitasan sa akong tungod. 
Didto sa balay sa akong apohan, 
Atbang sa amoa, 
Ang kundiman sa radyo
 Miharana sa nahilom nga kagabhion. 


-- IOANNES P. ARONG 
Lapu-Lapu, Cebu, Philippines

1.04.2011

ang singgit ug ang hunghong













Bisa’g unsa kakusog ang imong pagsinggit,
way makadungog kanimo kon tua ka
sa usa ka suok. Padungga ako og dalugdog
sa tumoy sa imong hunghong,
ug bation ko ang pag-uyog sa mga sanga
sa unos nga imong ibilin.

Ngitngit didto sa kinatung-an
sa nagsilang nga bulan. Ingon nga ngitngit
didto sa sulod sa suok. Ang pagpamalak
usa ka pultahan aron ka makaguwa
ngadto sa bulanong gabii. Kuhaa
sa iyang sad-onganan ang bughaw’ng gitara,
ug dinuyugan sa iyang pagkuskos, ihunghong,
ayaw’g isinggit, ang bag-o mong harana.


(alang sa mga magbabalak sa pinulongang Binisaya)

-- URIAS A. ALMAGRO
New Berlin, Wisconsin, USA

kandila











Sumala sa mugna ni Van Eyck
nga The Arnolfini Marriage, ang nag-inusara
ug nagsigang kandila mao daw si Bathala, ingon si titser.
Kining kandila duol sa kama sa managtiayon,
naghubit og ikatulong kinabuhi tali nilang duha.

Apan sa adlawng natawhan ni Dodong Mario
ang iwag sa kandila sa iyang cake iyang gipalong.
Ug sa pagkamatay ni Lolo Rosalio, ang mga kandilang
nikuyanap sa sementeryo di daw angay palongon
bisan pa hapit na naupos, ingon si Lola Misyang
.


-- CINDY VELASQUEZ
Cebu City, Philippines

1.02.2011

gilay-on sa luwa
















Wala’y langaw sa McDonalds. Dili motugdon
ang tig-ik sa akong mga anak, gapanilap
sa pakapin nga mga duwaan. Hastang layoa’g
labyog sa kahinam. Asa kaha

nitugpa ang banog nga nidagit sa himungaan sa akong maninong?
Sa tangkongan atbang sa iyang payag, kanunay ko gatabanog diin
ang huyohoy gaalimyon usahay sa minantikaang tinabal
ni Mama
nga kinaham kaayo ni Papa. Gisaw-an namong bahaw namuwa,
namuwak sa gipikas-pikas nga mga kamatis nga sama kahamis

sa gakiat nga Iningles sa akong mga liwat.
Wala sila galaway sa gilangaw nakong dila.


-- MICHAEL U. OBENIETA
Topeka, Kansas, USA

sa kamingaw
















alangan nga akong tikangon ang dagat karon dayon
nga mao pa may pagtugpa ug pagpamapha
sa mga bunbon sa akong tiil

ang akong kamingaw nimo
itaghoy ko lang usa sa hangin

madungog mo ra na unya
inig abli nimo sa bintana



-- GREG A. FERNANDEZ
Muscat, Sultanate of Oman

1.01.2011

milagro moratorium
















I. 33 + 1 minero, chile

69 ka adlawgabii ilalom sa gilansang yuta
sila ug ang Di-makitang nagpas-an kanilang mutya

II. Ulahilangan, signos

unya nadelatar ang pagkagun-ob sa hilang mina
inanay nihunong bunbonlapok Iyang gitungina


-- MELQUIADITO M. ALLEGO
Palm Harbor, Florida, USA

kutay sa kinabuhi
















ang gibug-aton
sa iyang gibati
gitimbang karon
sa gabitayng pisi.



-- GRATIAN PAUL R. TIDOR
Dipolog City, Philippines

Daghang salamat sa mga maniniyot nga gapaambit sa ilang mga hulagway sa Google ug Flickr.