5.31.2013

huni nga hinawayon bisan uyon sa teoriya nga "pathetic fallacy"


kalit mibundak ang uwan
sa dihang mihilak ang bungi
nga haranista kay giablihan
ang bintana diin nanghiwi
sa kangitngit lahos sa tubaan 
ang dalaga nga dili molingi 
kay igo ra siyang gisitsitan


-- MICHAEL U. OBENIETA 
Topeka, Kansas, USA

dahon sa gabi


Nahidlaw ang tanan sa mga hugot 
nga kalipay ug puwang kangaya sa gugma, 
sigon sa usa ka balak ni Jane Kenyon.

Naunsa man ang dahon sa gabi, kanunay 
motugot nga modalin-as ang lusok 
sa uwan? Mao lagi, dili gyod makuptan.


-- MA. CARMIE FLOR ORTEGO 
Talalora, Samar, Philippines

5.29.2013

uniberso


adunay gilay-on
nga di matultolan sa mapa

nahisama kini sa uniberso 
nga sigon sa pisika di masukod
ug way hunong sa pagtubo 

kini ang kahilom
tali kanato


-- GRATIAN PAUL R. TIDOR
Dipolog City, Philippines

lobo


Kanunay ang takdol nga buwan
gagilaw sa mga suok-suok sa daman
nga sa imong dagway gidan-agan.  

Kanunay kining gatinguhang moduaw
balik sa imong kalibotan diin molutaw
ang akong hunahunang latagaw

ngadto sa dulom, diin ako nagaksan
sa kahilom. Apan karon, gikan
sa halayong panaw nga gisugdan

sa lasang, nangita na pod ko'g kalinaw
taliwala sa gauwang nga kamingaw--
danguynoy sa kagabhion nakisaw.


-- TON DAPOSALA
Cagayan de Oro City, Philippines 

5.27.2013

kagang sulod sa pas-ong


kaniadto didto sa paratab-ang suba subay sa katunggan
sa kanipaan sa kawayanan si Omok Biyas ug Toyas nagpahiluna
og mga pas-ong sa lapokong 1955 kilumkilom sa sayong 
igham ug takin sa banagbanag gisuhid ang mga kuha: 
binilanggo sulod sa atoblawak sala sulod sa tanlag sakyanan
sulod sa garahe karon sulod sa kagahapon ugma sulod sa gigikanan

kining nalaag balak sulod ning halwang handurawan
kining nibalik kagang sulod sa pas-ong sa paghandom...


-- MELQUIADITO M. ALLEGO
Palm Harbor, Florida, USA   

takoban


Kanunay kitang nagtakoban.
Gilangkat kuno nato ang nagbaat nga anino
sa kaugalingon tang lawas apan motingkag 
gihapon ang upat ka dunggan sa kahayag 
diha sa kangitngit diin madungog 
niini ang daghong sa gihunghong natong urom.
Tag-as usab ang kuyamoy sa kangitngit 
nga mobulikat sa nagsuhat nga uwat sa dila,
nga molimong sa mata sa nadugtang lapalapa,
nga motipig sa namuliskad natong samad,
nga motabon sa pulong sa paglaom 
apan di ikalimod nga padayon natong gitakod 
sa tikod ang wa'y puas nga naggukod 
sa atong likod nga mga anino.


-- NOEL P. TUAZON
Dauis, Bohol, Philippines

5.25.2013

kon matulog ko


Ang palabad sa bentilador
inanayng' nahimong ferris wheel.
Gilumos ko sa lumay sa kama,
ug ang kapuol gipulihan sa duka--
ako ug ang akong gininhawa
nahisum-ok sa usa ka  planeta 
ug nalanay ang kasikas sa gawas
nunot sa bag-o kong kalibotan--
ang aso gadayan-dayan nga kurtina
ang habol nahimong balod sa panganod.

Sa akong pagpiyong mosanag ang asul 
nga kalimutaw sa iring; 
ablihan ang mga siradong bintana, 
mosaka sa hagdanan nga walay ang-ang,
mag-iniktin babaw sa atop,
magbisekleta padulong sa buwan
dayon ako syang giingnan nga siya 
ang dagway sa limbong
ug ako ang gamhanang
may tiil ang akong duha ka mata;
may pako ang akong mga kamot.

Apan ang buwan mibuka sa iyang baba
dayon mitutho ug lawa-lawa,
ug gipukotan niya ang akong dunggan
tiil, ug kasingkasing--
gilumsan sa lim-aw sa alimungaw,
napadpad ug nagtukaw sa langob 
sa akong mga hagok samtang  
nangablit ang kabugnaw sa akong balahibo,
nasaaag sa damgo sulod sa usa ka damgo.


-- GENALYN G. OMAPAS
Cebu City, Philippines

mga bidlisiw sa awit


Kanunay ang adlaw ug ang sayaw
magdungan pagtungha. Dili nimo 
bation ang katugnaw. Pananglit, 
wala nimo namatikdi ang sayaw,
ang sidlakan daw dakong langgam
sa pugaran nga mga bungtod,
gapamukaw pinaagi sa awit.
Pananglit, wala nimo lingia 
ang kabuntagon, ang sayaw daw 
gamayng adlaw sa sangahon
nga panganod, gapanaghoy
og gagmayng bidlisiw sa kainit.
Nakamatikod ko kay kaniadto,
sayo kong mobangon, magpaabot
sa imong pahibalo nga mao'y
motagbaw sa akong kamingaw.
Kagahapon, pagmata ko, mitungha
ang adlaw sa wa pa ang sayaw.
Ug karon, mitaghoy ang sayaw
bisa'g wa pa ang adlaw.


-- PAUL RANDY P. GUMANAO
Kidapawan City, North Cotabato, Philippines

5.23.2013

mga tipak: mga mubo’ng balak

Duha Ka Sulab 

Kagahapon
ug kaugmaon. Duha 
ka sulab sa punyal sa panahon.
Pulos mahimong mosamad kanimo.
Sa samang kahait,
sa samang kahapdos.


Unsa Man Ang Gibug-aton Sa Usa Ka Lusok Nga Luha?
    
Igo
nga mahimong usa ka tingga
nga motundag sa taga nga dawihan 
sa imong kasingkasing.

      
-- URIAS A. ALMAGRO
New Berlin, Wisconsin, USA

ang usa ka gabii mubo ra tingali alang sa usa ka gugma


Kay pila ka oras ra ta nga nagtupad og lingkod sa baybayon,
ambot pila pod kaha ang katam-is nga atong nasulti. Pila 
ka libong bituon kaha atong naaninaw samtang kita 
nagtinutokay sa kangitngit? Pila ka kilometro na kaha 
ang akong maabot inig katapos ining balaka?

Isla sa Bantayan ug siyudad sa Sugbo: 136 kilometros.

Bisan nipalayo nako niadtong baybayon, pasagdii lang
kining akong panumdoman nga kanunay lang gatultol, 
gapaduol adtong usa ka gabii nga gapitik pa ang sugilanon.  


-- JESSREL E. GILBUENA
Bantayan, Cebu, Philippines

5.21.2013

haw haw de karabaw de corazon: duha ka sugilanon subay sa usa ka linya sa kanta nga kinutlo sa salida nga "crazy heart"


I could write a book about what I don't know...

1
Diha'y magtutudlo nga maayo kaayong moyawit kabahin sa gugma. Gabudlot iyang ngabil, mao ra'g giumol takdo sa kigol sa pilosopo nga nipilit sa iyang gilingkoran. Nagnganga sa kauhaw ang mga kuto ni Ma'am, gakalkag ang buhok, samtang gabag-id sa mga kalabera nga sanga ang saag nga hangin sa ting-init. Asa na kaha iyang mga tinun-an nga maayo kaayong mamayabas kaniadto? Hagbay ra nasunog ang tunghaan ubos sa naopaw nga kabungtoran. 

2
Diha'y inahan nga naliki ang antyohos sa pagbinasa kon unsa'y labing igmat nga lakang aron dili masakpan iyang laraw nga hiloan iyang bana. Nahinanok ilang amang nga anak. Ambot kon unsa'y iyang gidamgo. Gakanta ang mga lamok. Diha'y gakagot nga kahiamgo. Ug diha'y dughan nga labihan kabugok. Dili kasabot. Nga dili masukod ang kagamay sa kalipay. Nga wala'y makatudlo sa nagkadaiyang matang ug maayong pamaagi sa pagkabuang.  


-- MICHAEL U. OBENIETA 
Topeka, Kansas, USA

alindasay


tungang gabii
ug ang akong madunggan
mao ra ang kakusog
sa gatuyok-tuyok
nga electric fan

gisulat ko ang lilo
sa kalilong ug ako intawon
wala kabalo kon asa
ang sinugdanan 
ug ang kataposan

tungang gabii
ug padayon gihapon 
nga gisukmatan ko
sa gakagot nga
katulugon


-- RIC S. BASTASA
Katipunan, Zamboanga del Norte, Philippines

5.19.2013

sa makausa pa


     1
Sa makausa pa, atong litokon ang mga ngalan nga molugway
sa  hulagway. Dalag ang buwan sa banagbanag. 
Sa halayo, nahibilin ang uwang sa mga sigbin nga ianod dayon
sa lay-at nga aginod sa panganod ug panghupaw.
Midaaw usab ang atong panagway sa gamayng' daob.
Ang silaab nagpangawhat sa hanap ug tagolilong nga pagbati.
Apan dayag nga mga aninipot ang aligatong nanggataw
sa kalimutaw sama sa liboan ka mga ngalan: di moturok
sa litok, di mahinog sa tingog, di malawngon sa pulong
kon magpilit ang atong panit ug maglambod ang atong tuhod.
  2
Sa makausa pa, atong higopon sa kape ang katam-is 
sa mga hulagway nga padayong gikutaw sa atong pagtukaw.
Awom sa lapalapa ang mapang mitultol kanato dinhing dapita.
Wa damhang napadpad kita dinhi bisan unsa pa ka layo 
o bisag unsa pa ka duol ang gibaktas natong pangagpas
o bisan pa'g gitagoan sa alindanaw ang giagpas natong pagduhiraw.  
Kalit lang mitipas ang giguyod tang' lakang sa mga simangan: 
ang laktoranan sa tanan tang damgo, alindasay ug kalipay.
Himas-an man dayon ang duha ta ka mga tiil aron maalim 
sa tubig ang namuliskad nga samad apan magbahad lang
gihapon sa tikod ang kinow sa matag paw-ot nato'g paslot.

  3
Sa makausa pa, isugid nato sa mangambak nga mga buwakaw
ang sugilanong nangasangit lamang sa alingagngag ug kangitngit.
Wa'y dagway ang kamingaw nga ihimugso sa yamog
tungod kay niining maong dapit sa pagsaulog kun, di ba kaha, 
pag-ikyas, duha lamang kita ka mga anino nga padayong 
nagsayaw-sayaw sa wa'y puas nga lakdop sa kalayo hangtod 
maugdaw ang atong pagtakoban, hangtod maagiw ang kahidlaw.


-- NOEL P. TUAZON
Dauis, Bohol, Philippines

sa mga nangawagtang dihang na-reformat ang akong laptop


Bisan diay ang hunahuna
kun ang kasingkasing ba kaha
masudlan og bayrus 
dihang mawagtang
ang mga bidyopiktyurdokumento,
ug mahanaw sab ang ilang ilhanan
ug molangkob isip usa ka hanap
nga paghanduraw, kalit 
molaguto sa dughan apan 
igo rang mohadla, dili gyod 
mahinumdoman kon 
unsa ba kaha...


-- MA. CARMIE FLOR ORTEGO 
Talalora, Samar, Philippines

5.17.2013

montanang kalangitan


mga kalabera sa mga Sioux mga santilmo sa mga Arapaho
gasaka-kanaog sa mga nag-undak-undak ang-ang
sa balhibong kasaysayan sa mga casino sa Helena
dalikyatahod ngadto sa musoleyo ni Heneral George Custer
gisungay gitakmag sa mga buffalo ang mga bahandi
sa bisong bukid gipaslag ang hilabtanon nisulong
nagsiyagit gilukdong mga panganod

hala ka nganong gipana mo ang asulapad nga langit?


-- MELQUIADITO M. ALLEGO
Palm Harbor, Florida, USA   

kon wa'y kagay ang tanyag nga tagay


Kon ako pa unta si Li Po
Magtagay ta sa akong bino.

Kaayo unta kon kita dungan  
Nga mosawom sa kinapusoran

Sa lawod niining garay
Ug dinhi maglambahanay

Diin ang gibathala mao ra
Sa wala'y pagduha-duha-- 

Usa ka basong balak.


-- GINA MANTUA-PANES
Cebu City, Philippines

5.15.2013

nakaila ko nimo mao nga mangutana ko sa imong ngalan


Nakaila ko nimo mao nga mangutana ko sa imong ngalan.
Dugay ko na ikawng gihulat, ikaw nga akong kuyog bisan asa. 
Una ta kining panagkita apan sinati ko ang imong bayhon
Karong adlawa nga mao ang adlaw sa wala pa ang kinaunhan. 

Dugay ko na ikawng gihulat, ikaw nga akong kuyog bisan asa, 
Ikawng naghulat sa kangitngit kon abton na ako sa katulogon
Karong adlawa nga mao ang adlaw sa wala pa ang kinaunhan, 
Adlawng walay kalainan sa unang adlaw human sa kataposan.

Ikawng naghulat sa kangitngit kon abton na ako sa katulogon,
Kuyogi ko, adto ta sa adlawng molusad sa atong panagsama,
Adlawng walay kalainan sa unang adlaw human sa kataposan
Diin ang nanglabayng katuigan ihan-ay tupad sa umaabot.

Kuyogi ko, adto ta sa adlawng molusad sa atong panagsama.
Dili sapayan ang takna: kaadlawon, udtong tutok o kilumkilom
Diin ang nanglabayng katuigan ihan-ay tupad sa umaabot
Mahinumdoman ko dinhi ang wala ko kalimti bisan kanus-a.

Dili sapayan ang takna: kaadlawon, udtong tutok o kilumkilom.
Una ta kining panagkita apan sinati ko ang imong bayhon.
Mahinumdoman ko dinhi ang wala ko kalimti bisan kanus-a:
Nakaila ko nimo mao nga mangutana ko sa imong ngalan


-- VICENTE VIVENCIO BANDILLO
Manila, Philippines

talan-awon sa tungang-gabii


Ganiha ra baya nako gitutokan
ang duha ka tiki nga nagdakpanay.

Ug di sama nako ilang gipasagdan,
wa panumbalinga ang mga kasway 

sa orasan diha sa ilang kiliran--
wala'y hunong nga nagginukoray. 


-- GRATIAN PAUL R. TIDOR
Dipolog City, Philippines

5.13.2013

kisaw ibabaw sa kamingaw: pasumbingay alang sa biniyaan


Wiris-wirison sa wati,
ug tiwason pagpapas 
ang kamatayon. Padayon iyang pagpakli 
sa kangitngit, gapailawom diha sa dili madugta 

nga sugid sa kalimot sukad pa
nigamot ang pagbangotan. Wa'y hunong 
iyang hilom nga duyog sa gasalingsing 
nga mga gasa batok sa kagutom-- 
mga lagutmon ug lawod 
sa kalunhaw--nga gisaw-an 
sa yamog, gipuga gikan sa nagtibugol 
nga gabon. Dinhi ubos sa landong, 

basaha: uwat sa panit 
sa punoan. Duha ka 
balikis nga kasingkasing. Ayaw pamilok.
Naa'y mogimok ilawom sa imong pag-inusara.


 -- MICHAEL U. OBENIETA 
Topeka, Kansas, USA

maple tree: tingpamulak

   d
   a
   hel
ikop
t(ng)er
    l
    a
   ya


-- DENNIS S. SARMIENTO
Maryland, USA 

5.11.2013

bakya


Kon duna pa'y nahibilin 
nga maghihimo og bakya, 
buot unta ako nga magpahimo
og usa ka paresan.  Retro,
kinaraan, hinimo sa wa'y-pintal 
nga tabla ug goma
sa daang ligid sa trak.  
Pagpahinumdom kanako 
sa kanhing mga dalan
nga akong ning-agian.
Sa mga adlaw'ng ulanon.
Sa mga gagmay'ng pagtampisaw
niadtong nagdanaw'ng mga agianan
ug pagkahumod sa akong mga tiil.
Sa hagtok sa akong mga lakang
sa mga batoong kadalanan.
Buot kong mosul-ob pag-usab
og bakya, pagpaila
nga ako wa mahikalimot
sa banwa nga akong gigikanan.
Sa mga daang kadalanan,
sa mga adlaw sa ting-ulan,
sa kanhi kong mga sagabay
nga kaniadto parehas kaming tanan
nga nanagbakya.


(alang sa kanhing mga "bakya crowd")

-- URIAS A. ALMAGRO
New Berlin, Wisconsin, USA  

diwata sa kaalam


Karong duol na ang akong kaudtohon,
akong nasabtan ang imong tugon,
nga pangitaon ko sa kahilom,
ang hulagway sa imong katahom.

Tingali sa pag-abot sa kagabhion,
ako mahigmata ug mahikat-on,
nga ang dugay na nakong gipangita
kanako dugay ra sab nga nangita.

Ug tingali sa pag-abot sa kaadlawon,
mahingpit na ang akong mga panahon,
ug magkita na tingali ta, mata sa mata,
maanyag ug gamhanan kong higala.


-- ANIJUN MUDAN-UDAN 
Malaybalay, Bukidnon, Philippines

5.09.2013

sensuum defectui


nahanap ang kalimutaw nalubog 
nikagiw niyuhot ang tinagidyot hangin pahilayo
sa gialihang ilong ang imburnal sa dalunggan gibahaan
og mga apol sa dugo sa emergency room
gaparalisis ang boseskordes
haboli ang luspad nga nawong sa nitaliwang kamatuoran
karong taod-taod buhian sa kampanaryo
magtutalimbang mga kampana sa pahibalo


-- MELQUIADITO M. ALLEGO
Palm Harbor, Florida, USA 

pahinungod duyog sa panaw


Kanunay tika makit-an
diha sa pangpang,
diin imong panan-aw
layo pa sa mga ningpanaw
nga barko sa kapunawpunawan.

Imong gininhawa karon
sama sa mga hupaw
sa langit daw naghipi
og panamilit. Ug karon
imong luha ang busay 

nga nagdagayday
gikan sa nagtibugol mong 
kaguol. Ug dili na ikaw 
maabtan, dili na maabyan 
sa ubang linalang 

diha sa kahabog
sa imong kasubo. Apan bisan pa,
namasin ko nga masamin
balik sa imong mata ang pagpilok
sa mga suga sa dakbayan

tadlas sa kagabhion. Unya, day, 
ipadayag ko ang tanang kalipay
sama sa gipangtanyag niining 
dakbayan matag biyernes 
sa kagabhion. Apan dili sa 

karon. Ning higayona, agbayan ko
ikaw sama sa usa ka inahan
samtang nahinanok iyang anak 
diha sa suok-suok sa divisoria
aron dili mabati ang katugnaw 

sa kamingaw sama sa naandan
ug magdamgo ta'g mga adlaw
nga arang-arang--wala pa
gidagit sa gapalayo nga panghupaw
sa dili pa ta mopanaw.


alang kang Maria Lovella "Ging" Naces

-- TON DAPOSALA
Cagayan de Oro City, Philippines 

5.07.2013

ang nasaypan sa akong amahan


Lima kami ka nga gikan
sa usa ka tago-angkan

ug ang pangagpas ni tatay
kasagaran lamang--

ang managsoon kuno 
dili gayod maglagyoay,

bisan asa dalhon sa kapalaran
mobalik gayod sa naandan

kay lagi ang mga pusod
gitagkos man sa haligi

sa karaan namong balay diin 
kaming tanan nahimugso.

Aduna'y lima ka mga lawak 
ang among balay gawas 

sa ilahang tatay ug nanay, 
ug luag ang talad kan-anan

sama sa mga hawanan diin
nagdula ug nagkatapok kami

kaniadto sa wala pa masayop 
si tatay. Karon, gapunay lang mi

og away. Gibiyaan na ang balay 
nga inanay gihurot sa mga anay.


-- RIC S. BASTASA
Katipunan, Zamboanga del Norte, Philippines

dinhi sa McDo


Pugngi intawon imong kaugalingon
nga magbasa ug maghunahuna bisa'g unsa,

ug suwayi pagsimhot ang kabalaka 
sa babaye diha sa imong atbang, natingala 
kon naa pa bay moabot samtang gapakaaron-
ingnon nga gapakli sa iyang libro.

Suwayi pagdimdim ang singot sa waiter--
kanhi kauban nimo sa tunghaan--nga gadali
paghatod sa imong order.

Suwayi pagkab-ot ang kamot sa bata
nga gapabantang diha pikas sa bildo
nga bungbong nga gaali sa imong 

large fries ug galaway nga sundae.
Ug kon mapaminaw nimo ang kahilom 
sa imong tapad lamesa nga igo unta 
sa upat apan duha ra mong galingkod,

basin makit-an nimo nga dili diay ikaw ra
ang galumlom sa imong pag-inusara.


-- MA. CARMIE FLOR ORTEGO 
Talalora, Samar, Philippines

5.05.2013

ang sukod sa atong gilay-on

usa ra ka pulgada
kon tan-awon sa mapa

upat ka oras
kon mosakay og bus

pipila ra ka tuplok
kon ipaagi sa cellphone

milya-milyang kamingaw
kon buot gyod sukdon


(kang Mich Siton)

-- GRATIAN PAUL R. TIDOR
Dipolog City, Philippines

mal du suisse


Dili nako malimtan inig dayon pawong sa lamparilya
ang akong lola mohunghong kanamo nga mag-ampo
sa dili pa matulog isip panagang sa dakong dragon
(Pastilan, amakan ra ba ang bungbong sa among payag!)
Tataw kuno sa gadilaab nga panan-aw ang mga bata
nga wa’y hinaw ang kasingkasing diha sa nipa nga atop,
ug molakra kini sa bukbukon nga kawayang lantay.
Gani, duna’y mga gabii nga makita ko ang mga kasway,
galabay-labay diha atubangan sa buwan nga busloton.
Apan sukad nilabay kadtong bagyong Ruping
di ko na mahanduraw ang payag. Di ko sab masud-ong
ang buwan inig dayo'g katulog. Mao na la'y nagpabilin
ang hunghong ni lola kabahin sa dragon dugang 
sa mga kasikas sa hangin tadlas sa dughan. Karon, 
gadasok ang katugnaw sa langyaw nakong kahinanok.


-- DENNIS S. SARMIENTO
Maryland, USA 

5.03.2013

sui generis


Usa kini ka pakapin nga adorno, o kaha dulaan. Sama kadak-a sa kamot sa puya, hinimo kini sa plastik nga baratohon. Medyo hait ang mga ngilit niini diin moakob ang tabon  sa bayanan. Berdeng pughaw ang kolor, ang mga sipyat sa pagmiskla sa pintal nagpormag bulibol nga daw mga pilok sa babayeng mubog lupad. Pag-abli niini mamatikdan nga pag-od ang mga bisagrang asero, gasinaw, walay taya. Sa sulod adunay salamin. Kon pila ka kilid dili ko na mahinumdoman.  Segurado gyod hinuon ko nga dili kini kwadrado. Kon nabuksan na, kining walay pangalan nga dulaan mohiklad og uban pang mga parte ug—palihog sud-onga!—human nimog hilam sa kuotong mga gingi aron mapalibkas ang tanang nagsiwil nga mga lugpit nga wala magkahinukod, nga morag mga bangkil sa baboy ihalas, aduna kay makitang himan nga maanindot tan-awon, hitsas sa mga kable ug plaka,  susamag piyano, susamag ginhawaan sa irkon. Ikaw nay hukom. Makapahimuot tan-awon, labi nag ipatong nimo kini sa lamesa ibabaw sa kinuriskurisang mga papel diin nahisuwat ang walay hinungdan nga mga balak. Kon mamalandong ka sa inosente nga katahom niini daw mahatagan kag rason aron dili una mosulat, bisan sa kasamtangan lang, mahitungod sa makalilisang nga mga panghitabo nga nagpunsisok sa imong handurawan.


-- VICENTE VIVENCIO BANDILLO
Manila, Philippines

mga tipak: mga mubo’ng balak


Ang Bildong Misteryo

Mahimong magpabilin kita
nga magtinutokay.
Apan 
di mahimong
ikaw ug ako magkadinul-anay.
Kay
dunay bildong misteryo
nga bisag mahimong labing matin-aw
magpabiling
nag-ulang kanato. 


Nag-igdal Nga Bato

Ang gugma
usa ka nag-igdal nga bato
sa giagian tang dalandalan
ning kinabuhi.
Daghan kanato
ang nahipandol niini.


-- URIAS A. ALMAGRO
New Berlin, Wisconsin, USA

5.01.2013

nebraskang kagabhion


lamurok ang aping sa kangitngit ang nahipasad-pasad
nga mga agungal nahataligam-an nga mga kadulog
nga nangiswid nitimbakuwas nahimong mga sulo
nga nagbansiwag nagbanwag sa darohunasang
gapirok-pirok sa nanindaw nanghagdawng handurawan
samtang ang silingang Kansas sa higalang balakero gahagok
unya ang mitiko ihalas nakabuhing wildfire naglumpayat
gabahihi sa mga kalasangan kamaisan sa nagtagaktak
nga kinaiyahan

ug iyang renda gikuptan gihigot sa tumoy ning dagang


-- MELQUIADITO M. ALLEGO
Palm Harbor, Florida, USA  

pagbuak


Ang unang kamot nga nikupot nako
taas ug lapad ang gikab-ot--
nisuway kini paghaom sa lang-at
sa among mga tudlo,
ug  dayon sa pagkumo
gihakop niya tibuok nakong palad
apan hinay-hinay nga niluag hangtod 
inanay niya kining gibuhian
ngadto sa kahaw-ang.

-- JIN D. GARCIANO 
Camotes, Cebu, Philippines

Daghang salamat sa mga maniniyot nga gapaambit sa ilang mga hulagway sa Google ug Flickr.