panamilit

Ilawom sa gagilak nga kawanangan 

nagkinto kong mitaak sa ganghaan sa tugpahanan 

sa Laguindingan, daw naglikay nga matunok 

sa nangakupog nga kabhang sa kahaw-ang 

sa dalikyat tang panag-uban. 

Apan sa padayon nakong pagtikang 

paingon sa paabotanan, kalit mibugtaw 

ang akong abaga, diin ang imong ulo nahiluna 

sa milabayng gabiing naniid ta 

sa pagpanglupad sa tanghaga, ilawom 

sa nagbanig nga hulga sa pag-inusara. 

Naminhod ang kaniadto haw-ang kong dughan 

sama sa kabhang sa gihulmigas nga saang, 

nga karon, sa imong kabalaka, gibalikosan 

giduyogan sa mga sonata sa mga inagulo, hagawhaw 

ug pangpanghupaw nga nakigkulukabildo 

sa danguyngoy, sa nangamig nga huyuhoy. 

-- JAE MARI D. MAGDADARO 

Binaliw, Cebu City, Philippines

unang panaglagyo

Gipili ko na sab ang window seat 

sa airbus nga akong gisakyan 

gikan nagdali-dali pag-apas 

dihang balik-balik nang gitawag 

ang akong ngalan. 

Ang bintana sa akong wala 

nakapahanap sa mga dalan 

nga daw pisi na lamang 

gikan sa akong gilingkoran. 

Ang mga eskina sa kagahapon 

sa atong panag-uban 

usa na lamang ka linya. 

Ang suga sa pako sa eroplano 

niining kilumkilom 

usa na lamang sa mga aninipot 

nga saksi kanatong nag-inat 

sa nagkanihit nga oras 

sa milabayng gabii. 

Ingon niini ang esksena 

sa pagbiya, apan pugson ko 

pagtambo ang kagahapon 

dinhi sa lingin nakong bintana. 

-- JAE MARI D. MAGDADARO 

Binaliw, Cebu City, Philippines

dihang misulod ko sa imong lawak

Wala'y minuto nga miundang og liraw 

ang akong mga mata dinhi sa imong lawak 

diin ang mga suok dalunggan na 

sa akong mga pagbakho 

sa matag higayong 

mananghid ko 

nga mopauli 

sa amo. 

-- JAE MARI D. MAGDADARO 

Binaliw, Cebu City, Philippines

sa imong paghikatulog

Sa imong paghikatulog, sag-ulohon ko 

ang matag apan sa imong aping,

ang bungot nga wala maayo og barbas,

ang mga kilay nga wala mag-angay,

ug ang patilyang nakatabon sa alom 

sa imong dunggan. 

Sag-ulohon ko ang matag suok 

sa imong lawak uban ang mga hulagway 

sa pipila ka higayon sa atong panag-uban, 

ug pamation ko ang imong hagok 

samtang nagbawod-bawod 

ang akong bukton nga gibakos ko 

sa imong bilbil. 

Sa imong paghinanok, 

bansayon ko ang kamingaw 

nga ako unyang bawnon 

sa akong paglabang 

sa akong pagpauli 

sa pikas isla 

sa akong kaugalingon. 

-- JAE MARI D. MAGDADARO 

Binaliw, Cebu City, Philippines

nunot sa imong pangutana kon kinsa’y una natong nakatulog sa milabayng gabii

Nagdungan lang ta paghigda, 

dungan natong gipiyong ang atong mga mata 

samtang nanago ilawom sa habol 

ining gabii nunot sa habuhabo. 

Gipaminaw lang tika uban sa nagkalandrakas 

nga kasaba sa daw gapaghot nga mga baki 

sa gawas niining lawak hangtod hagok na lang nimo 

maoy tubag sa akong "I love you."

Gitugyan ko na lang sa katugnaw 

ang nagbangotan nga kaawaaw 

diha sa pikas linya 

dihang wala mo na tubaga 

ang akong hagawhaw. 

Nanghinaot nga ako, 

imo nang gisayaw, 

diha sa imong damgo.

-- JAE MARI D. MAGDADARO

Binaliw, Cebu City, Philippines

pag-ikyas

Nauwat na ang akong mga samad.

Gani, kon paksiton, wala nay dugo; 

wala nay nana nga molugwa, ug

sa kukarkulo ko pa, nauwat na sab 

ang imoha. Apan, dugoon gihapon 

sa akong panumdoman ang atoang

mga sayal nga nasabod sa inyong 

pantaw gikan nakamatikod si Nanay 

sa pagkuto sa pultahan dihang inanay 

kining imong giwaling, giablihan.

-- JAE MARI D. MAGDADARO

Binaliw, Cebu City, Philippines

takdol sa baybayon

Giwaling mo ang nagsalag kong buhok

nga mitago sa nag-arko kong pahiyom,

gamit ang pinuti mong gipanaminan

sa wala’y pupamilok nga buwan.

Gihinol mo ang kinahiladman

tultol sa kalag dihang gimarkahan mo

ang balas sa tabonon kong baybayon,

dayo’g hunghong: “Langga, ikaw ra

ang akong higugmaon.”

Giligo mo sa halok ang nagbungdo kong

pusod lakip na ang nagsinug-ang kong awom,

dayon sawom paingon sa kinapusoran

ning gahimi nga baybayon nga wala pa’y

bisan usang nakatidlom.

Hangtod nga nasaag ta taliwala

ning labirintong himaya, ug wala na

makalingkawas sa taob. Natugkad mo

ang sag-od sa kantilado kong lawod.

 (alang kang Ton Daposala)

-- JAE MARI D. MAGDADARO

San Remigio, Cebu, Philippines

panag-abot

Kahil ang kilumkilom

nga gilukoban sa kahilom

dihang gitugyan ta sa higayon

ang atong kaugalingon.

Ang imong kamot, nitultol

sa mga eskina sa kagahapon,

nihinol sa mga uwat,

nga wala mapapas sa sebo de macho.

Ang imong mga tudlo, mikaskas

sa kwerdas sa kahilom

sa akong dughan nga kaniadto naamang,

nabungol sa mga kasikas.

Ug ang imong kumingking,

sa akong bukobuko, mitudling

mipalawom, sa akong gininhawa

nga mikutlo sa kahilom,

taliwala natong duha.

(alang kang Ton Daposala)

-- JAE MARI D. MAGDADARO                                                                                                  San Remigio, Cebu, Philippines