sa balak nga gipahinungod kuno sa mga nabiktima sa martial law

Upat na ka tuig sukad sa paglubong 

sa imong agalon, nagkabaga ang uwat 

sa kahiladman sa iyang mga nabiktima. 

Wala’y pulos ang imong pahasubo. 

Wala’y kalainan sa mga tingog 

sa konsentidor. Hapdos gihapon 

ang tunok sa kagahapon—di maulian 

og pinulongan nga taman ra sa pahumot- 

humot. Tuod, kangiob ang gadugdog 

nianang lungon, nanimaho’g samot 

ang sam-ang sa panumdoman. Timan-i, 

kanang binaligtos sa imong bulatik, 

igo ra na ihagbas sa hait nga kamatuoran. 

Hunahunaa ang hinungdan 

nga nakalapida ang sungayan, 

gumikan sa mga nagyango-yango 

nga bungawon sa kagahapon 

ug buringog sa kaugmaon. 

 -- TALA SY-PANOOD 

Davao City, Philippines

retard stud

“Thrust of the spark that burns
Unbounds, departs, returns
To pluck out of death’s fist
A god who dared to resist.”
— Ruben Cuevas, Prometheus Unbound

Dayag ang dinanghag sa mga namakpak sa tikasan. 

Ulipon sa mga atik ug alagad sa tampalasan. 

Tiguwang apil batan-on puros nagpalubot sa tirano. 

Errare humanum est apan puyra gaba ang nagpa-uto-uto. 

Resbakan ang mosupak! Mao’y gibagutbot sa ilang diyos. 

Tiguwang apil batan-on gitorjak sa berdugong utganon. 

Amahan kuno sa nasod, apan bugaw sa mga langyawng pikoton. 

Rakrakan ang mosupak! Mao’y kuro sa mga tagasunod. 

Dayag gyod ang dinanghag ug damak sa mga taga nasod 

Samtang sihag ang tingsi sa ginoo nilang tambaloslos. 

-- TALA SY-PANOOD
Davao City, Philippines