pagbilar sa hinapos nga mga linya nga gidiktar lahos sa kahangtoran

pagpanahon sa panahon ug

ang kaliring sa singko sentabos

nangidhat sa pagtugdon sa 

unahan (wa nay sumpay)

ang kagilok sa bulbol di maila

-- RAUL M. FIGUES                                                                                                                                   Oslob, Cebu, Philippines

anino sa mga takna

Manganino ang mga yuhom 

Sa sayong kabuntagon.

Ingon sab ang dunggoan sa Guiwanon

Diin ambitan ang suwerte sa sakayan.

Mahitabo ang binayloay sa angay:

May lab-as sa nanabo;

Ang wala may iya agad sa tungol.

Unya, kahilom sa dalahikan

Kay tagsa-tagsa sa buhat.

Kay ang kahilom dili matugaw 

Sa laing kahilom, manghuwam

Og kabanha ang banggerahan.

Iluwa sa baga sa abohan

Ang kahumot sa sinugbang tulingan

Ug kini mabati hangtod sa hiniusang

Pagtug-ab sa banay.

Sa bintana, abli ang grasya

Ug gawasnon ang hangin nga kamaong

Molum-it sa iyang kaugalingon.

Dinis-og sa mga takna, ang gabii

Mamuwak og kangitngit diin ang anino 

Mawad-an sa iyang kaugalingon.

-- RAUL M. FIGUES 

Oslob, Cebu, Philippines

salimuang

Sa obra, dila, ug pensar

Ang sanglitanan: ang kinabuhi

subay sa palad. Lukop saag, tiaw, ug tawag.

Pinalabi ang magkugi sa utok ug kamot.

Ang ngalan sa tawo sumpaya’g kalaki o batasan.

Sa ngalan sa gugma, bahinay sa grasya 

ang diwa sa bangkete. Lakip na ang kaplag sa hangin.

Niini, ang ilogan o kawatan ilhong bayani. Daghan

ang mga tuhod ang mangapilo ug tuyoong mabuta

samtang gasumbong sa alampoanan. Ang pangsangpit

usa ka pamasin. Sama sa  mga butang, malaublaobon

ang pagbatyag. Ang pagbalhin-balhin og kasangpitan

taras usab sa usa ka amang. Matikdi ang pagluom

sa Adlaw sa iyang kahago. Hilom niya kining ipahulay.

Ang pagpalabay sa kahaponon mosangko sa tubaan

nga kon daghan ang mayarok, moawas ang mga pulong.

Manalithi ang magbabalak, diay siya langit.

Apan ikasagmuyo niini ang pagtuang.

Tambok, niwang--- ang pabilo moabot.

-- RAUL M. FIGUES

Oslob, Cebu, Philippines

sugilanon sa balak sa usa ka pinintal

Magtandogay ang kalihokan.

Haling diri. Kaingin didto.

Sa init, kamaong mamasilong ang landong.

Mga butang lanayon sa panumdoman.

Lakip na ang taknaan ni Dali.

Sa pananggot hunong una.

Ang sukad kaniadto angayng tambongan.

Sa putahi, lamian ang sugilanon nga duna’y pugong.

Puyra sa ubang makalanag.

Sanglit unong sa balak ang pagpamakak,

makabsan kaha sa alak ang balak?

Ang pagsag-ob iya sa gihulaw. Uroy’g kilatan!

Maong patambal. Kaligo kon magpaanyag.

Ang paggipod, sa kanunay, maoy pasiuna sa paggama.

Kon huwas sa kaputong, ang paghaling sayon.

Ang Sudoku. Ingon man ang kyubismo ni Picasso.

Pinirmahan sa kilat ang pinintal sa kawanangan.

-- RAUL M. FIGUES

Oslob, Cebu. Philippines

asoy ni tikoy

Paglabay sa panahon, may hakhak na
Ang tinanom nga mga lubi ni Tikoy. Miuli siya
Sa bukid. Gihugopan siya
Sa iyang mga kaila nga nangutana
Sa iyang kasinatian sa dakbayan.

Naglisod siya kon unsa,
asa magsugod? Sa mga butang nga kanhi
iyang nalibgan, maglisod sa pagtuo, pagsabot.
Labot sa paspas nga dis-og sa mga takna.
Labot sa elevator ug escalator sa SM.
Sa daghang sakyanan (nga ingon
Sa binulokang bakukang gabahas-bahas sa kadalanan).
Sa Superferry labot sa pagpangayam og trabaho sa mga buhatan.
Sa ATM Machine (nga modigwa og salapi
Gikan gidunggab sa lumoy, nigpis nga mga tudlo)
Sa kutsara’g tinidor (nga nagpalayo sa
Kalambigitan tali sa gigutom
ug sa pagkaon)
Labot sa flip flops sa Levi's.
Kang Bruno Mars, Justin Bieber, Taylor Swift.
Sa BATHALAD ug LUDABI.
Kang Tem Adlawan lakip nilang Plath ug Sexton
Kang Michael Rama ug BOPK.
Sa SRP ug sa mga babaye sa Kamagayan (nga puydeng
Maambit sa parokyano sa kantidad gikan sa halin sa
Usa ka sakong kopras).
Labot sa tinagdan, pahiyom
Sa internet
Sa tag-as nga mga building (nga labaw pang taas sa kinalayogan
nga lubi sa Nueva Caceres).

Ug ang tanang nakabati sa iyang saysay
nanag-iyahay pagyangod.


-- RAUL M. FIGUES
Oslob, Cebu, Philippines

hikog

nakigbayle
ang palakerong hangin
sa nagbikangkang nga karsones
sa hayhayan

sa kilid
sa pagpunay og dutdot niini
nalum-it ang lalag nga t-shirt,
nagbitay


-- RAUL M. FIGUES
Oslob, Cebu, Philippines

bayle

Nabuntagan na sab ang Buwan.
Klariks na pod ning gipanuhot.
Kagabii man god, pina-backless
ang drama sa kanahan.

Daling miapas
ang nag-roving nga panganod
dihang iyang nasiplatan
ang mikagiw nga Buwan
(nagbitbit kini'g igtatapis
alang sa pakigols nga laagan).

Apan kaidlas naman sa kagwang!
Kalit kining nahanaw
taliwa sa nanagbayleng
mga bituon sa unahan.

Nawa, gadiyong pa
ang mata sa Buwan,
luspad ang aping
ug gabusyad lang
iyang tiyan.


-- RAUL M. FIGUES
Barotac Nuevo, Iloilo, Philippines

luwag

aninawa ang bayhon sa usa ka luwag:
mobay maalam, mobay hungog;
mobay gutom, mobay busog

hinunoa, bisag kapila pa kini
motidlom sa kahiladman sa kulon
o mokandos sa lamiang pagkaon--

magpabiling lupyak ang iyang tiyan
ug yagpis ang iyang bukton


-- RAUL M. FIGUES
Oslob, Cebu, Philippines

pendulo

"I want them to show me where the way out
Exists for this captain shackled by death.”
--Federico Garcia Lorca

Sugo sa nagyunyong panganod sa kasadpan,
giduyan sa salumsomong hangin ang sanga sa kahoy
(kansang mga dahon, laya nag talipal-ak), nga karon
moiway, unya molili--pinaagi sa abling bentana--
sa taknaan nga gisab-it sa nauphag nga bungbong
nga halos naulahi na sa dihadiha nga pinitik sa
tukmang oras.

Sa lawak, ubos nga bahin sa taknaan,
naghayang si Lolo Islaw sa katre, way kawili ni
kahingawa nga milama sa iyang lawas nga karon may
pagkakunot, biliklon nag kahimtang gumikan sa
pagdagmal sa panahon. Apan imbes magmasulub-on,
mora hinuog nasanapag kasanag ang pamayhon.

Sa gawas nagsugod nag panalithi ang langit.
Duna say pungpong sa dahon nga nataltag.

Tik! Tik! Tak! Tikkk

-- RAUL M. FIGUES
Oslob, Cebu, Philippines

dakop-dakop sa hangin

nalatid na ang lawak
way bungbong
way pultahan

(apan bisag way kalahian
kabahin sa sulod ug sa gawas)
nanukot gihapog utlanan
ang nahauknol nga panghuyatid
ug ang naungot nga damgo


-- RAUL M. FIGUES
Oslob, Cebu, Philippines

kadtong naglagot nga nagpakahilom lang

Pihong nangluod ang mga balili.
Wala na sila mag-atang sa agianan.
Nanaglumbay sila sa higad,
daw mga manggugubat nga nanagtakin
og tayaong mga sundang.

Ug sama sa naandan, dinha gihapoy
nanagpasad nga bayanan
nga manggimok lamang inig kaamang
sa sinagadsad sa unahan.


-- RAUL M. FIGUES
Oslob, Cebu, Philippines

sa gabiing nangamig

dunay lama
sa hulaw
bisag gihinginlan
sa bentilador
ang nahibiling
kainit
sa kama


-- RAUL M. FIGUES
Oslob, Cebu, Philippines

gilawmon sa paghanduraw

ang panan-aw ni Onyot
namidpid sa lawom nga bahin
sa mubong sayal ni Eska

ug dayon nasikop ang kahilom
dihang nawalis ang sidsid
sa iyang tabontabon


-- RAUL M. FIGUES
Oslob, Cebu, Philippines

sa unang higayon

mohalok
sa pagpaubos
ang akong mga tuhod

mag-akob
kining akong nagsanga
nga mga palad

mokalawat
dayon akong tunlon
ang buwan


-- RAUL M. FIGUES
Oslob, Cebu, Philippines

tugpa

sa imong paglupad
mahimong mapadpad ka
bisan asa

apan timan-i ang bayhon
sa kapunawpunawan
nagbabag


-- RAUL M. FIGUES
Oslob, Cebu, Philippines

sa imong paghilak

Ubos sa imong ilong
dunay kanal. Sa di madugay
molugsong diha ang dagat
ug ang mga balod mabanlas
sa imo unyang isugilon.

(Inig hunas, palihog lang,
ayaw na intawon
pataka’g panginhas.)


-- RAUL M. FIGUES
Oslob, Cebu, Philippines

elehiya alang sa kalanggaman

Didto sa kawalaan gihaya
ang buhi pang mga berso
nga ampay awiton sa
lumadnong kalanggaman.

Duyog sa obituwaryo,
ang dalugdog padayon
sa pagdahik didto sa hingtungdan
apan daling miapas ang kilat
sa kalangitan-- gidagkotan
ang mga kandilang giugbok
sa mga biniyaan.

Gadagsang ang mga pak- an
nga mananabtan, nag- alirong,
nag-alayon pagpanday sa gusbat
nga kabiling pugaran...

alang unya sa pagkunsad
sa mitaliwang pinulongan.


-- RAUL M. FIGUES
Oslob, Cebu, Philippines

duha ka aping

dunay duha ka aping ang dahon
langitnon,
yutan-on
(depende kon asa nagpunting
ang isig ka bayhon)
duna sab silay tagsa-tagsa’ng sugilanon
sa kainiton,
sa katugnawon
(depende kon asa nakighugyon
ang isig usa ka aping
sa lingla sa panahon)
ug nagsapnay kini’g
tigmo sa kabuntagon:
tugob sa tanghaga
ang yamog nga mibatog
ibabaw sa dahon

ug sa akong pamalandong
sa mga nahitabo sa akong kaugalingon
di igong hapuhapon
ang nag-umog nga unlan sa kaadlawon
kay sama sa dahon
duna sa’y duha ka aping
ang akong kagahapon.


-- RAUL M. FIGUES
Oslob, Cebu, Philippines

hoy, kasingkasing!

Hoy, kasingkasing!
Palayo ug pasagdi ko
Nga mag-inusara.
Ayaw ko’g tugawa.

Ikaw ang hinungdan
Sa akong pag-antos uban
Sa maluibon kong kapikas.

Bisan sa iyang kamangtas
Wala ko makaatras
Pabiling gamantinir
Sa akong pagkamartir.

Kanako wa ka manginlabot:
Padayon sa imong pinitik
Nga ikaw ra’y nakasabot!


-- RAUL M. FIGUES
Oslob, Cebu, Philippines

sa imong pagtabok sa pikas lapyahan

di ko buot
tapisan sa luha
ang akong panan-aw
inig ubog nimo
sa gabukal nga dagat
sugat sa subangan


-- RAUL M. FIGUES
Oslob, Cebu, Philippines