ang pasyon sa kinasal

Sa gubat nagkahigugmaay sila 

sa paglipang sa naugkal nga mga gamot ug atop. 

Gikasal sila sa pari diha sa kabalilihan. 

Ug misayaw sila, naggakos ug nagpahiyomay 

ilawom sa mga gusok sa dahon. 

Sa ilang mga agtang mailhan 

ang hudyaka sa inihap nga mga adlaw; 

sa ilang mga kasingkasing 

ang tibok-tibok nga wala’y gililong 

ug sa ilang mga baga ang dilaab sa 

karon-- karon, ug sa kanunay, 

sa uban ug sa tanan. 

Ang dila wa’y timik, 

wala na magkinahanglan og mga pulong. 

Sa sulod nila ang mga balod misipa, midahunog 

sa wa’y utlanang kalawran ug kapanganoran. 

Ang bag-ong bana ug asawa mibalik sa panggubatan 

nga nagsapupo og pusil 

ug hunas sa singsing 

sa ilang gabaga, wala’y puas, 

kanunayng naghinumdom nga mga tudlo. 

-- ESTER TAPIA 

Kathmandu, Nepal

baldeney see

(alang kang Dottie) 

Nakahinumdom ka ba sa Baldeney See? 

Sa miaging tuig sa kilomkilom sa usa ka ting-init 

Alas sayes sa hapon nga dili tingsalop sa adlaw 

Nanuroy ta nga putos og jacket 

Ilawom sa kakahoyan tapad sa linaw 

Ug miingon ka dili ka na mobalik sa Pilipinas 

Ug miyungyong og lawom ang mga dahon 

Sa higanteng kakahoyan ug naminaw sa imong mga pulong 

Nga mitibuok daw ang gabon sa tingtugnaw. 

Ang mga gamot sa imong tingog milikop sa daplin sa tubig 

Diin ang pipila ka mga batan-ong lalaki naghumod sa ilang mga bitiis 

Milingi sila ug nangidhat. 

Ug miingon ka sa Europa sa pagkalangyaw 

Tam-is nga wala'y nakaila kanimo; 

Tam-is wala na'y pagtakoban ngadto sa imong ginikanan 

Uyab kaparyentehan mga silingan 

Mga bug-at nga bato nga gitangkil sa imong buko-buko 

Morag sa kang Sisyphus ang ilang mga wa'y kataposang pangindahay 

Kadenang wala'y kabugtoan. 

Ug dinhi sa Baldeney See 

Ang aninaw sa linaw tinuod nimong hitsura 

Diha sa tubig nga gilumotan 

Tin-aw ang imong mga mata ug gikumkom mo ang bato 

Nga pinug-an sa mga pagmahay. 

Ug nahinumdom ka nga sa pag-uli mo sa Pilipinas 

Nabati mo ang lawom nga panghupaw sa katawhan 

Ug kini mibalikos kanimo 

Gikan sa lapalapa ngadto sa tumoy sa imong buhok 

Hugot morag pisi sa rattan nga misuot sa kalasangan sa dugo 

Ug taman natuk-an ka ug buot kang moeskapo apan asa? 

Ilusyon lang ang mga walay kataposang baybayon 

Ang asul init-init nga dagat 

Ilusyon lang ang mga panas nga isla nga giliyokan 

Ug mga barotong linayagan 

Ang mga katkat-katkat kunohay sa kabungtoran 

Ug ang payag nga nipa 

Diin may batang naglingkod sa bukobuko sa kabaw 

Ug ulitawo nga nagsista-sista tupad sa babayeng taas ug buhok

Sa nagsidlak ang pahiyom. 

Moabot ang panahon nga ang mga bulkan kalit nga momata 

Ug molubong niining mga estatuwa. 

Ug miingon ka nga daghan ka nag nakalimtan 

Pasagdi nga ang panahon mohimo sa iyang buluhaton. 

Ang paghikalimot aduna'y presyo. 

Mga sinina mga alahas mga inasal nga baboy 

Ug niadtong dato na gyod kaayo 

Mga BMW ug Mercedes, 

Aan sa mga uyamot, 

Anaa kanunay ang simbahan 

Nga gatanyag og lubos nga kalimot. 

Daghan ang dili mo gustong hinumdoman 

Usa na ang silingan nga milarga sa gawas 

Nga nagpapista sa tibuok barangay kada uli, 

Kinsa mohilak kon gasahan 

Og mga estorya gikan sa lubnganan sa iyang pagkabata 

Pagtalikod niya 

Gilud-an nila ang iyang mga tunob.

Gilaslas sa ilang tamihid ug agik-ik ang iyang bayhon.

Gihuboan ang santos sa kapilya nga iyang gisininian 

Ug gipahumtan og Chanel 

Ug didto sa sinalikwayng kwarto 

Ang iyang gamayng altar hinalaran sa mga litrato sa iyang paraiso. 

Dinhi ang Baldeney See aduna'y lainlaing panagway 

Kon lubog kini isako niini kanato ang iyang mga tinagoan 

Nga mora'g dili angay sa mga langyaw nga parehas nato, 

Usahay tin-aw kini 

Ug dili nato mamatikdan ang kalainan sa asul sa langit; 

Sa asul sa samin diha sa tubig. 

Usahay lawom kini ug mga subong anino moturok 

Diha sa iyang sabakan. 

Kon mabaw kini ang atong katawa buak-buakon 

Ipalanog sa mga bato nga miguho sa kadaplinan, 

Apan karon ang adlaw mipukaw diha sa linaw 

Ug kaliboan ka mga mata 

Nga mibuka ug mipikaspikas sa kalibotan 

Ngadto sa kaliboan ka mga gagmay 

Hinigugma hinikawan nga mga kalibotan 

 -- ESTER TAPIA 

Kathmandu, Nepal

ang siklo sa mga pulong

                                             nagsugod na sab, 

ang mga ngalan, berbo, adhetibo, nanurok na sab 

diha sa mga hardin, baol, plasa. 

Nagpakit-anay sila og ilang isig ka pungpong, 

ang mga peryodista, magsusuwat, tig-asoy;

gihukad nila sa ilang mga bag ug bakpak,

baskit ug buyot ang mga hinambin, 

ug misaliyab sa kahanginan 

sama sa mga kabakaba ni Juan Ramon, 

namukhad daw mga putot nga bala. 

Ayaw kalimti ang mga pungan: 

bakakon, kawatan, mamumuno; 

itaga sa mga bato ang mga numero: 

30,000, 50,000, 203 ka bilyon; 

ikudlit sa mga punoan sa kahoy: 

X💘Y; mga ngalan -- 

Mijares, Trajano, Romero, Kian, ugbp. 

Idulog ang mga tunog sa katulogon, 

palup-iti ang mga silaba sa unlan, 

tipigi sa mga panid sa libro 

sa mga naptalina nga di mangatulog, 

ug itisok sa kapanganoran nga salag 

sa mga balita sa ulan. 

Ug sa dihang mounos nga dili kapugngan, 

mangahumod ta, wala’y sapot, 

botas, payong nga makapanalipod. 

Matunaw ang palasyo, 

maugkal ang mga semento, 

ug maugkat ang mga lawas, 

molutaw ang mga pitaka sa mga hulagway 

sa pinalanggang asawa ug mga anak, 

manindog ang mga hubong bukog 

ug motudlo kanato: Kamo! Kamo! 

Kaniadto, karon. 

Ayaw kaguol, O igsoon ko! 

Makaamgo, maluwas ra ta, kay nagsugod na usab 

                                            ang siklo sa mga pulong. 

-- ESTER TAPIA
Nordrhein-Westfalen, Germany

salin

(kang K.L.T.) 

Usa ka buyot nga may sulod nga sundang sa sakoban, 

pan de leche, tunga sa litro nga sopdrink, 

libro, usa ka pad nga papel, ug bolpen, 

t-shirt ug maong karsones, 

monyekang plastik 

nga mapiko-piko ang tuhod ug siko, 

sinaw ang sedang binulakan dyutayng sinina. 

Tapad sa buyot may putol nga kumagko 

nga itomon og kuko, 

kamot nga hugot nga migunit sa tig-ang bato, 

usa nga may labong ug taas nga buhok 

nga misapupo sa yutang nakatag, 

kansang hayag nga panagway, inagian og pahiyom, 

kansang mga mata dili motak-op, 

nakigharong sa asul nga wanang. 

-- ESTER TAPIA 

Kathmandu, Nepal

mga bungtod-bungtod nga balas sa baybay

Kang Conny, Peter ug Frank, kauban sa paglaroy-laroy 

Niadtong nahubog ko sa Lemonsecco 

gidamgo ko sa akong amahan 

sa dihang batan-on pa siya. 

Gwapo diay ang akong amahan 

sa iyang kabatan-on

apan dili ko gani makita 

ang iyang hitsura sa akong nawong 

sa samin. 

Siya ra mismo ang tag-iya 

sa iyang dagway. 

Ang akong amahan nga sa dihang 

naglubog og pila ka buwan 

among gisawod ang iyang init pang ihi 

sa nipis nga selopin, 

kadtong himoanan ug ays 

nga ibaligya sa eskuylahan 

atbang sa simbahan. 

Batan-on usab ang otin 

sa akong amahan, 

nahingangha ko, 

morag sa akong anak, 

80 na siya; 

sinaw, ug dili kini 

kunoton, 

ug ang iyang bulbol 

itom, wala ubana; 

ug diha, niliwat ko niya, 

bisan og puti na ang akong buhok. 

Saya kuno kaayo ming nanglakaw 

diha sa kutay 

sa bungtod-bungtod nga bunbon 

padulong sa baybay— 

gituboan og mga abina sa balas 

nga nagkaway-kaway 

sa wala, sa tuo, 

ug liyok sa mga mugbo 

tunokong kahoy 

nga gipandak sa huros sa hangin, 

wala mosulbong ngadto sa langit; 

sa akong tan-aw, 

ang ilang mga sanga sinudlay 

walay puos nga nagduko 

aron kanunayng makadungog 

sa hunghong sa yuta, 

wala madani sa mga laylay 

sa giminong panganod. 

Kahibawo mo, 

di ko gustong 

maglakaw nga mag-inusara 

diha sa hapaw nga mga bungtod 

kay basig mobukad ang akong sayal 

ug morag payong 

magtambling-tambling ko 

ibabaw sa tag-as nga mga balilli 

ug kasapnitan 

ug mapadpad ngadto sa dagat 

ug mga isla

kay wala ko'y mga gamot nga ikaugbok, 

pangadto, panganhi, 

panaa, pawala. 

-- ESTER TAPIA 

Nordrhein-Westfalen, Germany

ran, tan-awa ang mga kabalyero

Ran, tan-awa ang mga kabalyero 

galinya sa daplin sa karsada: 

pula kaayo ang ilang mga bulak, di ba? 

Kapula sa kalayo nga misilaob 

ubos sa nagbuntaog nga mga panganod. 

Gihalingan ba kaha sila sa mga kumyulus 

nga nag-alirong sa ibabaw? 

Ang mga bulak sa kabalyero nakig-indig 

sa kapula sa imong bayhon, 

sa imong gamay, sihag nga payong nga misalipod 

sa imong lawas ug anino nga labing maunongon, 

wala gyod mobuhi sa imong kamot; 

imong saninang pula nga leys mibukad gikan sa hawak, 

dakong gihay nga mibukhad gikan sa sanga. 

Tan-awa ang mga kabalyero-- nag-alintabo, 

may salag sa bidlisiw nga gitungtong 

sa sangang gisilaban sa adlaw-- Unsa kaha’y bulok 

sa adlaw? Ambot, dili ta kaharong og tan-aw; 

dili ta kaagwanta og tumang kahayag. Kini, 

kini lang ang atong makita: usa ka hubad 

sa kahayag nga mitugdon 

sa atong mga mata, milapos sa atong panit, unod, 

bukog, nga mihimo natong tabunok sa mga porma; 

kining usa ka saysay sa atong kaugalingon 

nga mas maaghop, gaan, bantaw sa mga bulok, 

wala magkinahangla’g mga handomanan o tamdanan 

sa dalan pauli sa atoa, gawas ning kabalyero 

nga mibitik alang nato og gamayng langit. 

-- ESTER TAPIA 

Nordrhein-Westfalen, Germany

sa akong pangdungog si saint-säens

kang Marjorie Evasco 

Sa atong pagpasilong sa naglagiting 

nga kainit sa adlaw dinhi sa nataran, 

sa usa ka payag sa tiilan sa bukid 

nadungog ta ang pagpakatulog 

sa usa ka inahan sa iyang naghilak nga bata. 

Sa akong pangdungog kang Saint-Säens kadto, 

ang ritmo sa iyang laylay, 

ang pagsaka-kanaog sa iyang tingog, 

ang pagbayaw pagyukbo sa mga nota 

subay sa mga lugot ug mga bungtod sa piyesa. 

Uy, duna'y maayong tig-awat sa maestro, 

nga wala gani masayod sa tuboran 

sa mga porma sa mga awit ni Saint-Säens. 

Ug miingon ka, 

Dili uy, dili man na Saint-Säens, kon dili 

kasagarang awit sa tanang mga inahan dinhi, 

nga mohupay sa hilanat, 

ug daman sa tanang kabataan dinhi. 

Gihunahuna ko si Saint-Säens, 

ug unsa'y kahupayan niining payag nga kogon, 

nagkagidlay nga amakan, 

mga buslot sa kawayang salog, 

nga miyunyon sa pag-ug-og sa inahan. 

Gusto ko siyang hinganlan Liling o Corazon, 

gusto kong sakmiton gikan sa kawad-on 

ang iyang laylay, awit sa tanang inahan, 

(ug tingali si Saint-Säens igo lang misuon 

sa awit sa iyang inahan mismo…) 

Buot kong hatagan og titulo ang iyang awit 

kanang wala'y labot sa kasubo, 

wa'y labot sa kakawang, sa kakulang, 

sa gipanunod nga hulaw ug tinggutom. 

Apan ang akong ilusyon kutob ra didto, 

dinhi niining kinabuhia, 

diha ra siya kutob sa mga bantawan 

sa nagkalarag nga kawayanan, 

sa kaawaaw sa kabatoan sa wala'y dugos nga yuta, 

sa duyan sa gising lampin, 

sa higot sa higot sa pit-os nga pusod-- 

tingali sa sunod nga kinabuhi, Marj, o sa sunod o sa sunod…

-- ESTER TAPIA 

Nordrhein-Westfalen, Germany

babay, braunschweig, braunschweig!

May kape’g panit, kulot og buhok nga babaye 

nga miwara-wara og mga papel, nagkanayon 

Braunschewig, Braunschweig! Bitte! Bitte! 

Gitunol niya ang mga papel sa lumalabayng wala maggunok– 

iyang mga pulong morag kanaas sa mga pulak nga dahon sa yuta, 

mga dokumentong gum-os ug naughan sa tingpangatagak sa dahon. 

Kami mga pasahero sab, apan milingiw lang. 

Palihog, palihog! Braunsweig, Braunsweig! 

Mimwestra siya sa riles, 

ug mitudlo sa duha ka sakong plastik sa daplin 

diin misihag ug mikulos ang ang mga sininang mabulokon. 

Ang iyang pangalyupo yabag, ug puol na 

apan sa gihapon, walay kinutoban, 

naa siya sa usa ka tabayng ngitngit 

diin walay matundag nga makita, 

walay mosawom para nila, 

walay motimba sa ilang mga naglutaw nga mga bantal, 

ni motultol nila ngadto sa ilang baba sa estasyonan sa train. 

May bata sa sidsid sa iyang binulakangg sayal 

ug may lain pang gisablay sa iyang bat-ang 

hugot nga mikupot sa mga salin nga tudlo 

sa mga uwat nga dili mapapas. 

Miabot na lang ang among train 

nga miawit kanamo, 

ug mihatod kanamo ngadto sa among hapsay mga Byernes 

ngadto sa among mga higala nga nagpaabot 

sa sunod nga estasyonan 

sa ilang sinaw itom nga mga awto ug sinawng mga anak 

nga gikan nagpraktis og football, 

ug mopahiluna namo sa ilang mga terasa, 

sa lamesang minantilan og damask, 

mga plato migilak lang didto 

ug kanunayng tingkagay sa mga baso sa bino, 

mga lawak sa hamis nga seda, 

sa tinuyong kilomkilom 

ug mga kahilom nga inihap. 

Babay, lalin nga nasaag, 

wala makatultol sa iyang estasyonan, 

babay Braunchsweig, Braunschweig, 

mag-una ra mi nimo, 

magkita na lang ta didto, 

sa kinasang-an sa mga dila ug mga kangitngit.

Ikaw, lalin sa gubat, sa kagutom, ug hulaw 

sa dili magtagnang paggikaan og pag-abot, 

ug kami sakay-sakay sa mga train 

nga padayong naghugong 

subay sa mga riles nga nagtuyok-tuyok 

walay mga sinugdanan ug mga kataposan, 

sa nag-usab-usab, lubog, nga mga mapa. 

 -- ESTER TAPIA 

Nordrhein-Westfalen, Germany

bato sa suba

Lingin ug sinaw nga puting bato diha sa suba:

mata sa tubig nga nanakita kanako nga nagtindog,

nagtan-aw sa hinayng liyok. 

Dili tika kuhaon gikan sa tubig,

tubig gikan sa mga wala hipalging tubod 

diha sa kalasangan, sa tinagong mga sinugdanan. 

Ang bato misinaw tungod sa kanunayng paghinis sa tubig, 

tungod sa sadyang mga hulagway nga gibawon sa tubig 

sa taytayan, sakayan, mga tren, 

ug mga syudad nga milipang sa kadaplinan sa suba. 

Hinaot nga walay laing makakita 

ug matintal pagkuha niini aron idayan-dayan 

sa lamesa o himoong palugpit sa papel 

sama niining akong gisuwatan karon. 

Mawad-an kini og kahayag nga gikan sa pagbag-id 

sa mga gagmayng balod 

ug moitom, ang tabon-tabon molagom og hinay, 

ug dili na makakita ni makahinumdom 

sa mga panan-awong nindot 

sa mga taytayan, sakayan, mga tren ug syudad 

nga gihubit sa magbabalak, 

ug kon kinsa siya ug kon unsa ang iyang gigikanan. 

Ug unsa na man lang ang mahibilin kanako

nga akong handomon, nga akong hinumdoman, 

unsa na man lang ang akong balak nga suwaton 

bahin sa mga taytayan, mga sakayan, tren, ug syudad

kon kining bato, mata sa tubig, mawala sa suba? 

 -- ESTER TAPIA 

Nordrhein-Westfalen, Germany

handuraw

Sa akong handurawan usa unta ako ka amasona 

nagtangkil og pusil 

taliwala sa kalasangan 

ug makigdulog inig gabii 

sa kumander sa rebolusyon 

sa nahidagsang kakahoyan 

nga gipabaga sa mga gangis

ang alisbo sa kapintas 

nagpatigbabaw sa hangin 

ug unya ang kamatayon

sa tungatunga sa kamaisan 

nga nanggilak sa hinog nga mga puso 

ubos sa hayag asul nga langit 

apan gipili ko ang pagsulat 

rebelde batok sa klasikong diktador 

O kinabuhi 

 -- ESTER TAPIA 

Nordrhein-Westfalen, Germany

field trip

kang Ranie 

Ang dagat mihunos na usab 

ngadto sa iyang kinauyokan-- 

usa ka babaye 

nga nag-amoma sa iyang sabakan 

pinaagi sa kalimot; 

may baho niya ang basang hangin; 

atong masimhot ang iyang gininhawa 

ang iyang bat-ang 

niining lamakan. 

Lapokon nga dapit 

nga atong gibisitahan.

Atong gidugkat ang mga itomong butang 

nga nalubong sa baha-baha;

mga salin sa gubat, 

salin sa pinuy-anan niadtong mga nanglalin, 

mga puthaw nga bali, 

kuptanan sa samin, tiyan sa kaha, 

ug mga kinhason nga hinulmahan og dahon 

sa kibhang nga nawong, 

ug usab, may pikas nga pako sa anghel. 

Ato silang gihinol gikan sa pagatpatan, 

gipasihag sa adlaw aron hiilhan 

ang mga hugis, mga porma sa lapok.

Ato silang ginganlan sa kahinangop, 

kining mga biniyaang bukog, 

sa dihang misanap ang kahimungawong, 

ato silang gibakwi 

balik ngadto sa lilo 

sa katahom ug kasakit 

aron atong kaawitan. 

 -- ESTER TAPIA 

 Nordrhein-Westfalen, Germany

ang bahnhof sa hamburg

Ang Bahnhof sa Hamburg usa ka daw langob nga baba.

Gidala ta mo didto diin kuhaon mo sa inyong igsoon--

mga escalator, restaurant, bookshop, souvenir shop. 

Nangita ta og McDonald’s 

ug sudlanan sa inyong mga butang 

sa usa sa mga eskina.

Ang Bahnhof naghulga nga molamoy kanato 

ug ako gigutom sa kahilom 

ug iladong pagbati 

aron akong ikagunit sa inyong mga kamot; 

akong ihapuhap sa inyong buhok 

ug mga aping,

ug unya ang hugong sa inyong train 

untop sa oras, mapintas 

wala na'y mga halok,

ug ako mitalikod; 

ang akong kasingkasing gikankan; 

ang inyong train mibulhot 

ngadto sa usa sa mga riles 

sa usa sa mga dila 

diin ang mga pulong nahunlak. 

 -- ESTER TAPIA 

Nordrhein-Westfalen, Germany

dalaga

Ulahi na kaayo ko sa edad nga bayente 

hiposon ko na ang akong bukog 

sa ugang dughan sa suba 

Akong gipangita ang asul nga hagubhob 

sa iyang dugokan apan ang akong nadungog 

mao ang pagkahunlak sa umaabot nga mga bato 

Ug didto sa unahan ang pagpanaghoy 

dili mao ang pagbisti sa tubig 

kondili ang kahimangod sa nalayang mga dahon 

Ang akong lapalapa bug-at 

ang akong sayal nagisi sa tunokong 

hangin ug hait nga balili 

Mianhi akong usa ka kaslonon 

ug mao hinuoy akong napalgan 

kining pagkatun-as sa katedral 

 -- ESTER TAPIA 

 Nordrhein-Westfalen, Germany

tago-tago

Miingon si Ysabell, “Dali, Lola, manago ta!” 

ug ako mitubag, “Sige, Ysabell, 

manago ta sa kortina sa ulan. Puston ta 

ang atong lawas sa mga pilo sa tubig 

ug didto, masihag ta ang kabalayan 

nga naglinya sa daplin sa karsada; 

may mga tawo nga nanambo sa mga bintana, 

may mga pulang pultahan nga mga dagkong kanbas

nga gipintalan sa salibo sa uwan. 

Sa kilid sa bungtod, ang mga kakahoyan nagkapa-kapa, 

mga polis nga nagkupo ug berde, nangita, 

nangitag mga tawo nga naglibod-suroy, 

walay mga tumong, walay kapaingnan, 

ug dagiton nila ngadto 

sa prisohan sa mga yaweng walay kandado, 

prisohan sa mga tutonlan, 

ug mga baga nga gustong molupad. 

Manago ta, Ysabell, 

diha sa taligsik nagpahipi 

ang imong agik-ik; dili ta nila hikit-an dinhi, 

sulod sa humok nga seda sa uwan; 

dili ta nila hidakpan nga naghupo 

sa sidsid sa habo-habo; 

apan unya, unya inigtuwak na, 

inigkayab sa panganod, 

mobalhin ta ngadto sa langob sa bangaw.”

-- ESTER TAPIA 

Nordrhein-Westfalen, Germany

ang gahom sa pangutana

(hinubad sa Inenglis nga ‘Power of a Question’ ni Leon Wieseltier gikan sa sinugdanang balak nga Hebrew ni Gabriel Preil) 

Nagkaunlod ka. Walay pangutana. 

Wa kay gana sa bisan unsang butang. 

Ang babaye nahimong nagkahanap nga siga. 

Ang titulo sa libro gitimbrehan nga walay konsuylo. 

Bisan ang tinulo sa Mozart 

dili makapatam-is sa kauga sa takna. 

Ikaw ang squirrel nga nakigharong 

sa usa ka wala mabukang bunga 

ug ang makapahinganghang computer 

mibalibad og serbisyo. 

Apan ang sidlak nga tingog sa telepono 

mipadalag pangutana: dili kaayo husto ang pag-asumir 

nga walay pulong nga “unya” 

sa balaknon nimong panahon 

kon ang tanan diay usa ka walay kataposang karon? 

Miingon ko’g oo, ug ang maikagong tubag wala ko mamatikding 

mibuswak pag-usab. 

Katingad-an, ang gahom sa pangutana. 

 -- ESTER TAPIA 

Nordrhein-Westfalen, Germany

ang mga numero

Nagkamuritsing ang mga panganod, way porma, 

mipaka ang dalugdog, usa, duha, tulo...

Nagkalugiyang ang mga gansiyang, 

usa, duha, tulo, nga milabay 

sa gisirad-an, bildong bintana.

Mipiti ang kilat ug morag miduslak kini 

sa kinandohang pultahan, usa, duha, tulo ka 

mga bangkaw nga gilabay gikan 

sa sidlakan, usa, duha, tulo… 

asa kutob ang mga tulo sa ulan? 

Daghan kaayo sila, mas daghan pa sa mga tudlo 

                                   sa imong mga kamot, Ysabell,

apan giihap mo sila, 

sa makadaghan, gibalik-balik og tag-napulo, 

sa makadaghan gipilo ang pagtuyok 

sa duha sa kamot sa orasan. Usa, duha, ug 

mipakpak ka sa kahimuot, ang pag-ihap kanila, 

mao’y pag-ila, ang paglitok sa mga numero 

mao’y pag-angkon, sa maihap ug dili maihap, 

ang mga numero naglumbay, 

bisan og unsa kabaga ang kangitngit, 

bisan sa kakusog sa paglatos sa alimpulos, 

ang mga numero midagayday 

ngadto sa pagkawala’y kataposan, 

ngadto sa tumang pagka-dili matukib, 

maanaa man o wala, kita, ako o ikaw, Ysabell, 

nga mohilwas sa mga numero nga makanunayon, 

malungtaron kay sa adlaw ug mga bituon. 

Pagkanindot sa mga numero, Ysabell! 

Pagkahalangdon sa ilang kahusay, 

usa, duha, tulo... usa ka gatos, usa ka libo… 

wala’y kinutobang kabuhong, 

bisan og wala pa’y mohan-ay kanila,

molakbit sa ilang panagsunod, 

sa talikala sa ilang panagsumpay, 

molakbit kanato. 

 -- ESTER TAPIA 

Nordrhein-Westfalen, Germany

pan de sal, pan de leche, pransis, ug bituon

Usa ka bulan nga matag alas otso sa buntag mopukaw nako 

ang misulbong nga tuno sa pik-ap sa tigdeliber og pan 

la la la la la la la, la la la la la la la! 

Mga pan de sal, ensaymada, bituon, ug pransis 

nga humot ug laming kitkiton, 

mga humok og kagumkom nga tumoy sa bituon, 

ug ang malaksi nga mga panit sa pransis; 

humot, pagkalaming tagamtamon, 

i-dribol sa atop sa baba ug sa dila, usapon, tunlon. 

Apan dili mi mogawas ug mosugat sa pik-ap. 

Ang tigdeliber nahisagmuyo, kay 

sa miaging buwan wala na’y taga-amo nga kaniadto 

wa’y sipyat iyang hangpon, sa pangutana, “Unsay inyo?” 

bisan kahibawo na god siya sa among gusto. 

Usa ka bulan nga ang geyt gikandadohan,
giposasan, ug wala gani’y 

bisan ik-ik sa puthaw nga maka-eskapo. 

Usa ka bulan nga gikadulog ko ang mga panganod, 

giwakli ang binulakang kortina aron mahiduol sa langit 

apan nitukol ang mga unlan– kadaghang mga porma, 

nialsa ang mga habol– pagkalugom sa asul! 

Kanus-a kaha nako matilawan og usab ang akong paborito, 

ug mataltag ang mga taya sa geyt, 

ang pulbos sa mga gihay sa tambis nga nasangit,  

ug masilhig ang nagtipun-og nga layang dahon 

sa bakanteng karsada nga karon sa mga timos gisanayan? 

Ug motingsi ang tig-deliber sa pan nga busngi ug moingon 

“Unsay imo ‘Te?” 

Ug hinganlan ko sila, silang tanan 

nga sa akong dila gikamingawan: 

Pan de sal, pan de leche, pransis ug bituon. 

 -- ESTER TAPIA 

Nordrhein-Westfalen, Germany