tali sa karaang tugas ug abohan

Kon nagbarog pa kadtong tugas, 

Dugay na kining nagmahay kanako. 

Ug kon sukdon ko iyang paghandom 

Nga mobalik ko, sama ra kini sa tunglo 

Matag adlaw sa pagkasangit sa sapisapi 

Nga kanunay nakong kuhiton. 

Di ko baya mabasol akong pagdumili 

Kay bisan pugos nangalarag iyang mga dahon 

Taudtaod na sab sila wala mobalik. Sama nako— 

Di ko tuyo nga isalikway ang katuigan sa pagtabanog 

Ug bato-lata apan dugay na baya napupos ang abo 

Ug ang aso diha sa abohan daw duha ka anino 

Kon sayon ra ko hikalimtan, handomon sa kanunay 

Ug bawnon ko sulod 'ning dughan ang lumalabay. 

-- DENNIS S. SARMIENTO 

Baltimore County, Maryland, USA

sa dalan colon, dughan sa langyaw

Pastilan, layo’g maabtan ang kamingaw— 

Mobatog sa manggang hilaw ug hipon 

Ug molahos sa garapon ang kahidlaw 

Nga hait pa sa binaid nga kutsilyo. Sa Colon, 

Gadasok ang kinabuhi nga natanggong 

Sa kasiot ug kainit uban sa mga lagong 

Apan malimtan tingali ni, gawas sa kaibog 

Nga di nako masalikway sama sa abog. 

Dinhi karon, ang wanang sa gilay-on 

Mahimong tultolon sa gapalayong pak-an. 

Kay kon sublion ko pagtilaw ang katuigan, 

Adto ko mahidangat balik sa dugok sa Colon. 

Didto baya, bisan sa kaparat ug kaaslom, 

Matultolan pod ang katam-is sa paghandom. 

-- DENNIS S. SARMIENTO 

Baltimore County, Maryland, USA

tali sa saad ug paglaom

Sanglit aduna'y gisumbingay 

ang pagpanglarag sa mga dahon, sayon ra 

ang paghanduraw sa ilang pagpailob 

ilawom sa baga nga katugnaw ug nganong 

taudtaod sab unya ang ilang kahilom samtang 

huwaton nila ang katumanan 

sa tingpamulak. Mao sab ang pagluhod— 

kining akong pagpangapkap nga gasanga-

sanga, gasalingsing. Gabinugtong 

ang gilay-on sa kasingkasing. 

-- DENNIS S. SARMIENTO 

Baltimore County, Maryland, USA

bangaw, baybayon…

Nalambod ang uwan ug adlaw. Naa ba gyod kaha 

Sa kapunawpunawan ang tumoy sa bangaw? Subay diha

Sa balikog nga handurawan, mahidangat ba kaha ko

Puhon sa imong dughan? Unta malugwayan 

Sa akong mga taligbos ang ibabawng hut-ong 

Sa hangin hangtod masaksihan nimo kining gilapdon:

Kining gahulat ug gaalirong nakong mga baybayon. 

-- DENNIS S. SARMIENTO
Baltimore County, Maryland, USA

subay sa pagbugsay

Sulod niining kinandadohan 

nga bildo ug ladrilyong bungbong, 

dinakpan ka. Taliwala sa kasiot 

uban sa mga langyaw— ang gilay-on 

sa mga pangandoy. Latas 

sa katuigan, ang mga tunob mopapas sab 

sa mga bunbon lahos sa lawod. Ang pagbiya nako 

daw tuong bukton nga nanumpa 

sa kamingaw, apan kini mao’y timaan 

nga gikamay ko ikaw sa kanunay. Tan-awa 

ang adlaw: gadumdom sa mga nahabiling 

bituon matag kilumkilom. Unya, 

balikon ko ikaw, mopautaw-utaw 

sa gabawod nga mga panganod. 

-- DENNIS S. SARMIENTO 

Baltimore County, Maryland, USA

ang salag atbang gakurog nga adlaw

sama sa dahon 

mga lambod sa bukton 

ug ang pagtugdon

inig bulhot sa huwaw 

magsanga og katugnaw 

 -- DENNIS S. SARMIENTO 

Baltimore County, Maryland, USA

tulo ka tanka mahitungod sa langsob

basin ang hangin 

nasayod sa gibilin 

nga pahinumdom 

tali sa mga gangis 

atol sa pagkahilom 

bisan ang adlaw 

kanunayng gipanugnaw 

samtang gasud-ong

lalis sa kilum-kilom 

ug hapon nga himatyon 

wanang sa ngitngit 

likod ni'ng mugbong langit 

wa manumbaling 

sa gabudlat nga buwan 

ug kidhat sa bituon 

 -- DENNIS S. SARMIENTO 

Baltimore County, Maryland, USA

panimpalad

Luyo diha sa ospital sa Chong Hua, diha 

Bahandianon pod baya ang mga batang nagduwa, 

Nauwanan tadlas sa sapa sa Guadalupe. Latas 

Ibabaw sa paril, sa kinandadohan nga koral, 

Ang kakutas sa kapit-os kaluha sa paglaom. 

Pagkabililhon baya sa mga lata ug botelya samtang 

Ang pag-antos dili masukod sa kamugbo 

Sa ilang mga bukton. Ang pagkatkat tugbang 

Sa ilang pagkanaog diin gapasad pod 

Ang mga bildo sa kahadlok samtang nanggimok 

Ang mga ulod. Kining pagsuway tuod pagkadanlog 

Kon mangab-ot sab ang hangin sa kahabog. 

-- DENNIS S. SARMIENTO

Baltimore County, Maryland, USA

hagtos

(alang sa anak sa akong ig-agaw)

Ang kinabuhi dili baya lahi anang lambo 

nga nahigot diha sa dughan sa tabanog. 

Madunggan nako ang hangin sama 

sa mga ping-it ni Jim-jim. Kabangis 

sa kaugmaon kon padayong manghudlat 

ang kapintas sa unos. Magkadugo 

ang mga tudlo sa kahait sa gagmayng higot 

nga nalambod sa kamot ug bukton. 

Kon di na mapiog ang haguros, 

masakmit gayod ang dugayng gikuptan. 

Ug ang langit wala baya'y utlanan 

sama niining tabanog nga nahagtos. 

-- DENNIS S. SARMIENTO
Baltimore County, Maryland, USA

haiku: samtang gatingsi ang gibati bisan sa kainit didto sa garden of the gods, colorado springs

Hilom ang tanan 

sa langitnong nataran. 

Kalit niuwan. 

Ang imong tudlo 

Hamis ning langyawng tubo: 

Nia gayukbo. 

 -- DENNIS S. SARMIENTO 

Baltimore County, Maryland, USA

andromeda ug uban pang talan-awon: duha ka tanka

Diha sa langit

kabituonan sikbit

sa gapangapkap.  

Wala gayo’y masabtan

ang nabuta nga dughan.

Diha sa bangaw

gapahiyom ang adlaw.

Uwan natuk-an,

ug nahabwa ang dag-om.

Galaway ang paglaom. 

-- DENNIS S. SARMIENTO

Baltimore County, Maryland, USA 

uloran

didto sa layo

kahayag makapaso

dinhi sa sanga

nangapkap ko sa bunga

sa punoan nga buta

-- DENNIS S. SARMIENTO

Baltimore County, Maryland, USA 

binhi

Bisan pa’g gitaptapan sa mga lunhaw

nga kadahonan ang akong panan-aw 

ug bisan sa gilay-on, nakita ko gihapon 

ang mga sanga nga baliko taliwala

sa hangin. Wala gyod nalambod 

ang isig usa lakip sa akong kahibulong

sa matag pagbatog sa kalanggaman

sa dili pa modasmag diha sa balilihan. 

-- DENNIS S. SARMIENTO

Baltimore County, Maryland, USA 

panamilit

(alang ni Madame Perla)

Tingali mao kini ang gihunghong sa hangin

duyog sa abog: “Dad-on ko ikaw sa sirkus

sumala sa imong hangyo inig saulog 

sa adlawng natawhan.” Ug tuod man 

ganihang sayo sa buntag gihuyopan sa lagom 

nga huyohoy ang tulda sa lalake nga bukon.

Unya, nisuksok sa dunggan ang abog, 

daw dila: “Mopadayon na ko. Nasuta na nako 

kon unsa’y gipanugon luyo sa pahiyom.”

Ulahi na ang paaboton. Labaw pa sa kangitngit 

ang hilom nga kabugnaw sa panamilit.

-- DENNIS S. SARMIENTO

Baltimore County, Maryland, USA 

segun sa katuigan

Habolan ko unta ang punoan

nga gihuboan sa kangitngit

ug tapakan ang mga hup-ak

sa sanga nga wala na'y dahon. 

Dili kaha kitang tanan sama ra 

anang kahoy nga igo rang 

hapuhapon sa anino sa buwan?

Nalambod ang katugnaw

sa kagabhion, ug sayon

limdan ang pangandoy 

sa kalunhaw. Unta, matag

tuig, ang ilang pagbiya 

nga inihap mao’y timaan 

sa wa’y kinutobang pagbalik…

-- DENNIS S. SARMIENTO

Baltimore County, Maryland, USA 

talan-awon taliwala sa washington monument ug lincoln memorial

sa kilumkilom

mga bawod mihilom

samtang ang adlaw

namati sa kahidlaw

sa gangis og bituon

-- DENNIS S. SARMIENTO

Baltimore County, Maryland, USA 

lakbay-handom balik sa pier tres

Sumad sa akong pagbiya, ang kilumkilom taas og kasway, 

gapangamay likod sa parola. Itom ang mga bawod ug gayunyon 

ang panganod. Kinsa pa kaha’y mamasol kon ang mga kitong 

manago, nauwaw tingali samtang gatinga, gatangag og tubol? 

Unsa na kaha'y dagway sa kinaham ko nga sinugbang isda. 

Basin nibudlot na ang mata ini kay kanunay sa matag adlaw

nahubog sa mga nabanlas gikan sa imburnal. Labi na karon

nga wa’y undang ang baha sa mga kalag ug mga gikalag.

Kadtong gilay-on sa pantalan ngadto sa parola masubay pa 

bisan himatyon ang kahayag sa bombilya. Unya, inig tungang-

gabii, mamalik ang mga mamasolay: mamasin nga mobalik 

ang mga kitong inig dan-ag sa gabinugtong ug gabutod 

nga buwan. Moabot pod ko kuyog sa kamingaw sa uwan.  

-- DENNIS S. SARMIENTO

Baltimore County, Maryland, USA 

tanka: pagsibog tugbang sa duha ka labyog

i. dailos

dinhi sa sapa

sama sa dahong laya 

ang mga takna

hinay kining molihok

usahay maghinuktok

ii. tungas

didto sa lawod

hilom ang mga bawod

buot mohikap

sa lapyahang natahap

sa hayag nga nahalap

-- DENNIS S. SARMIENTO

Baltimore County, Maryland, USA 

diha sa lapyahan

katulog na Buwan         

aron hagwaon ko

ang Adlaw

katulog na Adlaw

aron duyanon ko

ang Buwan

-- DENNIS S. SARMIENTO

Baltimore County, Maryland, USA 

kabahin sa nangka samtang nangadto mi sa florida

Daw diyolen ang kahamis sa liso

ug luspad ang unod. Kon tam-is ba kini--

gaduhaduha ko atol sa among biyahi

padulong sa Jacksonville. Ug kalit lang

nisutoy sa akong panumdoman

ang katagok sa akong pagpanilap

mahitungod sa akong natilawan didto

sa Sugbo. Labi na ang mga namunga

didto sa nataran sa balay ni Lola. Ambot

unsa’y naa sa nangka ug nganong

ang iyang alimyon humok kaayong

mopaduga sa ang akong mga mata.

-- DENNIS S. SARMIENTO

Baltimore County, Maryland, USA