layover sa incheon airport

Ang dagan sa atong panagtabo

Mag-agad ra gyod kon pila ka ka oras diri. 

Kon 12 ka oras, na hala--

Sakay sa bus paingon sa Seoul kay

Ang duha ka oras sa dalan padung didto 

Naa’y ikadalit nga gamay'ng gasa: 

Ang pag ila-ila pagbalik sa imong tingog, 

Ug ang pag andam-andam kon tapsingan ba

akong kamot sa imong kamot.

Sa Gwanghamun dapit sa city hall, 

Ang mga palasyong dug-ol sa usa'g usa, 

Si Haring Dejong ug ang bayaning si Yi-sunsin 

Nagbantay sa tunga-tunga sa dalan, 

Maghilom-hilom ra, di ra ipanabi 

Ang panag-estoryang napalid.

Kon unom ka oras—

Anaa ra’y dagat duol sa airport diri sa Incheon.

Dili ni dagat sa Cebu kay 

Ang balas lagom ug ang tubig lawom, apan 

Ang isda ug kinason mao-mao ra 

Sa atong ginakaon kaniadto. 

Tilawi lang. Basin naa’y lain timpla 

Imong matilawan dala panamilit

Sa mga nangaging sinabwan.

Kon tulo ka oras—

Ang kapiit ang panahon

Kape sa Starbucksra ang madalit. 

Hain maayo'g hagkan na lang tika sa C.R. 

Sa di pa ka mouli sa imong laki.

-- DANESSA ALINSUG


Bucheon, South Korea

atubangan sa samin

Ang nangalagas nakong buhok 

di na lang nako iphon og kausa, kaduha…

kon dili pila na kabuok nga lumpong 

ang nadakpan nako samtang nangikyas 

ang gipugngan nga bakho. 

-- DANESSA ALINSUG


Bucheon, South Korea

kanus-a pa kaha ta mauli-an?

Kini ang pangutana kon naa’y

balak nga mokalit lang og

ambak samtang gapatutoy ko

sa akong inday: Kanus-a pa kaha ko

mauli-an, magsabak na usab

og lain pang mugna?

Paminaw ko

Kanunay kong gigukod og tuldok:

Wala pa gani ko kasugod

gadasok na ang mga pulong,

hapit nang malata

sa akong hunahuna.

-- DANESSA ALINSUG                                                                                                               Bucheon, South Korea

uwan sa tingtugnaw

Ang wala-damha nga pag-abot sa uwan

gapakaaron-ingnon nga kadiyot ra

ang kasikas ibabaw sa akong gikuptang nipis

nga payong. Kining akong handomanan

sa una nakong pag-abot dinhi.

Tinuod baya ang ilang giingon: ang Bisdak

nga kontra ang aircon maanad ra gyod

sa tumang katugnaw tadlas sa magtagak-

tagak nga snow. Ug malingaw ra

sa cherry blossoms inig tingpamuwak

bisan mingawon kadiyot sa dagat sa Mactan

atol sa labihang alimuot sa ting-init, dayon ra’g

kahubog sa gapuwa nga mga dahon inig autumn.

Apan kining saksak-sinagol

sa panahon-- uwan sa winter ug ginagmay'ng

salibo sa snow sa miaging spring

manghod ra'g gamay sa akong gibati

dihang ang uyab nako kaniadto sulagma lang

ningsulod sa hunahuna. Abi nako'g patay na

apan kalit lang og pangumusta.

-- DANESSA ALINSUG                                                                                                              Bucheon, South Korea

alang sa akong amiga didto sa canada

Anaa gyo’y mga adlaw nga sama niini:

Bahin-bahinon nako ang usa ka oras

Sulod diri sa Starbucks

Sa ingon ini nga mga paagi:

Magmaoy mahitungod sa akong anhing inahan,

Maniguro nga malingaw si inday nako,

Maghunahuna kon unsa’y andamon unyang panihapon,

Maglingilingi sa silingan nga lamesa, lakipan og kasuya

Nianang hinigalang tapok-tapok.

Kahinumdom na hinuon ko

sa atong buhat kaniadto, gahugpong sa Bo's, atbangan

ang kapait sa Cafe Americano ug kabaho sa sigarilyo,

gatagamtam sa mga panagna kon mag-unsa ta

inig lapas nato'g traynta.

Natagnaan gyod baya nako

nga maminyo ko ug manganak bisan wala nako

matino nga mag-kimchi ko kada kaon

ug magsuroy-suroy sa tanan kapehanan

diri sa duol.

Labaw na nga wala nako natagna

nga suwayan nako’g hupayhupay ang kamingaw 

sa matag gutlo nga wa'y pislok 

atubangan sa Facebook.

-- DANESSA ALINSUG                                                                                                               Bucheon, South Korea

persimmon

Kini, ang kinaunhang prutas

nga akong natilawan diri, mora’g chicos diha

sa ato: Kon padugayon nimo ang iyang katam-is,

matagamtam nimo kadiyot

nga mora'g balas sa imong dila.

Ang punoan ini dili mamunga

hangtod dili mag-ilis ang kainit (nga mas igang pa
sa Pilipinas) ug motidlom hangtod sa 9 degrees

atol sa pagkausab sa kadahonan: lunhaw

paingon pula, lunhaw paingon dalag…

Ang bunga nga imo rang makit-an

tunga-tunga sa ting init ug sa tingtungnaw

kanunay'ng gitugon kaniadto

sa akong inahan.

Nahinumduman nako 

nga ang gibuwad nga persimmon

mao’y kataposang prutas nga iyang gikaon

sa wala pa siya nag-ilis ngadto

sa wala’y utlanang panahon.

-- DANESSA ALINSUG                                                                                                              Bucheon, South Korea

ang mga estatuwa sulod sa lake park

Ang mga estatuwang galaray,

Galingkod atubangan sa lanaw,

Anaa ra’y ikaambit nako dri:

Ang igmat nga mata kaniadto

Magluyloy ra gyod sa hinay-hinay

Paingon ngadto sa pagkataya

Bisan unsa pa kabagtok

Sa puthaw iyang gama.

-- DANESSA ALINSUG                                                                                                                Bucheon, South Korea