pahinungod kang papa ug mama

Ayaw’g ilabay sa sapa 

ang gihimo nakong bangka, 

gigama sa papel ug sa mga titik 

nga nagtiniil. Gikan sa gadugo 

nga kasingkasing nga 

nagbitay sa tumoy sa saging 

diha sa nataran, haw-ang 

sukad inyong gibiyaan. 

Ayaw ibalhog sa basurahan 

ang gakalapok nga mga kaang, 

haom sudlan og mga sugilanon 

nga nanggitik nako kaniadto 

sa dihang ang yuta nga 

nanamkon nako nibuka 

hangtod igong gilamoy 

ang mga katawa ning kalibotan. 

Karon, bisa’g unsaon nako 

pagsangpit ninyo, sige lang kon

dili mo motubag aron sa gihapon 

madunggan nako sa agik-ik 

sa langit bisan pa’g giputos 

sa kangitngit. Tipigan 

ug pagatam-ison pod unta nako 

lakip ang kabangis sa mga balod 

nga inyong gitulod uban 

sa akong panganod, gatipun-og 

sa mga dalugdog samtang 

makalumos ang unos duyog 

sa danguyngoy sa mga langgam 

nga wala’y sangang mabatogan 

bisan taliwala ning kalasangan. 

Kini diay ang kasakit. 

Kining kahikurat sa isda 

nga nahaw-as sa sapa 

nga danlog sa lumot hangtod 

karon dinhi sa atong nataran 

nga haw-ang lang gihapon. 

 -- MARIA VICTORIA B. BELTRAN 

Cebu City, Philippines

kon naa pa lang ko’y pako

Nilupad na ko 

Sa kawanangan 

Aron molantaw 

Sa kabukiran 

Ug kapupod-an. 

Motugpa ko sa Australia, 

Makighimamat sa mga lumad 

Ug moambak kuyog 

Sa kangaroo nga matod pa 

Ni Budoy, sigbin kuno. 

Unya modalikyat sab ko 

Sa Indonesia, didto sa isla 

Sa mga bathala aron sutaon 

Kon tinuod ba 

Nga dunay paraiso dinhi 

Sa atong tugkaran, unya 

Molangyaw na 'sab ko 

Padulong sa Europa, 

Ug mangusyoso 

Kon ang karaan 

Nga kamatuoran 

Aduna pa ba'y pulos 

Kanato karon. Ug di sab ko 

Malimot pagtugdon 

Sa Amerika, didto 

Sa New York diin mosalida ko, 

Motugpa sa korona 

Sa Statue of Liberty 

Nga gikan sa Francia. 

Mohapit sab ko Sa Washington D.C 

Aron ingnan si Donald 

Trump, "Mirisi! Napildi ka!"

Modalikyat diay 'sab ko 

Sa Africa diin makig-istorya 

Sa kalag ni Mandela,

Makigdula sa mga gorilya 

Sa kalasangan sa Kenya. 

Kon naa pa lang ko'y pako 

Sa tinuod lang--

Nilupad na ko sayo 

Ganihang buntag padulong 

Sa Malakanyang aron 

Akong ilampurnas 

Ang bastos-og-baba nga 

Presidente sa Pilipinas. 

-- MARIA VICTORIA BELTRAN

Cebu City, Philippines

palihog lang, mga Pinoy millenials!

 Ayaw pagsulti nga wa ko kamatngon: 

Nakabatyag mi.

Ayaw ingnang wa ko kadungog:   

Nabungol mi.

Ayaw pagsulti nga wa ko katilaw:

Natuk-an mi.

Ayaw ingnang wala ko magsaba:

Naninggit mi. 

Ayaw pagsulti nga wa ko'y gibuhat:

Nilihok mi. 

Ayaw ingnang igo ra kong gahilom:

Niulbo mi.

Ayaw pagsulti nga ako gapangurog:
Nagdilaab mi.

-- MARIA VICTORIA BELTRAN


Cebu City, Philippines

sayaw sa nisalop nga adlaw

(alang sa choreographer nga si Russ Ligtas)

Matag adlaw

Moduaw ang kahayag

Sa mga isla sa Pilipinas.

Ang mga lalaki molantaw kaniya.

Ang  mga babaye motutok kaniya.

Sa nag-alingasang hangin

Molihok ang mga kamot sa adlaw,

Mosayaw ang iyang mga tiil

Nga gama sa papel nga gatiniil.

Adlaw, padayon sa imong sayaw!

Kay kon moabot ang kangitngit,

Gamiton nila ang imong kasingkasing

Paggama sa kwentas ug singsing.

Adlaw, ayaw'g dagan pahilayo!

Ayaw'g biyai ning kalibotan

Nga gitumban sa mga tawong nagkabayo.

Nasimhot na nako ang baho sa dugo.

Subay sa gagmay  nga mga dalan

Ang hambogerong kabayo gapahiyom

Sa paglabay sa mga balayng gama sa karton.

Ang ilang mga mata aduna’y tabon.

Ug sa pagsinggit sa nasaag nga langgam

Gikan sa kahoyng nahimutangan

Motago ang adlaw luyo sa baga

Ug itom nga mga panganod, nahulga.

Motyabaw ang mga babaye

Managan ang mga lalaki

Samtang molantaw lang ang hangin.

Molantaw lang gyod ang hangin!

Adlaw, padayon sa imong sayaw!

Kay kon moabot ang kangitngit

Mapalgan mi nimo sa punerarya.

Kining nagdilaab namong mga mata

Magpiyong na.

-- MARIA VICTORIA BELTRAN
                                                                                                       Cebu City, Philippines

panumdoman

Nagbuto-buto na usab ang mga pusil

Sa akong yutang natawhan

Ug ang nagsagol nga baho sa luha

ug dugo nangalisngaw tadlas

sa kadalanan, nitapot sa hangin,

Nisuksok luyo sa atong tinutokan.

Ug samtang napuno ang mga lubnganan

Sa mga nabaling bukog-- nilanog

Ang tingog sa pinalanggang diktador,

Gipalibotan sa amang nga mga kandila--

Makabungog usab ang mga pakpak

Ug mga dasig nga katawa gikan

Sa iyang palasyo ug sa iyang ginsakopan

Nga nagpakabuta bungol: ang baho

Sa mga gaagas ug gatulo

Usahay motapot sa lanog   

Padulong sa uga nga mga lawas

Nga bag-ong gilubong,

Apan wala’y nakakita sa bakho

Nga lakip sa usa ka liso, natagak

Ilawom sa alimpatakan hangtod

Sa iyang pagkabanhaw.

Ug dinhi, bisan sa kangitngit,

Ang natisok hinay-hinay lang

Sa iyang pagkatay, molabong sa matag

Huyop sa hangin nga nalukop

Sa luha, dugo, ug katawa.

Bisan sa giluom nga kahilom,
Moabot ra gihapon ang panahon nga

Mapuno, moawas, ug maghaguros kining

Atong lunhaw nga panumdoman.

-- MARIA VICTORIA BELTRAN                                                                                                               
Cebu City, Philippines
 

kining mga tingog: sayo sa buntag sa isla sa olango

Aduna'y mga takna

Nga madungog nako--wala 

Damha--ang mga sonata 

Sa hangin, gakisaw sa dagat 

Duyog sa takulahaw nga tugpa 

Sa mga alindahaw samtang

Gasakdap-sakdap ang mga huni 

Gikan sa gagmay nga mga tutonlan 

Nga gaapas sa mga tuktogaok 

Sukad gasugod og panghuy-ab 

Ang sidlakan. Usa ka abrakadabra 

Sa kahilom kining salamangka sa 

Akong kahingangha samtang ako

Gatagbaw og paminaw sa gatapot

Nga kasikas sa buyoglangawkulilig

Ug sa gadagpi nga mga dahon,

Sanga nga nangabali, huyuhoy 

Ibabaw sa sagbot: kining igmat 

Nga yukbo sa talinis nga tingog 

Nga gama sa igmat nga bagting

Gikan sa kasingkasing.

-- MARIA VICTORIA BELTRAN

Cebu City, Philippines

baybayon

Nagpinal ang gitaga nga iho-- 

Napadpad sa balas,
Gikuhit sa balod samtang iyang ginhawa
Gihikyad sa hangin.

Gidugukan sa mga tawo
Ug mga sabaang langgam
Nga daw korona sa usa ka haya.
Ug nidulom ang palibot pagtambong

Sa mga langaw. Ang usa, 

Nabusog, ug dihang gisagpa
Nahimong lama sa palad sa
Usa ka igmat nga bata.

Ang bugsay ug pukot gitidlom,
Gipabug-atan og kalabera
Sa mga kagusbatan hangtod ilalom
Ning karaang mga unos-- mga manulunda 

Nga gama sa bildo,
Sidlak sa adlawng nilapos sa bintana:
Kaguliyang sa gisi nga layag,
Mga tripolanteng nalumos,

Mga barotong napikas
Sa pagsugwak sa tubig, sa pagbuslot
Ning mga butang nga padayon napadpad
Dinhi ning tampalasang baybayon.

-- MARIA VICTORIA BELTRAN

Cebu City, Philippines

paglabay sa pipila ka bulan

Nilugwa na ang adlaw nga daw gikawat

Sa mga panganod. Hilom na 

ang hangin nunot sa haguros

sa gipanuwayan nga  delubyo. Linaw na 

ang tubig nga kalit nilamoy 

sa among kalibotan

kaniadto.

Abri na ang mga tindahan. Nibalik na 

usab ang mga magtutudlo sa tunghaan. 

Nanguli na ang mga binilanggo sama 

ni Dodong ug Inday. Limpyo na 

ang mga kadalanan sa dakbayan diin 

nakit-an ang mga patayng lawas

kaniadto.

Nibarog na ang upat ka poste 

sa among balay. Nakit-an na namo 

ang among mga atop nga nanglupad ug

nitugdon sa tugkaran sa among silingan.

Miagas na ang poso sa kusina ug banyo.

Nisiga na pod ang mga suga gawas lang 

sa lawak ni Nanay ug Tatay diin kami

tanan nagtapok matag gabii

kaniadto.

Ug kining mga uwat 

sulod sa dughan dili na gyod mapapas 

bisan kanus-a hangtod sa 

kahangtoran.

-- MARIA VICTORIA BELTRAN

Cebu City, Philippines

kon naa pa lang ko'y pako

Nilupad na ko
Sa kawanangan
Aron molantaw
Sa kabukiran
Ug kapupod-an.
Motugpa ko sa Australia,
Makighimamat sa mga lumad
Ug moambak kuyog
Sa kangaroo nga matod pa
Ni Budoy, sigbin kuno
Unya modalikyat sab ko
Sa Indonesia, didto sa isla
Sa mga bathala aron sutaon
Kon tinuod ba
Nga dunay paraiso dinhi
Sa atong tugkaran, unya
Molangyaw na 'sab ko
Padulong sa Europa,
Ug mangusyoso
Kon ang karaan
Nga kamatuoran
Aduna pa ba'y pulos
Kanato karon. Ug di sab ko
Malimot pagtugdon
Sa Amerika, didto
sa New York diin mosalida ko,
Motugpa sa korona
Sa Statue of Liberty
Nga gikan sa Francia.
Mohapit sab ko
Sa Africa diin makig-istorya ko
Kang Mandela
Ug sa mga gorilya sa
kalasangan sa Kenya
Kon naa pa lang ko'y pako
Sa tinuod lang
Nilupad na ko, sayo
Ganihang buntag padulong
Sa imong nataran aron
Dalhan ko ikaw og init
Nga kape nga nagbanaw
Ning nagdilaab kong dughan.


-- MA. VICTORIA BELTRAN
Cebu City, Philippines

di ingon nato

Sigon pa sa katigulangan
Aduna'y nag-alirong
Kanato—dili sila makit-an
Apan kon naa'y awom
Sa imong kalimutaw
Motumaw ang mga

Di ingon nato.
Anaa sila sa kanunay
Nagtan-aw, naghulat
Sa pagtakdol sa bulan
Ug sa pagbukal sa lana.
Makig-indig sa bulkan
Ang dahunog sa utok,
Moawas ang kapungot
Gikan sa gadugdog

Nga dughan—maghuot
Usahay sa kahadlok kay
Diha luyo sa panganod,

Gilibotan man diay ta

Og gingharian sa mga
Di ingon nato.

-- MARIA VICTORIA BELTRAN

Cebu City, Philippines

dagit

Gidagit ang birhen
Nga kanhi nagtindog
Sa tunga sa altar
Ug gilibotan sa bulak
Nga gihalad sa mga galuhod.

Matod pa nila
Naibgan siya
Sa usa ka agta
Nga anaa naghari
Taliwala sa kakahoyan.

Sugid usab sa uban
Siya gitamastamasan,
Gikutlo sa iyang
Nahimutangan ug gidala
Sa laing dapit.

Apan aduna’y nagtuo
Nga nangluod lang kuno
Ang birhen sa mga tawo
Ug nagpahilayo
Sa altar sa pagtuo.

Ang iyang mga deboto
Karon gakaguliyang
Pagpangita sa dan-ag
Nga kanhi dayag
Diha sa halaranan nga

Sa pagkakaron
Labaw pang haw-ang
Sa usa ka lapad
Nga wanang…

-- MARIA VICTORIA BELTRAN

Cebu City, Philippines

bisan

Bisan

Ganahan ta

O dili—
Mahinog ang bunga
Sa punoan.
Malagas ang
mga dahon.

Molabay ang unos
Sa atong isla
Nga sa dugay na
Nga panahon
Giamuma,
Gibisbisan
Sa atong gugma
Nga hinaot pa
Unta magpadayon
Hangtod sa

Kahangtoran
Bisan…

-- MARIA VICTORIA BELTRAN

Cebu City, Philippines

sa akong pagbalik

Nakit-an nako bisan wala pasagdi
Nga natumpag na ang mga haligi
Sa balay nga sa karaang panahon dinhi
Mao’y nahimong bugtong saksi
Sa akong pagmatngon ug pagsusi.

Nahanaw na intawon ang koral sa payag
Ug ang tugkaran diin akong gipungpong
Ang akong mga kalipay ug kasubo nga dayag
Bawnon unya nako puhon sa akong lubong.

Naguba na ang hagdanan
Nga sa pipila ka higayon
Buot nako nga malaktawan
Ug malikayan sa dayon.

Apan ang karaang punoan

Sa mangga sa kanunay gadayandayan,
Gapabiling saksi ug kauban
Sa akong mga handumanan
Dinhi sa yuta nakong natawhan.

-- MARIA VICTORIA BELTRAN

Cebu City, Philippines

hay, gugma!

Matod pa niya

Wa pa ug di gyod

Moabot ang kausaban

Namong duha—karon

Ug kaniadto, bisan pa

Sa paglabay sa katuigan

Ug pito ka mga anak,

Magpabilin sa gihapon

Nga dili maihap—

Kaming duha.

-- MARIA VICTORIA BELTRAN

Cebu City, Philippines

ang hara

Dinhi sa akong lagwerta
Walay sagbot
Nga makalusot
Gawas lang kon pagbuot
Sa usa ka hara.
Inig talidhay sa adlaw
Magpahayahay ko
Dinhi sa akong trono
Diin ako ang ampay
Sa mga gangis nga gatagawtaw.
Ang kalabasa nga gakamang
Usahay gahi og ulo
Dili gayod motuo
Nga ang iyang mga liso
Dili mosanay ning lasang—
Magpahiyom sab kanako

Ang bulak sa Kakawati
Sa panahon sa kilumkilom

Aron mahinumdom ko
Sa katam-is ug kaaslom
Samtang ang mga alibangbang
Dinhi nakigdula sa kahoy
Gatagbaw lang og panguykoy.

Ay, kasingkasing hawoy!

Gitigbas dayon nako
Ang amorsiko nga gakanaas
Lakip sa gakamang nga halas
Kay dinhi sa akong lagwerta
Mao ra ko’g si Bathala

Samtang ang sampaguita

Niusbong diha-diha dayon

Uyon sa mando ning dughan:

Gibuboan sa ulan,
Gihagkan sa bulan.

-- MARIA VICTORIA BELTRAN

Cebu City, Philippines

tumba lata

Dili sakit
Ang kusi
Sa kagahapon
Nga nagdala kanato

Didto
Sa agiagian
Sa atong mga tunob

Didto
Sa suba
Diin ang sulog
Kanunayng’ nahigmata

Dili sakit
Ang kusi
Sa kagahapon
Nga anaa nagpahiyom

Natong duha
Nga sulod
Sa traynta y kuatro
Ka tuig
Wala damha

Naghulat niining
Higayona
Balik sa dula
Nga tumba lata


-- MARIA VICTORIA S. BELTRAN
Cebu City, Philippines

sabaan

Matod pa

Sa katigulangan

Hilom kuno

Ang biga—dili

Magsaba, apan

Lahi na siguro

Ang panahon

Karon, daghan na

Og kausaban.

Kay makabungol

Ang pahumot

Ni Inday.

Kay makalanag

Ang tingsi

Ni Dodong.

Sa dihang dinhi

Sa akong atubangan

Sa tindahan

Sulod sa Ayala Mall

Nag-alisngaw,

Nagpasundayag,

Nagtagbaw

Ang sabaan

Nga biga.

-- MARIA VICTORIA BELTRAN

Cebu City, Philippines

balitaw: lantugi ni juan ug maria

Juan:
Maayong buntag mga higala
Ingon man sa pinalangga kong asawa
Nga sa akong dakong katingala
Dili na modulog sa iyang bana.

Maria:
Daghang salamat sa imong pasundayag
Atubangan sa tanan karong buntag.
Tugoti una ko sa paghalad og balak;
Ihatag ko una sa tanan ang usa ka bulak.

Juan:
Ania kaming duha dinhi karon
Atubangan sa langit nga tabonon
Kay ang among suliran dili na matulon
Ning kasingkasing kong masulob-on

Maria:
Ako si Maria nga taga Sugbo
Asawa ni Juan nga pilosopo
Lima na ka bata ang among dibuho
Dili na matuman ilang mga damgo

Juan:
Apan Maria, pinalangga kong asawa
Ang mga anghel maoy moalima kanila.
Ayaw kahadlok, ayaw kabalaka.
Angay unta ka maghimaya, mag-abiba.

Maria:
Dili na ko pailad sa tam-is mong dila
Kay dili nato mausap ang gugma
Ug ang mga gigutom kong mga bata
Ilang kaugmaon maoy akong tinguha

Juan:
Nunka nga mosul-ob ko’g condom
Busa kanang rosa mong baba itak-om
Matud pas pari walay labaw pas kaaslom
Kay sa mawad-an sa tanang paglaom

Maria:
Wala na intawon ko'y panahon
Sa pagpatubo anang mga dahon
Malanag unya tang tanan inig-kaon.
Gugma ug paglaum--asa kaha paingon.

Juan:
Kaniadto sa panahon ni Mampor
Sa dihang dili pa uso ang bapor
Ang gugma tinuod ug balaan
Sama sa bahandi nga batasan.

Maria:
Kaniadto sa panahon ni Eba
Dili pa uso ang daghang mga bata
Ang dagat napuno pa sa mga isda
Ug ang mga prutas nagkalata.

Juan:
Apan pitik ning kasingkasing
Nagpungasi, daw anting-anting
Kining tanom nga nanalingsing
Motubo ug manganak daw saging

Maria:
Dili ko mailad sa imong mga balak
Kay nitagam na ko sa pag-ambak
Sa katam-is sa imong dila
Ug katahom sa imong baba.

Juan:
Paminawa ra god ko hinigugma
Sa dihang ako kanimo nangasawa
Usa sa akong mga tinguha
Nga manganak tag usa ka dosena.

Maria:
Pastilan, dili mahuman kining atong tigi
Kay kanimo dili na gyud ko makigtuki.
Istoryahi na lang kadtong tamsi
Tua, Nikanta ug nagtungtong sa haligi.

Juan:
Maria! Maria! Kanako paminaw
Kanang imong mga kamingaw
Way tumbanan kay di ko mohikaw
Sa imong mga tumong ug lakaw.

Maria:
Saksi ang takdol nga bulan
Sa mga pulong nga imong gibuhian
Kay kong kana imong hikalimtan
Kining langob sa dughan akong sirad-an.

Juan:
Paminawa ang hunghong sa hangin
Ug ang pitik sa imong kasingkasing
Tumana ang mando sa kapalaran
Nga napatik sa dagway sa bulan.

Maria:
Kon kanang imong gugma nako kaha
Tinuod, ihatag nako akong gitinguha--
Ang naghaguros nga mga lusok sa ulan
Ug ang pusod sa buhi nga bulkan.

Juan:
Ihatag ko kanimo kanang tanan
Apan ayaw kog hikawi sa atong unlan
Nga matag gabii imong gitabonan
Sa bugnaw nga tubig imong gibuboan

Maria:
Kay ngano manganak na usab tang duha?
Di ko mokuyog sa huyop nianang hangina.
Pangutan-a kuno pag-usab ang signos
Siguradoa nga dili ta mangalumos

Juan:
Dugay ko nang giatupan
Ang atong palasyo sa laing kalibotan.
Motuman tas mando sa Ginoo
Magpahilayo ta sa kalayo.

Maria:
Si Teresita, kanhi nimong gitariki
Nagminyo sa na lain, gikasal sa pari.
Nakadungog ka ba ug nakabati?
Iyang gibati karon mora'g gihasi.

Juan:
Dili na nato hisgotan
Kanang nanglabay nga mga bulan
Kay lainlain ang kapalaran
Sa mga sagbot sa kalibonan.

Maria:
Sa napulo ka tuig, dose ka anak
Sunod-sunod, mao ra og bulak
Nga sa buwan sa Mayo hastang pamukadkad
Apan si Tering sa kalisod gatuwad-baliskad.

Juan:
Kay nganong nabuhi ta ning kalibotan?
Aron magtanom sa kahumayan
Ug sama sa mga bitoon sa kalangitan
Ang mga tawo sa yuta modaghan.

Maria:
Ambot lang anang imong dunggan
Dili maminaw sa aluhipan
Nga sa akong lawas nikamang
Kay wala na gayod mahimutang

Juan:
Tan-awa ra gud ang imong palibot
Ang mga kidhat sa mga aninipot
Kadungog ka ba sa alimukon?
Nagkudyapi kay sa gugma ulipon.

Maria:
Unsay pagtuo nimo ning pamayhon?
Buta'g bungol sa katahom nga lunlon?
Wala na nagbantay ug nagsud-ong
Sa pagsubang sa adlaw, maghukdong?

Juan:
Palabya ning naligas kong pulong uyon
Sa panahon nga gisaw-an nato pag-angkon
Nagdali ang tanan--ambot og asa padulong
Inig-takdol sa bulan wala nay pugong.

Maria:
Kasabot kos imong pagmahay
Ang Amihan ug Habagat nanglabay
Apan daghan ang wala kabantay
Kay sa ilang kinabuhi nabudlay

Juan:
Sa akong pagsuroysuroy
Gidala ko padiindiin sa huyohoy
Sa naglainlain nga mga kahoy
Diin ang mga bunga nanaghoy.

Maria:
Wa ko malingaw sa nanaghoy mong prutas
Kay ang akong kalibotan nagkanaas.
Intawon, dili na igo ang atong gatas.
Sa dagat, wala nay mga isda nga lab-as

Juan:
Dinhi ning pusod sa kalibotan
Duol sa baga sa buhi nga bulkan.
Nagsud-ong kanato ang kahayag
ikaw ug ako, walay makababag.

Maria:
Kanindot paminawon sa mga pulong lawom

Labi na kanang kinabuhing luwas sa dag-om
Apan, pastilan, dili ra ba ko dali patuohon.
Gahi pa kini kon itandi sa bato sa bitoon.

Juan:
Pagkasakit sa imong mga pulong
Kining ako dili panglimbong.
Kung buot nimong susolingon
Pitik ning dughan dili mapalong.

Maria:
Kay basin baya og dili nato matulon
Ang nagbagang mga pagkaon
Isuka samtang wa pa maangkon
Aron ang kinabuhi magmalinawon.

Juan:
Dili na lang ko mahiubos
Nga nagpakabuta bungol ka sa signos
Apan mahigmata ka ra gyod puhon
Niining mando sa panahon.

Maria:
Kasayon pagsul-ob sa condom
Sa dili pa ka intawon mosalom.
Si Dodong baya wa pa’y tuig intawon;
Kaniya, wala gani ko'y igong panahon.

Juan:
Basta, dili gyod ako motugot
Nianang imong hisgot-hisgot
Kay sugo baya sa simbahan;

Ginadili ilang mando talikdan.

Maria:
Tan-awa usab ang imong palibot--
Naa, ang mga bata sa katri gahuot
Ang ilang mga luha ug singot
Sa ilang habol intawon nitapot.

Juan:
Matod pa baya sa Ginoo
Kadtong walay pagtuo
Dili kakita sa kahayag,
Magduhiraw, way lamdag.

Maria:
Paminaw ra god, ayaw pagsaba--
Mihunghong sab nako si Bathala
Anaa gianod-anod sa hangin;
Nanalingsing iyang gipamilin.

Juan:
Nan, paminawa gayod ug sutaa
Hinaot ikaw unta mahigmata.
Dugay rang gahulat kining dughan
Nga kanimo gihidlaw sa labihan.

Maria:
Apan duna koy dyutay nga hangyo
Ug kini ang kataposan kong bakho.
Ugaling imo unya ning tumanon
Kitang duha magmalamposon.

Juan:
Dali, ibutyag dayon diri kanako;
Basin itugot nako imong hangyo
Bisan dili pa nimo kana iyagyag
Oo, ihatag dayon nako ang tubag.

Maria:
Ay, sa dili pa kita, Juan, magdulog
Pahikti yuna kanang imong sulog
Ug atubangan sa tanan akong isaad
Dili na gyod ko kanimo mobalibad!


-- MARIA VICTORIA BELTRAN
Cebu City, Philippines

agosto veinte uno

Udto kadto,
Dominggo sa laing kamingaw
Sa tibuok isla dihang ikaw
Natumba nunot sa gipalanog
Nga pulbora

Ug naglibotlibot ang aso
Sa akong alimpulo duyog
Sa dag-om nga mihaklap
Ning yuta kong natawhan lakip
Sa adlaw, bituon, bulan.

Apan sa imong pagkasukamod
Gibuhian sa imong kamot ang balod
Nga nikamang, naghaguros
Ug sa wala magdugay

Nabanlas diin natisok
Ang usa ka liso nga hangtod karon
Wala pa gyud moturok dinhi
Sa isla diin ang mga saag
Nga balili mao ra’y nilipang
Ug nikatay sa nagkagidlay
Nga mga lubnganan.


-- MARIA VICTORIA BELTRAN
Cebu City, Philippines

singot sa kalipay

Lanog ang daang mga sonata
Ni Michael Jackson
Elvis Presley
Ug Frank Sinatra
Samtang gilabyog ni Inday
Ang iyang sampot
Nga nagkagidlay
Kuyog sa tanang sakop
Sa malipayon niyang banay

Makausa sa usa ka tuig
Biyaan niya
Ang paglaba ug panilhig
Kay sul-obon ang blusa ug saya
Nga gitipigan
Alang ning higayona
Kining adlaw sa diskoral
Sama sa usa ka suod nga higala

Kimbot sa wala
Ug sa tuo
Hangtod mahutdan og bala
Ug didto ubos sa punoan
Sa nahimuot nga acacia
Mopahulay siya
Ug pahiran
Ang singot sa kalipay

Nga sa dili madugay
Mobanaw
Mauga
Mahanaw.


-- MARIA VICTORIA BELTRAN

Cebu City, Philippines