ang buaya sa marsh

Ang Buaya sa Marsh 

Ay! Ay! Pagkadako-dako!
    

     Ang Buaya sa Marsh 

     Naghulat sa kangitngit, 

     Naghulat og biktimahon. 

          Ang Buaya sa Marsh 

          Astang siroka! 

          Gipanilok og kaon 

          Bisan iyang mga igsoon.

                 Ang Buaya sa Marsh 

                 Nihabhab pa gyod og bulawan 

                 Pangtunaw sa gipangkaon. 

                     Ang Buaya sa Marsh 

                     Gihugasan ang pula sa panit 

                     Og tubig nga limpyo. 

                           Ang Buaya sa Marsh 

                           Buotan pod ra ba usahay. 

                           Sa niaging Mayo, 

                           Nilamano siya ni Tatay. 

 MARIANNE HAZZALE J. BULLOS
-- General Santos City, Philippines

sa lasang

Sa akong paghinumdom 

sa mga butang nga anaa kanako, 

mga butang nga karon wala na, 

nagtanom ako og binhi sa dibisyon 

aron mahimong harang sa dili mapugngang gibati. 

Apan wala ako naghandom 

na sa paglabay sa mga panahon 

ang biniyaang binhi 

mao'y 

magpahaw- 

ang 

sa 

patag 

kong 

ka- 

sing- 

ka- 

sing. 

Sa 

layo, 

nakita ko ang kakahoyan 

na wa’y hunong sa paglambo. 

Sa ilawom sa galandong nga mga sanga, 

namulak ang mga tinagong tinguha ug kasubo 

sulod sa mga katuigan ako naglatagaw, 

kanunay nanghinuktok sa mga bunga sa kagahapon. 

Sa dihang gisubay ko na pagbalik ang giagian 

nawala ako sa lasang. 

MARIANNE HAZZALE J. BULLOS

-- General Santos City, Philippines

nagtuk-ong ang manok

Sa gawas, 

Gipakaon ug gibuy-an 

Ni tatang ang hiniktan. 

Abot na. 

Sa tugkaran, 

Nihangad sa nagbukang langit 

Nitilaok sa makadaghan. 

Andam na. 

Sa pultahan, 

Nagpaabot nako... 

 Uli na. 

 MARIANNE HAZZALE J. BULLOS 

-- General Santos City, Philippines

dabaw (dalagang kabaw)

Ako usa ka dalagang kabaw 

Nagsige’g barog bisa'g dili adlaw 

Sa Tionko nangitag ilimnon tin-aw 

Aron mahaw-as sa gibating kauhaw. 

Ako usa ka dalagang kabaw 

Sa nagpundong lapok gasawsaw 

Bisa’g daghang langas nga langaw 

Nga labad kaayo’g storyang latagaw.

Ay, ako usa lagi ka dalagang kabaw! 

Dali ra intawon ibaligya sa langyaw. 

 -- MARIANNE HAZZALE J. BULLOS

General Santos City, Philippines

bulan

Ang siga sa bulan 

Misabay sa mga nagdagang mananap sa kalasangan; 

Misunod sa mga naglupad nga Manghak sa kahanginan; 

Nagpatingkad sa mga dahong nahibasa gumikan sa luha 

Sa mga bituon sa kawanangan. 

Nihalok sa akong panit. 

Nisunop sa namugnaw kong kalawasan ang kainit. 

O, nagsigang bulan, dili ka malikayan! 

Midagayday na sa akong kaunoran ang mga tan-aw mong 

Makadani. 

Sa imong kaanyag, milanog sa kalasangan 

Ang mga hinagunghong nga daghong sa kahidlaw. 

Apan, pamati! 

Saksi ang mga nagdukong punoan sa hagawhaw 

Nga pagtubod sa kalipay. 

Ang mga mananap nga nakasaksi ug ang alingising 

Nga mga langgam sa yuta, nagkapagkapag 

Sa nahimong paglagpas. 

Dag-om. 

Karon adunay laing katalagman nga moabot 

Nga sama ka makahahadlok 

Sa pagngulob sa dalugdog. 

Apan sa higayong ako maghandom 

Sa mga taknang nagsiga pa ang bulan, 

Nakamata na lamang ako sa mainit nga hikap 

Sa adlawng' mikusi sa akong panit: 

"Bangon! Giabrihan na ang langit." 

Ug midali ako pagpahid sa di mapugngang tulo 

Sa pag-antos sa nawalang bulan. 

 -- MARIANNE HAZALLE J. BULLOS 

General Santos City, Philippines

ilad sa dila

tagak nga katag

piang nga aping

wala nga lawa

nituo ang nauto

MARIANNE HAZZALE J. BULLOS

-- General Santos City, Philippines