kabisdak: Jessabele Bentazal

Showing posts with label Jessabele Bentazal. Show all posts

3.05.2022

daklit nga pahulay sa kusgan nga gikapuyan

Madutlan baya gihapon ang lig-on.

Tan-awa ra nang puthaw, napahak gyod sa taya.

Napulpog pod ang sementadong pader sa baha.

Nabangagan ang tugas nga haligi sa anay. Unya,

Kining akong dughan bisa’g kabuakon

Sayri kuno nganong tibuok lang gihapon.

-- JESSABELE BENTAZAL

Boljoon, Cebu, Philippines

8.28.2021

sa pagkahisalaag

Nagdilaab unta ang sulo nga akong gihuptan

Apan gitultol lang gihapon ko sa kangitngit—

Kining paghidangat ko sa natipas kong dalan

Hangtod sa lim-aw ko natambog la’g kalit.

-- JESSABELE BENTAZAL
Boljoon, Cebu, Philippines

4.27.2021

latagaw

Dahon nga naglutaw sa katin-aw.

Panganod nga nagsambol sa wanang.

Amorseko sa tul-id nga sidsid.

Ug ako sa gadasok nga kalibotan.

-- JESSABELE BENTAZAL
Boljoon, Cebu, Philippines

3.28.2021

sa lalaking gaguyod og kabaw

Mitudling diha sa imong mga palad

ang agi sa imong daro. Ay, pasagdi lang

kon molugnot ang imong kabaw!

Sa umaabot nga mga adlaw, ako ra’y

motugway niya sa nataran diin unya

molampos ka paglunang sa himaya.

-- JESSABELE BENTAZAL

Boljoon, Cebu, Philippines

2.26.2021

ang baba

Langob, puy-anan sa bitin. Diin mobugwak ang hilo sa kasilag,

Manukad sab ang mga pako sukad sa pagkabuak diha sa salag.

-- JESSABELE BENTAZAL
Boljoon, Cebu, Philippines

2.02.2021

akong pamalihog sa atong panagkita

Utang buot sa imong pag-abot unya,

Ayaw’g pasalipod sa mga hinalad

nga rosas diha sa akong lamesa.

Ayaw’g pun-i, ayaw baya paawasa

ang katam-is sa tsokolate. Ayaw’g tago

sa gigasa nimong mga garay sa balak.

Busa, pamati. Dili ko kinahanglan

ang imong pagtakoban. Dili unta tiaw

ang panagsugat sa atong kalimutaw.

-- JESSABELE BENTAZAL

Boljoon, Cebu, Philippines

1.13.2021

pagkahanaw, pagkabanhaw

Susama ra ang padulngan

Sa langgam ug tawo nga naniba sa susamang kahoy,

Sa kahoy ug tawo nga nagbarog sa susamang yuta,

Sa yuta ug tawo nga misupsop sa susamang duga,

Sa kalibotan diin ang mga lumalabay usa ka asoy

Nga gatuyok-tuyok—

Ang yuta ug ang tawo,

Ang tawo ug ang yuta,

Ang yuta ug ang kahoy,

Ang kahoy ug ang langgam...

Susama ra ang ilang balikan.

-- JESSABELE BENTAZAL

Boljoon, Cebu, Philippines

hagit sa handurawan

"Reimmersion (in native culture) is not an end in itself; it is to define more clearly the native grounds on which the Cebuano poet stands, the local parameters of language and experience, toward the end that he can stand in the world confident in the singular value of his own voice...

To conserve and extend the resources to which the Cebuano poet is heir by enhancing the natural rhythms of native speech, cultivating the rich concreteness of dialect, and confronting the particulars of his social experience...

The Cebuano poet today does not come upon a language that is already there, ready to use; he has to recreate it not only out of the rawness of daily speech but summon out of language that which has already fallen away from common consciousness and use."

-- Dr. Resil Mojares,
"Cebuano Poetry: Looking Backward, Forward."

matod nila, mando nato

"What could I say at all without my roots?... What could I say without coming to ground?... and I took no journey other than the return."
-- Pablo Neruda

"And the end of all our exploring will be to arrive where we started and know the place for the first time."
-- T.S. Eliot

"The work of language deserves our greatest care, for the tongue’s fire may devour the world, or may light the way."
-- Scott Russell Sanders

"Memory that yearns to join the centre, a limb remembering the body from which it has been severed, like those bamboo thighs of the god… The personal vocabulary, the individual melody whose metre is one's biography, joins in that sound, with any luck, and the body moves like a walking, a waking island."
-- Derek Walcott

"We ascend, from the infinite pit of our perceptions, to the finite life of words."
-- William Bronk

salo-salmot

Ari mo! Ambi, atong tilawan ang imong tampo. Palihog ipadala lang ang tinagik nga balak ug sugilanon ngadto sa geemyko@gmail.com.

Kinahanglang bag-o pang haon ang mugna nga imong buot idalit. Ang tigpasiugda ug tigdumala (moderator) niining balayan gapanilap sa katungod nga mopili ug modumili sa tampo. Tugotan pod unta siya og higayon nga mosugyot pagdugang og asin kon matab-angan usahay, pasabwan kun paughan gamay imong hinukad. Mao'y tumong ining balayan ang mamugnaong paghalingay ug pagsaw-anay sa atong gidalit. Kon gibalibaran, palihog ayaw og tyabaw. Ayaw tawon pamaak. Lagmit wala lang mobukal ang lana sa tigdumala kabahin sa timailhan sa tinuod nga wakwak.

sa makausa pa

"Reimmersion (in native culture) is not an end in itself; it is to define more clearly the native grounds on which the Cebuano poet stands, the local parameters of language and experience, toward the end that he can stand in the world confident in the singular value of his own voice...

To conserve and extend the resources to which the Cebuano poet is heir by enhancing the natural rhythms of native speech, cultivating the rich concreteness of dialect, and confronting the particulars of his social experience...

The Cebuano poet today does not come upon a language that is already there, ready to use; he has to recreate it not only out of the rawness of daily speech but summon out of language that which has already fallen away from common consciousness and use."
-- Dr. Resil Mojares,
"Cebuano Poetry: Looking Backward, Forward."