sa pagtagamtam

Daghang nangutana unsaon gyod kuno 

pagsabot ang balak. Kay bisa’g unsaon kuno nila’g sabot 

di man gyod-- maibot na lang tawon 

ang di angayng ibton. Makutkot ang di 

angayng makutkotan. Busa, gitubag ko sila 

nga sayon ra baya tugkaron sa dila 

ang gilawmon sa mga talinghaga. Sama ra gyod na 

sa imong pagtilap og ice cream, 

pagtilaw sa humba, pagsupsop sa mata sa isda. 

Gahunahuna ba ka? Di ba wala? Sama ra gyod tuod na 

sa pagtan-aw sa tin-aw nga langit, o pagsud-ong

sa mabulokong pinintal. Gahunahuna ba ka? 

Di ba wala? Wa ka gahunahuna apan nakasabot ka 

sa imong natilawan. Wa nimo hunahunaa apan 

nakasabot ka sa imong nakit-an, nga kini 

lamian ug nindot lantawon, ug kini igo nang pamatuod 

aron pamatud-an nga ikaw naa’y nasabtan. 

-- JOJIE E. OGAOB
 Barili, Cebu, Philippines

usa ka dominggo samtang nanilhig sa tugkaran ang akong apohan

aso sa daob sa kanhi lunhaw 

gabugdo ang mga panganod 

mikisaw ang mga awit sa radyo 

gatughit sa duyan ilawom 

sa landong sa manggahan 

milabong ang alisngaw sa utan 

gisanapan ang kahaponon 

ug gilapwaan ang kahilom 

-- JOJIE E. OGAOB 

Barili, Cebu, Philippines

ang kalibotan sa covid-19

Nagtapok ang mga layang dahon sa tugkaran. 

Amang ang awit sa lumalabay nga mga langgam. 

 -- JOJIE E. OGAOB 

Barili, Cebu, Philippines

aron mahingpit ang atong pagpakabuhi

ayaw lang 

pagmaya basta

panahon ra sa ting-init 

magkat-on pod unta ta 

pagsayaw taliwa 

sa unos 

 -- JOJIE E. OGAOB
Barili, Cebu, Philippines

alang kang lolo

Lo, moangkon kong dili lalim kadtong mga gabiing magdu’g ta’g katulog. Mga gabii diin ang kalbaryo gisubay sa hutoy, mitugaw sa akong kahinanok. Hutoy mong bisag akong bungol-bungolan, molapos man gyod gihapon bisa’g gitabonan ko’g unlan ang akong dunggan. Gani, gumikan sa di na maagwantang kapungot, kausa giampo nako nga unta mawala na lang ka aron makatu’g nako’g sayo. Apan karon, Lo, sukad ka mipanaw, labing lisod diayng’ katulgan kining gakarat nga kamingaw.

 -- JOJIE E. OGAOB 

Barili, Cebu, Philippines

unsaon pagtubos sa gugma

Ipakasama ra kana 

sa paghaling. Kon magpunay ka

pagpaslak og daghang dangilag, 

igo rang mobutho ang aso. Apan

kon ipalanghab ug pakal-angan

ang matag sugnod, hayan 

hay-ad ang dilaab.

-- JOJIE E. OGAOB 

Barili, Cebu, Philippines

laing talan-awon bantang sa dughan

Sama sa naandan

Ang wa’y hunong nga tipasak

Sa mga balod

Padayong gihangop

Sa pangpang nga dili

Gihapon matugkad

Ang gatukaw nga kahilom,

Nanglunhaw og lumot.

-- JOJIE E. OGAOB                                                                                                                          Barili, Cebu, Philippines

kon nganong wala nako tubaga ang imong pangutana

Matikdi ang inagay-ay sa duha ka managlahing sapa-- ang sabaan ug ang hilomon. Suwayi’g lusad kadtong unang misanong sa imong pagtagad. Aninawa, pamatia ang nag-alingasang’ bul-og sa tubig. Unsa’y gilawmon sa imong pagtugkad? Pangga, imo untang masabtan nganong’ gipili nako nga magpakahilom na lang niadtong higayona.

-- JOJIE  E.  OGA-OB                                                                                                                       Barili, Cebu, Philippines

ang lahing dagway sa luha

Balaan kining matanga sa yamog

nga sagad mahulma kon matandog

ang pulang tigbayon sa sulod—

dali rang moungot ug lisod 

ang hapsay ug hingpit nga dailos

kon wa’y gibug-aton ang katim-os.

Pangga, ayaw na lang katingala

nganong kanimo dili ko mauga.

-- JOJIE E. OGA-OB                                                                                                                           Barili, Cebu, Philippines