12.30.2015

niyebe sa disyembre


tumong sa pagtakdol sa adlaw
nidaligdig ang niyebe
nga nagpas-an og aso
nunot sa sapa tadlas ngadto
sa dakong wanang

dili igsapayan sa nagkurog
nga mga dahon ang masusihon
nga hungihong sa hangin
namasin nga masayod
mahitungod sa imong pagduaw

sama sa punoan nga hinabulan
ug bug-at nga puting kabugnaw
uyuga unya ang kasingkasing
nga dugay nang ningkaging
sukad giunos sa kahapdos


-- TEA SOLON
Cebu City, Philippines

ang mga hapon sa una


Gakamang ang mga uk-ok
sa paw-ang niyang mga ngipon.
Ang gagidlak nilang mga tipaka
modalin-as lahos sa bukang ngabil,
migula tagsa-tagsa hangtod
nga ang iyang masakitong pamanit nahanaw
sa ilang gaminapnong paglangyaw.
Nagtunok iyang batiis ug nagmala ang kapay
Sa pagpuyo sa buyog sa iyang baga
Ug pagdaghong sa gangis sa iyang tiyan.
Sa pikas lawak, gatindog akong uyoan
sa ampoanang balay-baraha.
Sama siya sa usa ka bintana
nga gihapinan sa mga anunugbang
nagatigi sa suga sa balkon.


-- ALTON MELVAR M. DAPANAS
Cagayan de Oro City, Philippines

12.11.2015

hybrid tom cruise


Miatubang ko sa samin atol sa adlaw kong natawhan.
Akong gisuta kon makaila pa ba ko sa akong kaugalingon,
apan nakuratan ko sa akong nakita sa samin:
sungayan sama sa kabaw, tangkag sama sa kanding, baga og simod 
sama sa unggoy, budlat sama sa tarsier ug balbon, apan 
ang porma sa iyang nawong sama ni Tom Cruise. Nanguros ko 
ug nangutana: "Repleksiyon ba ni nako?" 
Ang hybrid nga Tom Cruise mitubag: "Ikaw bitaw ni ako." 
"Imposible! Dili kana tinuod! Bakak!" 
Mitutok ko sa samin og dugay, ug ang mananap 
nangidhat ug mingisi, mipakita sa iyang dunot 
nga mga ngipon. "Kevin, tuohi ang Kamatuoran. 
Nasuhito kini kon unsaon pagpatam-is ang bakak."


-- KEVIN A. LAGUNDA

Liloan, Cebu, Philippines 

bayle


Hangaka diay
mag-apas sa imong mga lakang.
Dili na nako masundan
ang kumpas sa imong mga kamot
ug mga tabyog sa imung sampot.
Inig tuyok nako aron
atubangon ka, ikaw igo ra dayon nga 
motalikod. Sa pag-abante nako,
moatras ka.

Dili na ta magpares sa pagsayaw.
Sakto raman tingali
nga matan-aw ko ikaw
sa imong pagpuli-puli og pares
bisan kinsa, ug ako magbarog lang
sa suok, ug moyarok aron lapawan
ug dayon lumsan ang labaw nga katam-is
sa imong mga gipangsugilon.


-- JOLIE ANN R. CARTUCIANO
Cebu City, Philippines

12.09.2015

higala ko ang kahilom


sa takna sa pag-inusara
anaa siya maminaw

sa akong panghupaw
sa hinagubtob sa akong kahadlok
sa kabalaka nga wa gisaba
sa kasakit nga di masiyagit

anaa ang kahilom
andam mohatag
sa iyang tambag
sa higayong wa’y gahom
ang mga pulong

wa’y gilitok
apan daghang gisulti
wa’y gihatag
apan adunay nadawat

anaa siya maminaw
sa takna sa pag-inusara


-- GRATIAN PAUL R. TIDOR
Dipolog City,  Zambonga del Norte, Philippines

pagkalukapa sa pak-an nga diktadora


Gitawgan ko sa pak-ang’ diktadora
nga naglingkod sa garing nga inidoro.
Sa iyang trono, mibikangkang siya,
nanampiling sa kalaay. Gimando niya
nga mogama ko’g balak mahitungod
sa iyang kabubut-on
 
ug dayon ipatik sa iyahang mamords 
nga paa. Mibalibad ko,
ug iyang gilatos ang akong bugan
sa lunhaw nga bitin. “Tonto!
“Basin nakalimot ka kon kinsa
ang imong ka-storya?” Niluhod ko,
 
gakamang ngadto sa garing nga trono.
Gitulon nako ang salin sa akong garbo.
Nihalok sa mga kuko sa iyang tiil ngadto
sa tuhod. Ningisi siya, ug gituman nako
ang iyang gusto. Nagyamyam ko’g
mga pulong samtang gahubit ko

sa iyang paa. Apan nanghuy-ab siya,
ug nabara ang tinta. Nipadayon ko
pagyamyam samtang nagmanya
ang diktadora… hangtod giduka siya
dihang naamol ang tumoy
sa akong dagang. Samtang siya
 
gahagok, gipatik nako ang panupak
sa iyang galamhan. Gitilaan nako og
pinakatay ang mamords niyang paa hangtod
nalakra ang laway: “Taya kang’ pak-anga!
Nakalimot ka sa imong kaugalingon.
Ikaw ang akong musa. Pag-sure diha!”
 
Gitakla nako ang tulbok sa tuaw,
ug nangurog ang bus-ok nga unod.
Nagkisikisi ang iyang duha ka pako
hangtod nangaluno ang mga balhibo.
Sa pagkaigking sa pak-ang’ diktadora,
nilunop ang iyang garing nga trono
  
hangtod nasiak. Taliwala sa silaw
ug gabusay nga agwa, nipatim-aw
ang bangaw. Ug gikan sa lasangnong’
bulbol ngadto sa taluktok sa Parnaso,
namakwit ang liboan ka langgam,
nag-awit sa panaad sa kagawasan.


-- TON DAPOSALA
Cagayan de Oro City, Philippines

12.07.2015

ang sakto nga pagputos sa gasa alang sa imong kaaway


(Hinumdomi nga dili hinungdanon kon unsa ang gasa. Ang hinungdanon mao ang sakto nga pagputos niini.)

1.  Ayawg gamit og gunting pagtabas sa wrapper. Maoy gamita ang imong full-tang cocobolo handle Böker Bowie knife.


2.  Ayaw himoang kwadrado ang wrapper. Himoa kining irregular heptagon.

3.  Ayawg gamit og Scotch tape.  Maoy gamita ang Bostik all-purpose contact cement.

4.  Ayawg palit og human-daan nga gift box. Maoy gamita ang karton sa wala nimo masul-ob nga cognac Neil M. President oxford nga kanhiay pa nimong nadawat isip gasa gikan sa lain nimong kaaway.

5.  Ayawg gamit og ribbon nga recycled o kaha pinalit gikan sa aseras. Maoy gamita ang antique gold Midori double-faced satin ribbon.

6.  Sa pagbaligtos sa laso, pilia ang estilo nga bunny-ear style single ribbon flat bottom bow.

7.  Patya ang laso.


-- VICENTE VIVENCIO BANDILLO
Dhaka, Bangladesh

kay makat-onan ra ang pagtultol


Sukad sa katalagman nga mihugmak
sa among puloy-anan, wala na ko kaila
sa akong inahan-- usa na ka dakong tanghaga
nga galingkod tabok nako. Dili na nako maapsan
ang iyang panan-aw uban sa kanhi nga kalipay
gikan sa iyang dagway. Apan bisa’g tiaw-
tiawon ko sa kabudlay, magpadayon ko
sa paglaom nga unta moabot ra ang higayon
nga matultolan ang kinatumyan sa kahilom.


-- JONDY M. ARPILLEDA
Tandag City, Surigao del Sur, Philippines

12.05.2015

tigulang bako


ang mga tuig nga bug-at kaayong mitungtong
sa gabok niyang bukobuko
nakabawog sa kanhing tuyhad nga panglantaw
gilakaw ug gilakat niya siya sa ulodnong
linaktan nga ang matag aginod
sa matag lakang maoy hapo nga pangagho
ang luyang bikang biyaan sa kumpas ug hayon
sa nagdaling mga gutling
namathay ang mga ugat sa namalikhawng kutas
ug ang mga lapalapa nangubal na
sa kaguliyang sa mga abog sa kasinatian
mao kini ang iyang paglingla sa kamatayon
mao kini ang iyang pagkawili sa kinabuhi
naglakat nga nagduko nagtutok
sa tabunok yuta nga motabon
kay nagpangamay na ang kampanaryong bukog
ug siya wala mahadlok sa dupa sa mga bunbon
nga giukay sa namiyahok nga mga pilok
unsay iyang pangitaon?
kaniadto ang tinugkaran sa alak ug rosas
tuyhad kaayong lantawon sa unahan
kanus-a ang sanga naghangad pa sa langit
diin ang kawayan wala pa mangguod
ug karon siya naglakaw lapoy nga gikutas
nga nagpas-an ug naglukdo sa mga agup-op
sa mga kalendaryo sa nagsiglong katuigan
naglakat padulong sa nabalikong kahaponon
kaha nangita sa dili gayod hikit-an kay
wala masayod nga ang tuburan sa kabatan-on
dugay nang mihubas  ang inalisbo sa alak
ang alimyon sa rosas nanimbalagaw na didto
sa sumasalop nga adlawng bako


-- MELQUIADITO M. ALLEGO
Lake City, Florida, USA

ang tubag


Dili ko man masabtan
apan ang pagtando ug pagdumili
ining kinawat-kawat ko’ng pagbati
hagbay ra’ng miduyog sa matag higayon
nga kita gimino, gibaliko,
gisa-ag ining isla--
isla sa kagamay,
isla sa kamingaw,
isla nga nagyatak-yatak sa ato’ng binaling sapot
aron unta matultolan nato ang atong ulian.

Apan, dong, ni’ng atong pagkasaag
nakat-onan naman sa akong dughan
bisan ang dili pa nimo masabtan.


-- JIN D. GARCIANO
Camotes, Cebu, Philippines

12.03.2015

luib sa paglubad


nausob na baya usab dugay na
ang panahon sa atong panaghagwa

dili na ako ang alibangbang
sa imong pagkabuwak
dili na ako ang kahoy
sa imong pagkaaninipot
dili na ako ang tikarol sa imong
sanga nga bakhaw
dili na ako ang isda nga nag-inusara
sa imong lam-aw
dili na ako ang buwan diha
sa imong abli nga bintana
dili na ako ang lab-as nga hangin
sa imong lawak
kay kon wala ka 
dili ko na mabati ang kamingaw
ang atong iro
dili na mopaghot
ang imong iring
dili na usab momiyaw
sa dakong bangkete kita nag-iyahay
akong kanta akong sayaw
imong bitbit imong bugkos

wala na ang kaaslom sa mangga
diha sa ginamos nga mawos


-- RIC S. BASTASA
Katipunan, Zamboanga del Norte, Philippines

panagtagbo


Usa ka adlaw,
Sama sa mga butang nga dili ikalimod
sa akong kaugalingon, ikaw
Akong nakaplagan. Ang pagtulod kanako
Sa paglingiw ug paglikay
Usa ka pag-angkon nga ang tanang maanindot
Naa’y kaugalingong kinabuhi: ang pag-uyog
Sa unod sukad nakab-ot ang dyutay
Nga kalipay mahanaw ngadto sa
Kahaw-ang ug dakong paghandom.
Sa unay nga paglimod ug pakigbangi:
Kamatuoran ang kaabag
Sa pagsapwang sa akong pagkatawo.
Pak-an nga balaan ang hulagway
Sa huna-huna og damgo-- ang gitalikdan
Nga pagadumdumon sa kahugot
Ug kahilom nga sa makausa pa
Wala’y kasigurohan.


-- ADONIS R. ENRICUSO
Dumingag, Zamboanga del Sur, Philippines

12.01.2015

alang sa babayeng nagbarog daplin sa c.p.g. avenue


Di na kinahaglang ipabudlot
ang imong ngabil nga gipintalan
nimo'g teknikolor nga lipstik,
kun badlisag lapis imong kilay
ug bitayag aryos nga morag
pulseras sa kadako
ang duha nimo ka dunggan.
Labi nang way ayo nga nusnosag
uling imong mata
ug magkilo-kilo ka atubang
sa gamayng samin samtang
nagpangidhat nimo
ang miaging habalhabal drayber.
Samot nang wa'y nada
nga gihiklad ang liab
sa imong blaws aron masiplit
ang Avon nimong bra
ug gibunot nimo'g gigirik-girik
ang branyong smart pon
samtang nag-usap-usap ka'g
babulgam, nagngisi-ngisi'g
naglingi-lingi sa upaw
ug puyra gaba nimong uyab
nga Amerkanong gakango-kango.


-- NOEL P. TUAZON
 
Dauis, Bohol, Philippines

gibuhian, gihuptan


Didto sa balilihan unang nasinati nako ang kalipay sa paglupad. Asus, nagkiaykiay sa huyohoy ang akong tabanog nga pula! 
Nikusog ang hangin, ug giluagan nako ang paghawid sa hikot tugbang sa kataas sa akong kutas. Ug padayon ko kining gihawiran aron dili mahilayo bisan pa’g nanglanggos ang akong pagkupot. Apan gibira ug gidagit ra gihapon kini sa panganod hangtod nahidangat ra gihapon ko sa pagdawat: Naa’y mga butang nga angay buhian.
Naglawig ang panahon… Ganina sa balilihan, diha’y babaye nga nagpalupad og pula nga tabanog. Buot unta nakong isyagit ug ipamatuod kon unsa’y akoa! Nga ang akong ngalan napatik diha luyo sa papel!   
Apan wala na lang ko mitingog. Bisan pa’g nanghawid gihapon ang akong gikubal nga kamot, nangurog.


-- MAI SANTILLAN
Cagayan de Oro City, Philippines

Daghang salamat sa mga maniniyot nga gapaambit sa ilang mga hulagway sa Google ug Flickr.