sumpayi ayaw ang gabii

Husto na ni ayaw sumpayi ang kangitngit

Aron maputol ang patayng damgo

Mapusgay ang urom sa kagabhion.

Bisan di ka buot tumban ko

Ang atong mga tunob aron mabuni

Matambog sa bung-aw ang mga panghupaw.

                                                

Kalimtan ko ang lanog sa imong mga katawa

Aron maluwas ang kabuntagon sa paghikog

Bisan sa likod sa bumubuswak nga banagbanag.

-- ERNESTO D. LARIOSA

San Fernando, Cebu, Philippines

sa disyerto, kon ikaw giuhaw

Kon tuk-on ikaw sa kauhaw

Pangitaa ang ugat sa ugang yuta

Hunahunaa kini hikapa dayon  

Sa kusog mo uyoga

Pamasin makatultol kon hain

Ang tinubdan nga buhi

Kon dili mga mata mo kipat-kipata

Hangad sa tiyan sa inahanong langit.

Kon sa kapulihay bakante ang panganod

Kay wa makausap og dag-om

Damgoha na lang ang mga lusok sa ulan

Mosawom sa ilawom sa imong kasingkasing

Aron diha sa imong pagbati motuhop

Ang hangin sa kabugnaw

Ug ikaw nianang tubig motamihid.

-- ERNESTO D. LARIOSA

San Fernando, Cebu, Philippines

pagbangotan alang sa himatyong lungsod

Gidawat ko paglugos ang paghunob sa Adlaw

Dihang mga pungpong sa iyang silaw miatbog,

Minglapos sa akong sementong bungbong,

Minglusot sa mga pultaha’g bentana

Nga gipanak-opan sa kahadlok:

Sa kasaysayan sa trahedya sa abog

Usa ka sugilanon sa gihakgom nga katol

Nga gipanabwag sa ilang mga kuko

Nangawras sa hapin sa among kalag!

Diin ang kaisog sa pagsukol giubo-ubo,

Nag-udhak nga bugnawng pangaliya na lamang

Nga unta ang duhang gamot sa pamintaha 

Mangaluya ilawom sa yuta taliwa sa pagsibaw

Sa mangtas nga tingog sa makina nga nagdahunog--

Naglanog sa umaabot nga kataposang

Paghagtos sa among lunhawng hangin.

-- ERNESTO D. LARIOSA

San Fernando, Cebu, Philippines

sa di pa ka motunob sa dalan

Pangitaa una ang imong mga tiil

Nga di magkalayo ang matag usa.

Hapuhapa may kubal na bang miturok

Nga makapulpog sa gagmayng mga bato

Nga namukhad sa ilang hitsura sa dalan.

Kay bisan ikaw magsapatos molapos

Nga di dahumon ang tunok nga nag-atang 

Sa imong mga tunob bisan di tuyuon

Nga ikaw unta molikay sa paglakang.

Ta na, taudtaod na kang nangandam 

Sa paglakaw samtang namati ka kanako.

Sa imong kilid ako’y mag-ihap sa mga tunok

Nga mangabanggi sa imong kalig-on!

-- ERNESTO D. LARIOSA

San Fernando, Cebu, Philippines

mga lakang sa apo ko

(kang Sean)

Gagmay ang iyang mga lakang

Apan iyang mga tunob nabulit

Sa pangandoy sa pagkaplag sa nahanaw

Uban sa anino niyang naglakaw-lakaw

Nga sama niya may mga mata

Diin mihana na pag-ambak ang luha. 

Apan napugngan dihang duwaan

Nakit-ang nagpahipi sa ngilit sa hawanan. 

Gipislit dayon niya ang naandan;

Kalit ang awto-awto kusog midagan

Apan naapsan sa minglupad

Nga lanog sa pino niyang mga katawa.

-- ERNESTO D. LARIOSA

San Fernando, Cebu, Philippines

alindasay

Buot kong dad-on karon sa akong mga tiil--

Lakangon ang gilay-on ngadto sa gitindogan mo.

Buot kong hipuson sa akong mga palad ang hangin

Nga tuboran sa kinabuhi nga imong giginhawa

Dayon tidlumon ang misteryo sa imong pahiyom.

Wa na kapugngi nagyawyaw ako karon

Atubangan sa kangitngit sa nagbukal nga kagabhion.

Buot kong puhagon ang gilubgan sa mga bituon;

Buot ko ganing gub-on ang bungbong sa langit

Sa kalagot nga di ko ikaw gayod makab-ot.

Kay samtang nasampungan ang dalan padulong nimo

Ako gitamparos sa panghayhay, nasukamod sa itom

Nga agos sa panghupaw nga mihunob sa dakong lim-aw

Aron lumsan ang kabalaw nga midakop ning dughan.


-- ERNESTO D. LARIOSA                                                                                                                       San Fernando, Cebu, Philippines

pag-inusara

Di madutla'g paak ang panit sa pag-inusara

Kay aninong naghukdong nanikma sa akong kilid

Nakadungog ko'g hingos-hingos pasiunang pangabli

Sa minatay sa nahimugso nga kamingaw.

Kamaayong atsahon ang gilubgan nga kahilom

Aron motuasik mosinggit ang tungang gabii

Kay way nagtikawtikaw nga mga tiil sa paghandom

Motunob-tunob ta sa labyog ning orasan sa bungbong.

Ang gisugat hinuon ning akong pag-ubog sa gabii

Mga blangkong mata sa mga bituong laya na

Nga may kalimutaw nanaggsukdip nagtutok kanako.

Miminatay pagsamot ang halawom nga kamingaw.

-- ERNESTO D. LARIOSA                                                                                                                    San Fernando, Cebu, Philippines

ang babaye nga nag-shorts sa hunasan

Sa sinugdanan mga mata ko misuroy sa kapunawpunawan

Way kahulogang nasikpaw mingpatighug sa nag-urong nga dagat

Panagwayng asul kalapad daw ang gidak-on sa akong kahinam

Pag-ubog sa garay sa iyang tubig nga gipugngan sa unahan.

Inihap sa hangin mingkawas ang rima sa akong mga lakang

Subay ning gamayng dalan-dalan nga namidpid sa kabuntagon.

Miawit ang kabugnaw nga nanuhot-suhot sa ugat sa huyuhoy

Nga mihapuhap sa akong tingkoy sa akong ilong mipauraray.

Kadaghan nga nakauna nako dinhi ning buntag sa banika

Mga kanding nanibsib na sa mga dahon sa nagkurog nga sagbot

Umog pang mga yamog nagdahinggay sa ilang mga ngabil

Mga piso namiyagak nanaglutos sa himungaang nagdali

Mibalingis luyo sa libon kaha may mga pagkaon sa kinabuhi.

Mihunong ko sa kilid sa pangpang nga nag-um-om sa kamingaw

Apan kalit may mitamla mibuak sa namangpang nga kahilom

Ako karong nakita ang babaye nga nag-shorts naglakaw-lakaw

Kauburon sa paa kaugdo sa sampot may ritmo iyang mga lakang

Mga tiil daw gisapwang sa mga lim-aw nga iyang gipanumban

Kalalik sa iyang lawas nimpa siya nga mitungha sa hunasan.

 Iyang blouse nagyapayapa hangin nanguot sa hamis nga hawan

Milagdas ang lison nga hawak mibawod dihang siya mitikubo

Nanghinol og mga kinhasong nanagkibotkibot sa iyang palad

Mga sihi buwan-buwan daro-daro litob ningbaiid sa iyang tudlo

Gikumot niya gibalibag sa halayo gisawo sa napugwat nga dagat.

Mitindog milingi-lingi kahawan sa hunasan sa iyang atubangan

Akong kahinam nakutaw dihang blawos sa tubig mitimpasaw

Sa hinayhinay mihinol-hinol pa sa kilid gipugnit ang ulo sa

Dawo nga zipper nanilap sa panit kalit minganga nahaplot, ayay!

Miuntol akong kalimutaw di makatuo sa ako karong nalantaw

Daklit ra bang miatubang duha ka bugon misanting sa hangin

Di kapugngan sila minghakop misanaw sa akong panan-aw

Manulonda siyang nagduas langit nga naghukas sa kabuntagon.

Gigugod sa huyuhoy kay siya midagan ngadto sa ngilit sa lawod

Kalami tang gukdon ug hakpon gupukon sa akong mga bukton

'Pan takulahaw siyang nahapla gibunlot sa mga balod nga gutom

Kalit kong nasagmuyo kay kawhat ning handurawan napakgang.

Ang pangpang migimok may Adan miguho way sapot nagdagan

Ang dagat mibukal buot motabon sa duha karon nga nagtapot

Bisan layo nabati kong agulo sa daghong sa napuwak nga buwak

Nag-igot-igot gud ang tubig nagpanglugti daw pangpang nabuak!

Mihangad ko’g balik, sa unahan nahunlak ang kapunawpunawan.

-- ERNESTO D. LARIOSA                                                                                                                   San Fernando, Cebu, Philippines

ang tigsilot

Sa iyang pag-abot nag-um-om siya’g banag-banag.

Wa’y nagtuo makalakaw siya sa alimpuo sa buntag.

Gipanghabas niya ang mga tunukong kangitngit.

Minglipang sa kilid ug taliwa sa kinabuhi

Ug nanagan ang ilang mga anino sa kalisang.

Kinsa’y di mahadlok sa lana sa iyang pinuti

Kon ungo mo nga nangabat luyo sa kalibunan?

Dagan na lang aron di matabas sa iyang pagtigbas.

Mga rayos sa Adlaw nanurok sa iyang bukton.

Kon siya mohuyad, manglugwang kuko sa kalayo;

Kawrason mo gikan sa inyong tiil ngadto sa ulo.

Kuto mangalisbo; mangangtod inyong pagkatawo.

Kay manunuyop mo’g mga tapol nga huyuhoy

Dugay namong gidid-an niini sa iyang tingog.

Apan katunggan inyong gitaak lang-og gihigop.

Di ra ba gayud mahimong hangin sa inyong tiyan

Kay inagos sa aso nga gipangutot sa mga maligno.

Atngi ang hapos sa latigo sa panghimaraot ug tunglo.

-- ERNESTO D. LARIOSA                                                                                                                     San Fernando, Cebu, Philippines

pasalipod ko sa kagabhion

Kalit kong nawala sa imong panan-aw

Dihang mipasalipod ako sa kagabhion

Gikawhat kong kangitngit aron mohabol kanako.

Migukod ka kay di ka buot mopahilayo

Hangtod nasakpan mo ako ug gisapupo

Apan nakalugnot ko sa lang-og mong gakos

Ug midagan tadlas ngadto sa halayong wanang.

Paghangad ko pa mibad-as ang kasanag sa langit

Kamot sa kabuntagon mikaw-it kanako

Sa dakong kahimatngon sa imong kabanyaga!

-- ERNESTO D. LARIOSA                                                                                                                   San Fernando, Cebu, Philippines

sangpit

May lawom nga tingog nga misangpit

Gikan sa baba sa mingawng kagabhion

Apan wa ko’y nakita gawas sa nanayawng

Mga dahon sa karaang kaymito.

May lawom nga tingog ako na sad nadungog

Sa pagbalik ko sa paghigda

Gibuksan ko ang kinadak-an kong panungog.

Akong nabati ang daghong sa hangin

Nga namidpid sa akong inablihang bentana

Dayon gisakgaw sa kamot sa kahilom.

Tilimad-on kini nga may moduaw kanako

Tawo o espiritu ako kining abi-abihon

Palingkuron o kaha pahigdaon tupad nako

Aron makabati sa kaalangisig

Sa hagok sa nahimugso kong damgo!

-- ERNESTO D. LARIOSA                                                                                                                   San Fernando, Cebu, Philippines

babag

May anino karon nga nagbuntaog

Lawas ba sa tawo o punoan ba sa kahoy

Milihok ni sa akong paglakang

Bagtas sa dalan sa kagabhion.

Takulahaw di na mapiog sa akong lawas

Mga tiil ko di na mabaswat

Kamot sa kaluya migunit sa kakapoy

Napugngan ang akong mga tunob.

Nagbuntaog nga anino wa na nako makita

Usa diay ka pangpang sa magahi nga bato

Sa iyang dughan ang hangin sa kinutoban

Apan ang gininhawa sa kamatuoran

Usa man ka gantuong sa usa ka pagtuo:

Way ilhon ang damgo bisan ang kakapoy

Andam kini motuyhakaw aron molupad

Bisan kon mokapakapa pa ang kataposan.

-- ERNESTO D. LARIOSA                                                                                                                   San Fernando, Cebu, Philippines

basahon mo, paklion ko

Sa nawong sa mahamis nga patag sa yuta

Ang mga dahon sa basahon mo nanighaya na

Nagbukhad sa tinaguang giyamyam sa mga pulong

Sa kahiubos ug pagmahay niadtong panahon

Diin kamo wa’y tuyo untang nagkahibalag.

Apan di na ang buot kong basahon kanimo karon

Paklion ko pa ang imong mga panid

Nga wa palabyog sa huyop sa akong hangin

Hiramon sa akong mga tudlo ang lain pang mga letra

Nga motug-an bisan pitik lang sa kahulogan

Sa imong pagpadayon sa paghilak

Bisan dugay nang mituang ang mga ulan

Ug nangalarag ang mga salingsing sa kapakyasan!

-- ERNESTO D. LARIOSA                                                                                                                  San Fernando, Cebu, Philippines

tuyhakaw

Mga mata ko gipanumban mo sa yuta

Mituasik lagi ang mga aninipot

Didto sa nawong sa itom nga dag-om

Di pa mahugpong baya ang kahayag

Nga naninguha karon nga di mapawong

Samtang may talinggab pang tumoy

Sa damgo ko sa pagpakabuhi.

Gukdon man nako o di ang katumanan

Dakong buhi lang gihapon ang pamasinbasin

Nagahigda lang ko naggakos sa paglaom

Nga nagpitokpitok pa nagtutok sa litik

Nga nagtikungkong sa akong tudlo

Nga sarang ba makapaligtiw sa balhibo ko

Aron motugpa didto sa lapad nga dughan

Sa bungtod nga buot mo sad latason.

-- ERNESTO D. LARIOSA                                                                                                                     San Fernando, Cebu, Philippines

tabi, mouna ko nimo

Higayon na sa pagpaniid ko kanimo.

Nahiugbok ka sa tampi sa agianan

Ning higayon sa atong paggikan.

Sa tubig naghuwat nang sakyanan sa dagat,

Gituya-tuya gilamba-lamba sa dagkong mga balod.

Milingi ka kanako, ang imong hitsura

May gisuwat nga itom nga kabalaka.

Mihangad ka sa langit; gikuyawan ka sa dag-om

Nga mihana sa pagkabayo sa abaga sa bukid.

Mga tiil mo nanghugot sa buko-buko sa bato,

Mikupot sahi sa kahadlok, nanggunit sa imong dughan.

Sayod ko ang kahuyang sad nanuhotsuhot kanimo

Sa paglatas sa lawod nakapakurog sa tuhod mo

Kay hangtod karon gibugkos pa ka sa katalaw.

Tabi, mouna ko nimo kay gibunlot na ko sa kahinam

Sa paglawig tumong didto sa akong padulngan.

Akoy tawo nga ang bag-ang mousap og katalagman.

-- ERNESTO D. LARIOSA                                                                                                                    San Fernando, Cebu, Philippines

sa akong paglangoy

Mibukal ang hilumong dagat sa akong pag-ambak

Ang malinawong tubig nalusno sa akong kabug-at

Sa hugot nga pagkapay-kapay sa akong mga bukton

Kusog milabyog-labyog ang kamot sa mga gutling

Sa akong pagtindak-tindak sa duha ko ka mga tiil

Daling namatid-patid sad ang bagtak sa mga gutlo.

Sa kusog nga paghanoy sa akong lawas sa unahan

Usa ka panahon ang miampad sa akong paglangoy

'Pan sa paghangad ko pa sa asulong nawong sa langit

Ako naapsan sa Adlaw sa dagko niyang mga lakang

Daw buot mopahilayo tadlas ning puting baybayon

Di man unta siya makab-ot sa akong mga damgo

Bisan sa mga sablig sa kusganon kong mga balod!

-- ERNESTO D. LARIOSA                                                                                                                  San Fernando, Cebu, Philippines

awhag sa gugma nga di mahadlok sa linog

Gunit nako paghugot, ayaw kahadlok.
Gitug-an ko na nimo ang akong tinagoan,
Sa sinugdanan pa wa koy gilimod.
Bisan ang tunob sa akong kasingkasing
Akong gipaihap nimo makadaghan
Aron imong madungog ang linugan-ob
Sa gugma kong di mahadlok sa linog.
Gani nahiram mo ang tugot sa akong mga damgo
Kay ako mang gipalagdas sa imong kiliran
Aron imong mahimamat ang dahunog
Sa akong kadaogan ug kapakyasan.
Wa koy gililong sa mga kahulogan
Akong nasabtan sa basahon sa kinaiyahan
Labi na sa mga kabuntagon nga mosiak
Sa mga eklipse nga motabon sa buwan
Nahibawo ka gyod nga dungan tang
Mobahakhak ingon man sa paghilak
Sa higayon mopatim-aw ang dag-om,
Inig panalingsing sa mga ulan
Nga mobunok taliwa sa atong paglakaw.

-- ERNESTO D. LARIOSA

San Fernando, Cebu, Philippines

pikas nga buwan sa tibuok langit

May mga pughawng luta sa timaan nga nasangit
Sa ngilit sa imong pahiyom.
Buot kang sa akong kamot mohawok
Aron hanggapon ang kahumot sa akong buhok
Apan nangupot ang kataha.
Akong nakita hinayhinayng migapos sa gaway
Sa kagawasang nagpanglugnot sa kabalaw.
Karong gabhiona ikaw na sad mitalaw
Kay igo lang kang mitutok sa pikas nga buwan—
Suwab sa sanggot nga buot mosipsip sa panganod
Inaghat sa daob nga misiga sa atong panagtupad.
Gihinayhinay ko pagpunit ang imong mga tudlo.
Gihakop ko pagkalit ang namugnaw mong kamot.
Nabati kong tibuok langit mikurog sa imong dughan.
Mipiyong sad ko kay sa akong pilok mikupokupo
Ang pikas nga dan-ag sa nagtutok nga buwan.


-- ERNESTO D. LARIOSA

San Fernando, Cebu, Philippines