sulot

Nag-umol ko’g lapok aron mahimong bato

apan wala’y mituo kay lagi dili kuno mahitabo.

Mitug-an ko, ug gipakita ang pamaagi. 
Miturok
ang pak-an ug gilamoy ang gimugna kong mutya.

Lakip ang akong katungod buot iyang angkonon.

Ay, mga bulawan nga migitib sa kalapokan…

Gilamoy na bisan ang buwan! Wala’y gibilin

nga kahayag ang bakunawang wala’y batasan!

-- JESSELITO B. BARING                                                                                                                         Cebu City, Philippines

tinagsip

Buot mosuki ang bulan sa pagpanghilabot sa adlaw
Nga bisan unta sa gamayng dan-ag man lang,
Tugotan kini sa pag-iwag sa kagabhion
Aron santaon ang bagutbot sa kabitoonan.
Gigil-asan na ang dagat sa pagpunay og kana-as.
Dili ta paaboton nga mokagiw ang mga lumod
Sa wala nay pagbalik.


-- JESSELITO V. BARING
Cebu City, Philippines

katol-katol

Gibati ko nga dunay mga pagpanuslok,
Diha sa hapin ang kakatol og kagilok,
Hiyod-hiyod ang lawas dayong sakyod sa kigol,
Nanggimok ang buko-buko ug sa kanto gipat-ol.

Diha sa pag-inusara kanunayng siyang ikauban,
Bisan diha sa kahinanok mangablit og taman,
Siaw sa higayong wala kay lingaw,
Subayon ang mga gingi-gingi sa kamingaw.

Di lalim kon kini motidlom sa alimpatakan,
Mopapas sa nalista nang kinaadman.
Ug sa panahon haw-ason na sa nahimutangan,
Kawot na lang sa bagol-bagol ang sangpotan.


-- JESSELITO V. BARING
Cebu City, Philippines

mathematics sa kalibotan

Galambod na ang antenna ning alimpatakan
Kay gahiyod-hiyod ang tanghaga sa kalibotan
Giugbokan og pinakurat nga poste sa agianan,
Giduyogan sa nikaging nga panumdoman,

Unsaon kaha nako pag-ihap ang mga bitoon.
Mogimaw lang tingali ang tanan
Kon hawan ang akong handurawan.
Gamay’ng dag-om sa pagbati
Mawala dayon ang mga kidlap sa kinabuhi.

Pun-an ang usa ug usa, mahimong usa.
Masulbad lang sa equation ni bathala,
Ang formula napatik na sa mga dughan,
Daogon na lang sa diskarte sa hingtungdan.


-- JESSELITO V. BARING

Cebu City, Philippines

alimpos

Naglayog ang mga panganod.
Mikisdom ang iyang dagway.
Bangaanay sa kabugnaw sa dughan
Midilaab og kapungot sa balatian.

Nagkasaagsaag ang bukton sa kilat,
Gisuhid ang nag-ugang pagbati,
Gibayaw ang lilo gikan sa yuta sa kasakit,
Walay kahumanang pagliyoliyo sa kinabuhi,
Usahay dimano, sa kalit modisilya,
Apan diha sa tunga-tunga
Anaa ang kalinaw’g gipangita.


-- JESSELITO V. BARING
Cebu City, Philippines

golf ni noy

Mga bangag nga abtanan sa pangandoy,
Alirongan sa binuklad nga banig sa himaya,
Kanunayng gaihap sa mga lakang--
Labing gamay maoy dako.

Kuhit aserawng gisumpay sa mga bukton,
Lisoon ang lawas mopatim-aw ang alimpos,
Sikaran ang yuta, labtikan ang panganod.
Magkita sa hawan kon di masaag sa kakognan.

Bisan pa’g padu’ng sa pagkamuta,
Hingkit-an gihapon ang luha.
Apan ayaw lang gyod dagpasa
Kay basig ma-hole-in-one sa mata.

-- JESSELITO V. BARING

Cebu City, Philippines

kagaw

Nadungog nga gipanamkon sa engkanto.
Gatosan kasapaw nga bildo ang himan
Para mopatim-aw lang ang agtang.

Nahadiin-diin lang ang nahimutangan.
Bisag sa dulom ug aslom nga ginhoan
Nagpasanay sa iyang kaliwat ikogan.

Wala hisabti ang iyang tuyo pagpakabuhi.
Usahay maghasi sa iyang gisak-an
Ginamit ang tinunglo niyang kaliwat.

Iyang pong gibuhi ang kinabuhi.
Tagodtagorod ang lawog para himpuslan,
Bugtian og kamatayon
Sa di pa mabanhaw ug molipang.


-- JESSELITO V. BARING
Cebu City, Philippines

ganahang mobalak

Bisa’g haw-ang kining alimpatakan
Gipangita nako ang mga hulagway
Nga gitagoan sa negatibo ning kalimotaw.

Sa baba ang pukot sa pulong
Nagaid sa laway sa kalimot.
Di makaikyas bisan kon iwarawara
Diha sa tanang suok sa alingagngag.

Nagamit na nako ang tanang pamaagi.
Naiknat na ang kilay abot sa dunggan.
Sirko balintong basin mahuho apan
Ang gipangitang tinagoan
Wala lang gihapon.

Moabot tingali ni kon dili tuyoon
Sama niining balak karon.


-- JESSELITO V. BARING
Cebu City, Philippines

sapa sa mahiga

Nilisngag ang akong ilong
Dihang nilabay kos taytayan.
Nahanggap ko ang hangin
Sa gipanuhot nga sapa sa Mahiga.

Nananglangoy ang tinupsan.
Milugdang ang mga gapnod
Nga gipanamkon sa batikon.
Alisngaw nga walay kahayag

Asa na man ang anninipot
Nga mahiligon kaayong mosalom
Sa nagkidlap-kidlap nga buhagay?

Nikagiw na ang mga halwan.
Dili na maagwanta ang abuso.
Ang ikog mibalhin na agtang,
Kapay nitidlom sa iyang tiyan.


-- JESSELITO V. BARING
Cebu City, Philippines

pag-abot sa panahon

Nibantok kay nagpunsisok sa tinagoang ugat.
Nag-alindasay ug nagkiaykiay ang panganod.
Walay pupamilok ang bulan sa adlaw.
Milugnot ang hangin sa iyang pagkabaliktos.

Nagpangita og kahupayan sa kaalimuot.
Nagbagang mga alibangbang naalibwag.
Alimatok nanglayat gikan sa katunggan.
Huyong-huyong nga gilangyan sa mga pantat.

Nanglingkang ang mga kuyamoy sa utitod
Nga nag-alsag dakong bagal sa kamay.
Tilapan sa mga nag-atang nga hinanib
Katagbawang hilabihan, maangkon sa tanan.

Bisag mga gamhanan moabot ang kataposan
Idul-it man ang langit, molingiw sa yuta.
Dili makabati sa hunghong sa kalanggaman,
Bidlisiw sa adlaw nahimong rehas sa kaugalingon.


-- JESSELITO V. BARING
Cebu City, Philippines

gigama ka lang

Misuyop ang hangin og usa ka tarong tubig,
Mihakop og nagbagang lapok nga sinalang yelo.
Gitisok kini sa haw-ang nga dughan,
Aron mabati ang linabtik sa kawayan.

Gipungpong sa langit ang adlaw, buwan og bitoon,
Ug diha sa dagway may siga nga mokidlap o moawop,
Gidan-agan ang agi-anan sa tanang higayon
Aron dili madagma ang latagawng himaya.


-- JESSELITO V. BARING
Cebu City, Philippines

ayaw hikawi

Nagngisi ang bakunawa nga nitangag sa paraiso,
Dala ang tubig nga maoy sukaranan sa bangaw.
Gibuyokan ang tuna-an sa lapok nga gikalisangan,
Bisan ang kabaw ni Noy Patricio di na molunang.

Nagkasumpaki si Huyohoy og si Huros
Dihang nagtakos si Taligsik og Bunok
Kay dili magpapiri si Kilum-kilom ni Kangitngit,
Nakahukom hinuon si Buhawi-- wiktan silang tanan.

Mibakho ang yuta kay siya gipakaon og tubli.
Nagkapandol-pandol ang wati sa tibugol nga giali.
Nibalitok ang gamot kay ang unahan di mabangbang,
Hulat na lang kon kanus-a ang dakong kahoy hikabsan.

Ablihi ra gud ang dughan sa langit ug sud-onga ang gasa.
Kablita ang gusok sa panganod para motimbakuwas ang ulan.
Haranahi ang buwan, ug ang pahiyom mosanag sa aping lamurok.
Kamaya ang adlaw, ug maglumpayat ang gihay sa kalipay.


-- JESSELITO V. BARING
Cebu City, Philippines