pagpaabot

Nangurog ang akong kamot nga giiwagan

Sa pikas nga Buwan samtang gihapyod-hapyod

Ang nangagkot nga buhok ni Nanay.

Giatangan namo ang imong pamayhon

Nga magdali pagsaka sa hagdan.

Gihandom nga madungog ang dahunog

Sa de kahon mong motorsiklo

Sama sa otso kabalyos nga Robin.

Kay gusto na namong mahanggap

Ang kahumot sa dugo

Sa tulingan nga giputos sa selopen.

Apan, wala… wala ka pa.

Gisulog-sulog na hinuon kami

Sa nagbilar nga mga gangis kay sa langit

Wala magpatim-aw ang North Star

Ug nagpaabot sa lapyahan

Ang Seven Star.

Hangtod gipadpad ang kahinam

Dihang ang among mga dalunggan

Gikulitog sa mensahe nga gitangag

Sa bugnawng hangin.

Ayaw kamo'g kabalaka--

Nahutdan lang ko'g gasolina.

-- ELEAZAR T. ACAMPADO

San Jose del Monte City, Bulacan, Philippines

kon naminaw

Kon naminaw ka, di na matugaw

Sa bagting sa kampana sa ting-adlaw.

Kon naminaw ka, di na mangapkap

Ang mga kamot sa barandilya

Sa simbahan ni Sr. San Juan Bautista.

Kon naminaw ka, di na magapos

Sa kahilom ang mga katawa

Ni mohupas ang pilit-pilit nga katam-is

Sa mga halok ko sa hangin.

Busa, ayaw kog basola nga mitikig

Ug mitagok ang akong laway

Sa gabii nga nag-uwang ang mga iro.

Usa ikaw ka yamog nga nagdali

Nga mohalok sa yuta.

Kon mosulti ang mga amorsiko, maangu-ango

Kay dili malilong nga imong gibalian

Sa tunok ang kagingking sa kawayan

Dihang imong gipadausdosan.

Ug karon bisan maliso ang buko sa kawayan,

Hingpit ka nang dili maminaw

Sa hilom nga bakho sa akong kahiladman

Sa pagkaabo sa imong dalunggan.

-- ELEAZAR T. ACAMPADO

San Jose del Monte City, Bulacan, Philippines

alas nuybe kilid sa plaza fair

Kon hinay ug bugnaw ang akong pagpikpik

Sa sampot sa batang nagtikungkong sa karton,

Kusog ang pagpiyak sa bata nga gikugos

Sa inahan. Tingali way nasuyop nga dugos

Sa namiyahok nga tinubdan.

Ang luha niini midagayday daw ininit

Tubig nga nag-aso-aso sa akong dughan.

Kon mahimo ko pa lang ibukhad

Ang ilang palad, ipunting ko sa duha ka kamot

Sa inahan nga nagkuniskunis

Sa mibagtok nga pandesal.

Apan unsay maako kon maabtan sa higayon

Nga wala nay bili ang pagkaon

Kay nabahaw ang kagutom?

-- ELEAZAR T. ACAMPADO

San Jose del Monte City, Bulacan, Philippines

paghupas

Bisan wala makita, madungog nako

Ang hagyong sa imong taas 

Nga kamot, nagpangab-ot

Sa puti kong buhok.

Miabot na ang imong gikahadlokan—

Dili ko na malingi ang akong anino

Nga imong gisapwang.

Dili ko na usab malitok

Ang imong bansagon.

Nabaligtos na ang dila

Sa mitagok nga laway.

Pugngi nga dili mahulog ug dulaan

Sa hangin ang imong mga luha.

Kay bisan magbaha ang imong bakho

Sa hangin ug ianod kining sungkod

Dili na kapugngan 

Ang akong pagtikang...

(Karon pa nga mihunob na

Ang paminhod sa lapalapa.)

Ang gihatag mong apdo sa baka,

Sili, suka, asin, ug asukal

Akong igasa sa bag-o kong mahigala.

Apan karon tilokon ta una

Ang lantong sa atong kasadya.

-- ELEAZAR T. ACAMPADO

San Jose del Monte City, Bulacan, Philippines

tilimad-on

Kon sa imong pagpauli, nanglingabngab

Ang mga gangis ug wala motagbo

Ang sinilihang mga pulong-- Diin ka na 

Usab gikan? Maayo ka nakainom og sabaw 

Sa pasaw! Kami hangin ra!-- ug wala na 

Mobagting ang ebanghelyo sa bata,

Paghubog ug paglipay

Kay bulahan ka.

Natulog na ang asawa nga maglamoy og sili 

Samtang maghangad sa buwan. Ug miuk-ok na 

Ang dila sa napagaw nga bata.

-- ELEAZAR T. ACAMPADO

San Jose del Monte City, Bulacan, Philippines

pagsaylo

Alang kanako sama katulin ni Ruping
Ang dagan sa Dory. Misaylo god ka
Sa gilubngan sa imong inunlan ug miabot
Sa dakbayan diin dili na mabati
Ang bagting sa kampana.

Miliwas na ang pista sa Jagna. Naglaba
Na gani si Nanay sa imong labhonon
Samtang naglitanya sa imong bansagon
Nagpangita hain gipadpad
Ang imong mga katawa.

Kon ibatbat ang dapit naabtan, ihunghong
Sa Habagat. Apan ayaw sultii
Si Nanay nga di ka na makamao moayo
Og kompyuter kay basin mangliki
Ang dughan nga naughan
Sa kataposang tinulo sa gatas bisan
Padayon ang ulan sa Bitaugan.


-- ELEAZAR T. ACAMPADO
Manila, Philippines

pangandam

(sa inahang mananawom og sensilyo)

gihulog na ang imong paglaom.
nagtuali-tualing mitidlom.

puyde mo nang hanggapon ug tigomon
ang asupreng hangin sa namiyahok mong
baga. o palahuson bas kinatumyan
sa lilo sa imong dughan

sa imong pagsawom, seguroang dili mapiskan
sa kapehong tubig-dagat
ug madugangan ang kaparat
sa nabulad niyang lawas.

apan unsay bili sa pagsawom
sa nagkidlap-kidlap nga mga bituon
kon sa pagtunga mikubol na
ang lapalapa.


-- ELEAZAR T. ACAMPADO
Manila, Philippines