face reveal

Karon, labi na karon. 

Ang mga pahina, 

mga post, ug mga share 

nangalisbo 

sa giangsong mga asoy 

kabahin nimo; nanalidhay 

sa mga tamla nianang 

imong hulagway: 

mangingilad, 

tikasan, 

scammer. Ikaw kini 

alang kanila. Ug alang kanila, 

angayan lang nga 

huboan ka, lud-an, 

ihian, posasan, 

ilansang sa kinailadman, 

ilawog sa mga… Apan, 

bisan pa man. 

Dinhi sa inyong 

panimalay, ikaw 

ang manghod. Ang imong 

mga maguwang gaalirong nimo, 

gatagulhos. Ang imong 

manoy gapainom nimo og 

tambal. Gaam-am. Ang usa ka 

manang gahikay sa imong 

pamahaw. Ang sunod gabangan 

sa giandam nga pyansa human 

siya niluhod, 

nihawok sa mga tiil sa iyang 

banang maot. Ang usa gaihap 

sa gibaligya niyang bonus 

aron ipuno sa kuwang. Taliwala 

o, taliwala 

niining tanan, gikan sa kalaksot 

ngadto sa kangiob ug lain pang 

kangiob, ang nagkagidlay nga 

gakos. Ang wala’y uwaw nga 

pagpangga. Dili matarog. 

Dili molimod. 

Salbahis 

sama sa katam-is. 

-- CORAZON M. ALMERINO 

Ontario, California, USA

antiyohos

Sul-oba 

bisan lugak, 

bisan hugot. Bisan 

sakit sa buot. 

Dinhi sa iyang mga lente 

ang yamog gahinapos 

sa iyang ikid nianang 

kinatumyang pangpang 

sa dahon. 

Gapaluyo nianang panon 

sa mga hulmigas nga 

gabitbit og mga mumho 

ang gatakoban nga taas 

og dila, naniid, 

nanukad. 

Wala’y kalainan kini nianang 

aninong baba nga gahunghong 

og katunga sa matuod aron 

tuhoan ang liboang huyohoy 

sa bakak. 

Sul-oba kining mata 

sa mga mata. Kuwidaw 

sa kasanag, sa tanang 

kasayon. Basin sa dili 

halayo, kilid nianang 

landong sa kahoy mogimaw 

ang gibitay, 

ginana, giulod nga mga tiil— 

gitabyog padulong 

sa nahabiling sagang, 

sa gahinapos 

nga singgit. 

-- CORAZON M. ALMERINO 

Ontario, California, USA

puslan man

Ania, sugdi. Ablihi 

ang mga bintana. Sa unahan 

ang bungtod gapandong og 

takna nga gabaktas ngadto 

sa pagsawop, usahay 

manghilam-os og 

mga taligsik. Karon ug ugma sama 

kagahapon, walay 

nausab. Wala kini niirog. 

Wala kini 

napulpog bisan 

gilatos sa ikog 

sa hanging mangtas, bisan. 

Busa, ihikyad lakip 

sa inun-unang Anduhaw 

ug mais kan-on sa imong 

sartin ang Eu Sei Que Vou Te Amar 

ni de Moraes. Hagpati og 

mga bukog. Kumot-kumota, 

hulmaha saksak-sinagol 

ang imong panihapon. 

Bisan kon gidunlan ka 

sa tanang dili makab-ot, sa dili 

moabot, subad gihapon. 

Ang imong karon 

ug ugma sama 

kagahapon. 

Liyok nga hangtod. 

Busa, habhab 

sa kahapdos. 

Habhab 

sa angtod. 

Sugdi karon. 

Suwayi. 

Aron. 

-- CORAZON M. ALMERINO 

Ontario, California, USA

golgotha

Nga imo usab kining 

pas-anon, iluom hangtod 

sa kataposan nimong 

pulong—dili kini 

ang akong giampo. 

Nga imong hinginlan 

ang mga demonyo sulod- 

gawas kanako, o kaha, 

sama sa imong amahan, 

tungaon ang dagat aron 

mosibat ngadto, bisan asa 

nga halayo—nasayod ikaw 

nga dili ko kini ihangyo. 

Pasagdi ang mga tunok 

sa akong ulo. Pasagdi 

ang mga lansang nga ninglaksi 

sa akong kaunoran. Pasagdi 

ang tingal sa apdo ug tuba 

nga pan-os. 

O, Kristo sa tibuok kong 

kahuyang, igo na alang kanako 

ang dalikyat sa gahanap nimong 

panan-aw. 

Basin ugma damlag, 

bisan samdan, 

ang akong kasingkasing 

bus-ok gihapon sama 

sa mga biyuos. Ug bisan 

dili balaan sama sa uban, 

basin usab ang akong kalag 

baskog bisan kon nadugmok 

ang iyang mga bukog. Mobangon 

gikan sa tanang kamatayon. 

 -- CORAZON M. ALMERINO 

Ontario, California, USA

horeb

Sulod unta 

sa hunahuna, apan 

tuyoonon. 

Ubay-ubay 

ang mga agianan. 

Liko sa tuo. Aginod 

sa wala. Usa na usab 

ka liyok padulong 

sa gahagdan-hagdan 

nga mga bato, sumpay 

sa panon sa mga kwaknit 

nga gililo sa liboan 

ka mga unos. Apan, 

wala ikaw dinhi. 

Usa ka lakang 

nganha sa gabukal 

nga lapok. Mga pananglit, 

mga pasumangil nga 

gidangdang sa kalayo. 

Gapaabot sa pagkibhang 

sa higayon, sa imong 

paglabay. Apan, 

wala ikaw dinhi. 

Sulod dinhi, wala’y asoy 

ang nasaag nga huyohoy. 

Wala’y dagway ang mga 

udtong tutok. Busa, ania, 

gakubkob na usab og langob 

sa ilawom. Ningsaghid ang sidsid 

sa usa ka huni, sa berso— sa yuta 

nga maangkonon. Sa gihapon,  

wala ikaw dinhi. 

-- CORAZON M. ALMERINO 

Los Angeles, California, USA

kon tunhay ang testigo sama ni bautismo

Walay gipili ang imong tingog. 

Bisan gihayhay kini sa mga balili, 

gisugba sa kamingaw, giguroy 

ngadto sa gikubalan nga bungtod, 

lanog gihapon daw gidul-it 

nga kampana. 

Unsay nakalahi 

sa imong pagmatuod taliwala 

sa pagginhawa ug pagpinal? 

Nganong gibaylo nimo 

ang naandan niining bugtong sapot 

sa tibuok nimong kinabuhi? Niining 

mga lukton nga imong gisubad? Niining 

sulog nga imong gikupay? 

Ikaw ang alingugngog sumpay 

sa tanang dugdog. Usahay ngilo 

sama sa langgis. Usahay, huni nga 

nipakli sa mga suba. Segun sa nakadungog, 

adunay moyango. Adunay moliko. 

Adunay manukad. Adunay mokulihad. 

Pinangga, kini ang imong gipili. 

Ang awhag sa katim-os. Ang sakto. 

Ang angay. Basin baya, sa usa 

ka kibhang sa takna, dinha 

sa mga lawak sa imong tanlag, 

maglaway ka magsud-ong sa 

mga lami nga ginadili. 

 

-- CORAZON M. ALMERINO 

Los Angeles, California, USA

tulumanon sa gihapon

Dili kini ang iyang ampay. 

 

Ang iyang buot ligwatunon 

sama sa mga haliging puthaw. 

Dili moiswag ang iyang mga tudlo 

kon agakon dinhi niining papel, subay 

niining duha ka laray sa tagutlo 

nga mga dulot. 

Samtang ang iyang mga ig-agaw 

gakitib-kitib, gayamyam daw 

mananabtan sa mga balaod 

ni Newton, ania siya nibagtok. 

Nagdumili. Galugnot-lugnot 

atubangan niining papel—niining 

unom ka dulot (unom ka sinyal) hulip 

sa mga naandang letra. Hulip unta 

sa unang litok, unang pulong nga 

gilingla sa kinasuokang anghit 

sa mga kwaknit. 

Sa makadaghan, ang matag agak 

padulong sa unahan tagbuon 

sa gaawop-awop nga udtong tutok. 

Ingon sa gihiwa, gitagod-tagod 

ang mga gamot sa yuta inig ingkib, 

inig laksi sa iyang ngipon niining 

bukton. 

Wala’y dag-anan, daw nihit 

ang mga agianan. Wala’y iwag dinhi 

sa kinaluyohan sa laray, kinaubsan 

sa hagdan. 

Apan, 

sa gihapon, 

ang unahan. 

Dili kini segun sa iyang ampay. 

Dili segun sa katalaw o kasayon. 

Usa ka lakang ngadto sa mga lakang. 

Agak ngadto sa kanihit. Molagsik. 

Mobagtok. Usahay, mokibhang. 

 -- CORAZON M. ALMERINO 

Los Angeles, California, USA

adunay nikabad didto sa Da Lat

Mao kadto ang ningduol. 

Usa ka dupa ngadto sa bungtod.

Usa ka dangaw nga laraw.

Didto ang yuta ninghiyak. 

Ang Tristesse ni Chopin namidpid 

sa nangamang nga biyuos libot sa

mga hardin. Giukab sa hangin

ang mga lamat nga gianod sa sapa

ngadto sa hangtod. 

Saka-kanaog sa mga hagdan, 

nagtingsi ang magtiayong Gwen 

ug Fitz. Nag-inagbayay ang ilang 

mga talidhay. Nag-akob ang ilang 

mga gusok. Dili halayo kanila, daplin

sa labong, nangahunlak ang matag unya. 

Nangliki ang mga bato sa nangudlot

nga sagbot. Ang huni ni Chopin nilakang

padulong kaniya nga nagdumili. Kaniya

nga nawili. Kaniya nga gidihugan sa

pag-inusara. Kaniya nga nagbawon 

og nipis nga lampin, kanhing gihapnig 

sa katre, samtang ang iyang anak gipaskan

og mga tubo sa ilong ug baba; samtang

gitusok sa mga dagom ang iyang gagmitoy 

nga mga bukton; samtang ang iyang lawas 

giayagan og mga saag. 

Walay makalihay sa Da Lat. Ang iyang

sapa mokamang nganha sa sidsid sa tanlag.

Hangtod karon ug sa gihapon, ang matag

dangaw nangalimyon sa mga hardin,

sa tanan nga sulondon,

sa tanan nga dili na angay’ng ugkaton.

-- CORAZON M. ALMERINO

Los Angeles, California, USA

kay dili swak

Kuwidaw sa tabas

nianang imong dila—kanang

imong pinakatay nga ningwisik

sa mga gaunlang luas

taliwala kanato. 

Tinuod, dili kita swak ug 

wala kitay mga pusod nga

ikabugkos. Walay kagahapon

nga nakigdulog nianang 

mga lumot sa habol nga imong

gihapin kanako. Walay tando.

Bisan pa man niining tanan,

wala kay katungod nga mosusi kon

ang ania dinhi sa imong atubangan, karon, 

mahisama nianang imong kinaugalingon.

Tungod kay, sukwahi sa imong swak, 

sama kini sa mapinanggaong inahan, 

gahago og laylay sa iyang anak

sa matag tungang gabii. Gapatutoy

bisan gutom. Mopupho sa mga mumho

ug igit. Molahutay sa tanang pasmo

ug hilanat. Dili mangayo og sukli. 

Busa, kuwidaw. Ayaw pasulabi.

Ayaw kini itandi labi na nianang

walay mga perlas nga ikalabay

sa baboyan. Kay basin, basin baya

kon mahinayak, kon mosugmat,

didto ikaw ibartolena sa iyang

tagoangkan.

Aron biyaan.

Aron sa hingpit hikalimtan.

-- CORAZON M. ALMERINO

Los Angeles, California, USA

ang ebanghelyo sa pasko

Dinhi nihamtong ang kanihit.

Sambingay sa yuta paingon

sa langit. 

Sulondong tahas ginama

sa mga tabas, sa mga ginabas.

Ang akong mga kamot gabay sa iyang

mga kuyamoy, sama niadtong katuigan

nga ako siyang gitudloan pagkupot 

sa iyang baso.

Segun usab kini sa paghan-ay. Ang paghunat

sa unang laray ngadto sa gasunod. Mga karnero

kilid sa ilang magbalantay. Ang bugtong bituon. 

Mga hari ug ang ilang mga bulawan, insenso, 

ug mira. Mga anghel. Ang iyang ginikanan. 

Siya sa iyang pasungan.  

Ang mga awit sa pagsaulog nangasangit

sa iyang agik-ik, samtang ang palibot gilunopan

sa tanang dinhi, kini. Ning-ukab na usab 

ang kasaysayan: mga tunob sa iyang amahan, 

saka-kanaog sa hagdanan; nagkadaiyang tingog 

sa mga kabit sa telepono; kay-ag sa mga balikas 

nibanda sa bungbong. Mga gibaid nga bahad.

Apan, bisan ingon niini ang nangagi, walay

nalaksi nga lanot sa iyang kamaya. Ang iyang

kasingkasing tubod sa mga batis taliwala

sa hulaw. Ang iyang kabatan-on gilimisan

sa unang mga sidlak sa buntag. Sa iyang

dalunggan ang huni sa mga goryon.

Kini ang talagsaong adlaw. Dinhi atubangan

sa pasungan, mga indak sa iyang tiil duyog

sa tambol. Ug bisan sa kanihit, iyang giakob

ang iyang kaugalingong sambingay 

sa usa ka paghunat: Mama here. 

Akong mga kamot sa iyang mga kuyamoy.

Akong kasingkasing nahinanok sa iyang abaga.

Gawasnon sa tanang bahad. Luwas sa mga kulihad.

-- CORAZON M. ALMERINO

Los Angeles, California, USA

kon diin kita, anaa

Ug nahiabot kita. Subay

sa mga timaan. Latas 

sa gipangsalipdan.

Dinhi ang panahon.  

Gituslob sa gaagay. 

Hingkod sama sa unos, 

lunhaw sama sa galandong. 

Tin-aw taliwala sa haylo.

Dinhi usab ang yuta. 

Silong sa mga bituon—lalis

sa kalagmit ug sa kalungtad. 

Ania ang kahoy nga gihumod

sa kagabhion. Kanaas sa

mga salinsing nianang daplin. 

Mao kini ang lawas. Mao kini

ang gihalad. Ang bugtong

huni sa nagtawag. 

Kini ang pulong. Dinhi kita

moluhod. Dinhi kita mosulod.

Dinhi nato bunyagan, itugyan,

ang tanang utlanan. Dinhi,

hubo kita. Sama sa yamog. 

Hingkod sa mga sinugdanan.

Sa kanunay ningkaylap.

Sa kanunay nanaghap. 

-- CORAZON M. ALMERINO

Los Angeles, California, USA

karon, sama ra gihapon

Nga kon 

niining higayon ang panag-uban 

usa ka pangagpas, usa ka laray 

sa mga pangutana, nga gibadlis, 

daw abo, sa mabalhinong agtang 

sa kagabhion, dili usab angay 

ikahibulong ang pagkinto 

sa mga alibangbang 

dinhi sa siyudad. 

Sayon ra man 

kaha 

ang paghan-ay sa nangagi 

kon adunay abutanan, kon 

adunay mingbuklad nga pultahan. 

Apan, ikaw nga ningduaw karon 

gatakuban og mga iskinang galambod. 

Ako nga ningsugat, nahinangop, 

gilamoy sa galilo nga umaabot. 

Mga sambingay sa siyudad 

gatungtong sa mga nangliki 

nga hangin. Mga bildong 

boak gidul-it sa atong gusok.

Mga dila sa aligato 

nga ningtugdon 

sa unahan, ninggimok 

sa makadiyot. Ning-awop.

Bisan unsaon, 

walay kahapsay ang 

pagkinto. Walay makatag-an 

sa gimino. Kini nga higayon 

molipang ngadto sa ubang 

mga higayon. Sama ra gihapon. 

Adunay gilubong. Adunay 

gibanhaw. Sa makadaghan, 

mga anino.

Nga kon 

ang katam-is sa kagabhion 

gipalinaan sa usa ka pangagpas, 

gisukod usab kini sa kahanap. 

Ania, dawata. Imoha usab kini.

-- CORAZON M. ALMERINO

Los Angeles, California, USA

wala’y sama ang higayon

Dinhi kita manukad. Niining usa pa

ka gutling nga ningkagiw. Kasikas

sa pahina nga ningpakli sa matag karon.

Ang lahing dapit sunod sa usa.

Dili magpahawid ang takna. Dili kini

mahiluna. Sama kini sa agay. Kaluha

sa mga hulagway nga wala’y naandan.

Ang kining gindugayon gidangaw,

pananglit, sa imong kabatan-on.

Kadtong giagak ko ikaw sa hardin

sa imong unang mga lakang.

Ang kahapunon gilingla

sa kabalaka. Apan baya,

sa takulahaw, sa usa ka pamilok,

ningbukhad ang mga udtong tutok.

Imong giwakli ang akong

mga kamot samtang gilibot nimo

ang gikagingking nga yuta. Samtang

gisubay nimo ang alimyon sa ihalas

kilid sa gakoral nga mga buwak.

Dinha sa ganay sa takna, gipatunhay

sa ninglabay ang nagpabilin. Adunay

gipaabot. Apan, wala’y tin-aw

ang saad.

Sa atong atubangan karon

adunay nangaluphak, adunay

nangalugdang.

Busa, dinhi usa kita manukad.

Kining gatukaw. Kining ning-abli.

-- CORAZON M. ALMERINO                                                                                                             Los Angeles, California, USA

hatagi sila’g ikahunghong

Duwa kini. Busa,

pili-a ang pinakapuwa nga lipstick,

aron mahisama sa mga biyuos sa rosas

ang imong mga ngabil. Balikosay

man kaha sa tinai. Badlisi dayon

ang imong kilay, habog sama sa labyog

sa mga pako sa kabog. Hinagpatay pod

diay sa utok. Pintali kanang imong

aping og mga sundang ug bangkaw.

Ilaha ang sumsom. Imoha ang siyensya.

Sa matag tikang nimo nianang ang-ang

sa tubig, ikaw ang lab-as nga kinilaw

alang kanila, “bulay-og, ambisyosa, gadahom,

mangtas, makasasala, malas.” Ug samtang

nagpinakatay ang ilang laway sa imong

obra, suweldo, degree, ug ang tanang halayo

sa ilang mga mugbong kamot, imong gitay-og

ang mga lamog-lamog sa suka hangtod

nahimo kining bino. Imong gihulma ang yuta

ngadto sa imong dagway; ang mga bato

sa imong bukog.

Sa mga takna nga gipas-an nimo ang troso

gikan sa imong nataran ngadto sa kadalanan,

ngadto sa sidlakang bungtod, natunga ang patag.

Sulod sa imong alimpulo ang usa ka disenyo

nga gaakob sa kabug-at, unos, lilo, ug linog—

usa ka hinagiban alang sa gasurang-surang.

Kon iduslak, ang tanan mabuslot, madunot.

-- CORAZON M. ALMERINO                                                                                                               Los Angeles, California, USA

apan niini nga kalagmit

Unta mao na kini ang naghinapos.

Usa ka yugto tubag sa pagpanuko.

Human sa napulo ka tuig,

ania gihapon ikaw, namasin

nga modagsa ang liboan ka mga

hangin nga mosapnay kanimo

ngadto sa kinatumyang kaway

sa gipangtipak nga hayag. Usa ka

padpad layo sa naandan. Tim-os

sama sa ugma.

Duol sa imong gitindogan karon

mga kagingking nga ningbalikos

sa panas. Mga sagbot nga nanglipang

gihapon sa huwaw. Ang alimyon

sa kalachuchi taliwala sa kalangsi.

Ang bugtong kabilya nga ningsiwil

gikan sa kinailadmang yuta. Ug

ang nahimugsong pagkakaron nga

galandong sa pultahan.

Walay makasugid kanimo kon nganong

adunay kaabli nga dili mohangtod.

Kon ngano ang matag tunob

mokabad sukwahi nianang naghinapos

nga pahat. Kon nganong mapugsanon

makigharong ang tanang giluom taliwala

sa tanang hayag, sa tanang gihalad.

Imo kining higayon. Karon. Apan,

adunay panaad ang pagpanuko

nga dili ikatugyan sa ugma.

Agay sa gisandayong kagabhion.

Ang bugtong gihambin. Idlas

sama sa hangin. Malungtaron

sama sa mga bituon.

-- CORAZON M. ALMERINO                                                                                                             Los Angeles, California, USA