ang pagpangumang

Kon pul-an na ang dagat sa paghalok

sa ngabil sa baybayon sa Isla Bulalacao

manggawas ang mga umang sa balas

Kanunayng gahulat

kanus-a moabot ang hunas

inigtak-om sa kilumkilom

Moikid-ikid pagpangita

sa mga biniyaang sigay

aron sudlan og gagmayng kalipay

-- NEILE  GENICA  D.  MIJARES                                                                                                Cebu City, Philippines

suliran sa erodaynamiks

Ang babaye nga adunay kilometrong pisipusod
gitugpo iyang mga damgong tabanog ngadto
sa agtang sa bangaw ug misayawsayaw
sa tayhophuyohoy sa kahitas-an sa kaymito.
Mapasawom ba kaha niya ang kilya ngadto
sa mga dagatdahon ug ipabalikos iyang ikog
sa punoan kon ang iyang tangsi sa inunlan
birabitaron sa matris sa lata sa sardinas?


-- NEILE GENICA I. MIJARES
Cebu City, Philippines

sonata pathétique ni beethoven sa piyanong yabag

Sa higayong imong ipatong

Ang imong mga tudlo sa tikla
Maayo kon mahimong ipalayo

Ang tamdanan sa imong piyesa,
Gamitong' metronomo ang pinitik
Sa imong dughan.
Ug bisan pa'g anayon ang kwerdas

Sa akong kahiladman,
Ikaw na ang bahala motukar
Sa akong mga bahin nga
Itom ug puti.


-- NEILE GENICA I. MIJARES

Cebu City, Philippines

kataposan sa hulaw

(alang kang Bukog)

Nitayhop ang kaigang. Taud-taod nag-inday-inday ang halok sa
huyohoy diha sa atop, nagpatuasik sa iyang laway sulod sa abling

bintana. Nangamras ang liti sa langit. Nag-alburuto ang panganod.
Pinahayang ang unos nga gisalo sa piit nga gakos sa kagabhion.
Ug sa dihang nagluha ang yuta sa kalipay, naglutaw ang ngiob nga
tugkaran. Pagkabuntag, sa may pultahan, adunay duha ka lipak sa
kawayan--umog ug nagtinandayay--nangaanod sa niaging buhagay.


-- NEILE GENICA MIJARES
Cebu City, Philippines

pagsikop

Inig kagabii
kanang dayon na pagkapundir
sa dinaginot nga dan-ag

sa kilumkilom
manakop ko

og mga kaka

Ang sulo

ang motultol nako kon asa

motunob ang akong tiil

sa butihon nga agianan

paingon sa bukid

diin sila gatago.

Aduna man sa'y mata ang lapalapa

sa akong Spartan, ba. Molili

sa ilawom sa mga bato diha

sa kalibonan ug ilawom

sa dagkong kahoy
diin sila gahuwat

kon kanus-a maabtan
sa gigunitan nakong kahayag
ug kanus-a masakpan
sa akong tiil sa ilang pagkamang.

Hakpon nako ilang mga kasway,
tayhopan og init nga hangin
gikan sa akong baba,

ug ipahiluna sa kangitngit
sulod sa lungon sa mga palito.


-- NEILE GENICA MIJARES
Cebu City, Philippines

pagbiya sa pier tres

Niining taknaa
Bitayon ang adlaw
Ug lumsan.

6:30 sa hapon.

Gisamaran sa fastcraft ang dagat
Samtang hinayhinay nangahagbong
Ang mga pinong dagom— nanusok
Sa mga lantsa, roro, ug sa akong
Ulo ug bukobuko.

Gitulod sa mga bawod palayo
Ang imong pulong bahin sa pagbalik.
Ug ikaw, uban sa imong maleta,
Gihatod sa akong panan-aw
Ngadto sa panganod.

Ingon ining taknaa, niining dapita
Natilawan pod nako ang dagat
Nga nibanaw sa akong ngabil.


-- NEILE GENICA MIJARES
Cebu City, Philippines

labasera: pagpili og pamanhonon

Kanang kon dunolan nako og bakasi
iyang himoong nilarang. Kon alimango,
iyang pabukalan lakip sa mga pasayan.
Kon anduhaw, iyang tuwahon.
Kon bulinaw, kilawon.

Tulingan, gisaw, tamban, palotpot, aninikad…
Dili ra kining tanan ang iyang mapakyaw.

Pakapinan pod nako og tam-is nga pahiyom
kon iyang maabot ang saktong timbang
sa akong kasingkasing.


-- NEILE GENICA MIJARES
Cebu City, Philippines

raspa gikan gapakuha

Na hala, dok,
apila na lang pod pagkuot
ang nahabilin gawas sa tago-

angkan diri sa kinangitngitan

nga bahin sa akong kasubo.

Kuota pa, dok,

ang kinalawman hangtod

mahawanan ang akong
kunsensya mentras wala pa
mohupas ang anestisya.


-- NEILE GENICA MIJARES
Cebu City, Philippines

hunas

Walay madungog nga hagawhaw sa dagat
Inig hawok sa bawod sa tiilan sa baybayon.
Sa layo, ang suga sa lampara sa mangingisda
Murag mga gagmayng tuldok nga lamyon
Sa kangitngit matag hunghong
Sa habagat ug mga damgong nangapalid.
Pipila ka lakang pa sad ang lakwon sa hunasan
Kon baktason nimo paingon sa lawod
Apan inig bangon sa adlaw sa sidlakan
Moabot ang lab-as nga bahanding magkisikisi
Diha sa mga barotong gihatod sa naghaguros
Nga taob. Nagdagan, nagdasig paggakos
Sa parat ug tam-is nga baybayon.


-- NEILE GENICA MIJARES
Cebu City, Philippines