baranggay diatagon, lianga

Lahos ang huyhoy 

sa imong lapalapa, mitamak 

sa balas. Gikambayotan 

sa tun-og ang imong bukton ug kamot. 

Gikumot ang imong paghinamhinam
sa mga saad nga nangatagak
sa lapyahan sa Surigao,
gibanlas pagbalik sa mga bawod.

Buot nimong isinggit,
ug idanguyngoy ang kapait
sa saad sa kalinaw nga nakiglangoy
sa lawod: kon asa o naunsa na
ang dagat ra'y nasayod. 

Apan bisan anino wa'y miabot 

sa lapyahan, bisan pa man… 

paaboton gihapon nimo 

ang kadlawon.

-- ERROL E. MERQUITA
Davao City, Philippines

irong latagaw

“…for peace and development let us work a Drug-free City”-- mayor

Kon way moangkon, asa man

mopasilong ang itoy? Kon wa’y nagmatuto

asa man siya moadto?

Kon modakong wa’y tag-iya, ang itoy

mahimong irong latagaw— makit-an

nga manungkab  sa basurahan, mokaon

og salin, bisan patayng’ lawas

iyang daginoton tungod sa kagutom

ug kon kadaghan na siya napasmon

mamahimo siyang buang;

magbula iyang baba, mamula iyang mata!

Pag-andam  kay dili na unya siya kaila’g amo,

tawong buotan o iyang inahan.

Nakit-an nako kas-a nga gibukbok 

iyang ulo sa kahoy, gisulod sa sako,

giguyod ang lawas sa semento, unya

mitagaktak ang kwarenta‘y singko:

Kinsay nakabaw kon gisunog ba kato

uban sa mga  irong latagaw

o gipaanod sa sapa sa Bankerohan.   

Kon buk-on ang utok sa irong buang

daghang rabies imong maki-tan

ug tingali kon kahibalo ta mobasa,

naa diha ang iyang pangutana:

Kinsa man ang nag-anak sa akoa?

-- ERROL A. MERQUITA

Davao City, Philippines

Ang kinaiya sa pag-iya-iya kaluha sa pag-inusura

Ang kinaiya sa pag-iya-iya

naa sa lasa sa french fries,

inig tuslo nimo sa ketsap,

inig paak nimo sa patatas,

managhan sa atop sa imong baba,

ibabaw sa imong dila.

Naa kini naglangoy sa usa ka

plastik nga baso sa cappucino,

motidlom-mopaibabaw, motuyok

mahimong buwa, mokuyog sa hangin,

motapot sa baga sa sigarilyo

nga yupyupon aron magtapok sa ash tray.

Madunggan nimo ang laguto niya

sulod sa baso, sa mga nagtanday nga ice,

madunggan nimo ang pasumbingay niya

sa mga bag-ong bokabularyo sa imong dila

sama sa mga nagbitay nga suga

sa karaang kisame sa bag-ong coffee shop.

Ug bisan pang kinsang grupo ang imong

 mahimamat sa Facebook o Twitter

motaguktok ang kahagtok sa pag-iya-iya’g

pag-inusara sa kada lakaw sa imong browser,

makiglumba sa uploading ug downloading.

Tungod kining batasana,

pinaangkan sa gubat,

gisabak sa mga adunahan

ilahang gipadako sama sa kontinente

sa amerika og gipasagop sa atoa. 

-- ERROL A. MERQUITA

Davao City, Philippines

kon pwede bisayaon

Lagtik ang pitik sa iyang dila
arte kaayo ang pagpa-paak sa diction;
miinat, mikurba ang iyang ngabil
ug bag-ang sa pagyawyaw
sa nationalization,

Theory dinhi, diagram didto,
model dinhi, history kuno
tingali napungot nga naminaw
silang mga naglumlom sa akong
bagul-bagol ug pislat nga ilong kay
miulbo man og kalit ang akong kaspa
(kalaming kawton)
murag migimaw man ang akong kugmo
(kalaming kuoton).
Pamati nako murag dili man ingon-nato
ang arte nga pagbawg-bawg sa dila,
kuhaon pa gyod ang tingog sa ilong,
busa nanghangyo ko kay mam
kon pwede unta bisayaon ang nationalization,
arte kaayo ang pagpa-paak sa diction,
miinat, mikurba ang iyang ngabil
ug bag-ang nga nagkanayon
“You should learn English, dong, uy!”

Giatay gyud ning di ta magkasinabot uy.

-- ERROL A. MERQUITA

Davao City, Philippines

human ang bisaya nga pipila ka tuig nagtinagaw’g

Katong napalgan nako ang uwan
ug karaang lapis sa akong inahan:

Murag gihalingan akong kamot
Murag giungo ang akong dughan--

ang hampak sa hangin
sa among nipang atop
ang lagiti sa kilat sa panganod,
ang hinay-hinayng tunob sa uwan
sa among kisame paingon sa dagway sa
salog nahimong ispirito
nga nagmando sa akong utok,
panuway tingali kay nanglagat man ang
akong mata, nagbula akong baba,
ug nagyamyam sa mga tigmong
pipila ray makasabot.

Ug kon imong makaplagan
nga galutaw-lutaw ang akong
kalimotaw samtang nanaghan
ang akong mga kamot ug nagyamyam
sa istoryang yawa o ginoo ra pod
ang makahubad;

Ayaw'g katingala
Ayaw'g kakurat
Labaw sa tanan
Ayaw sulayi,
Ayaw kog pugngi,
kay "baka masaksak" ta ka.

Luba, kon Bisayaon pa.


-- ERROL A. MERQUITA
Davao City, Philippines

katong nagbinahinay ta sa saging sa lanao

gibaligya ang among saging
sa Tokyo ug gitagaan
og daghang bulig ang Manila
gipanitan, gihiwa-hiwa
gibahin-bahin nila

bisan sa panit
wa mi naangkon
apan tua mi nabilin
sa aping sa kutsilyo
isip usa ka lagom
nga salin

katong gipuy-an
ninyo ang among yuta
ug gikambyuan ang among mga
sugilanon tua mi nabilin,
nagkapyot sa aping sa lagaraw


-- ERROL A. MERQUITA
Davao City, Philippines

ispagiti

Lamian tang duha
sa ispagiti kon

sakto ang pagkalata sa pasta,
tam-is aslom ang ketsap,
tama ang gidaghanon sa hatdog,
tses, ug ginaling nga baka
ug labaw sa tanan gaaso-aso
nga ihukad sa atoa,

gani mingsaad ta makausa nga
ikaw ang pasta ug ako ang sarsa.

Mahungit ra unta bisan
aslom-aslom ang ketsap
o gahi-gahi ang pasta,
apan karong nahisama sa simod
sa iring ang ispagiting
naa sa lamisa ug paminaw
nako gapamundak ang weyter
kay tingali wa malipay
magsud-ong sa atoa, unsa may
angay'ng buhaton kung naa
na ang tanang sagol ug sakto
ang tanang timpla gawas nga kita
hilom-hinayng gatuyok-tuyok ra
sa tinidor samtang
gakibkib sa amerikan brid,
usahay mangutana ko og kumusta na ka
unya mutubag sab kag maayo man.

Tingali nangutana ang pan sa tinidor
kon nganong gatuyok-tuyok pa siya
sa usa ka bugnaw nga ispagiti
ug tingali makurat ang tinidor ug
moingon gikaon na diay ko sa kahilom,
ug atong tungora mitindog ko'g
miingon, "Pasayloa ko
di nako kaagwanta ining kabugnaw."


-- ERROL A. MERQUITA
Davao City, Philippines

payag

Ginabuslotan sa ulan
ang atop nga
hinimo sa sulirap.

Hinay-hinay’ng

ginapahumok sa mga
kadlawon ug kagabhion
ang mga bungbong nga
nagkaanam na og kadugta
sa tumang katugnaw.

Ug samtang ginakitkit
sa mga anay ang
nahibiling bagakay
sa salog, hinay-hinay’ng
ginaputos sa mga lawa-lawa
ang mga siradong bintana.

Ang kaniadtong
lig-on ug masadya
nga payag hinay-hinay
nang nangagum-og ang
mga tukod niini.

Ing-ana kining akong dughan
sukad imo kong giluiban.

Ahh, patya na lang ko!


-- ERROL A. MERQUITA
Davao City, Philippines