ang akong pagsupak sa pamahayag ni William James

"By the age of 30, the character has set like plaster and will never soften again."

Nan, kon mao, ang pagtuon

iya na lang sa mga batan-on. Ug kami

nga padulong katigulangon mohunong na’g

pakli og basahon, di na mamati og sermon

ug di na padayong magkat-on!

Hoy, Ilyong, por yur inpormesyon

ang akong nailhang plaster kadtong haklap ra

sa kabahong, sayon ra kaayong uphakon.

Apan kon alang-alang ang pagtangtang

lagmit matandog ang hagbay rang nasamad,

maukal ang  naandang kugan...

Ug mao ra na’y nakalisod!

-- DESIDERIO R. LIBRE                                                                                                          Samboan, Cebu, Philippines

sama sa cotton bud, lami ang gidili

Gitambagan baya ko sa doktor 

nga dili kuno maayong kulitogon

ang dalunggan apan...

dili matugkad kadtong kagilok

nga nabatyag niadtong gabii

dihang gitugkad ko ang giladmon 

sa imong atuli diin makabungog 

ang imong mga salimuang…

Karon, nasayran na gyod nako

nganong ikaw, pwera buyag, 

apil sa daghan nga nahigalam!

-- DESIDERIO R. LIBRE                                                                                                         Samboan, Cebu, Philippines

tagsingko ra ang bali'g libo nga disgrasya

Taudtaod, 

gitubilan ni Vicente 

og bali'g tunga sa bul

ang diriyot namad-an nga tangke

sa estasyonan sa kang Mario-Este

aron kuno permanente ang kalantip

sa makahubog nga biyahe.

Taudtaod,

gipukaw ni Vicente

ang nagtagpilaw nga binabaye.

Gisikaran ang bat-ang

ug mingulob intawon

ang bagulbol sa naalimungawan.

Kinsa’y di mokaratil og dagan

kon kumoton og taman

ang tuong dalunggan.

Taudtaod,

ang barahan nagmantala na 

og gikusgong marka-bahala.

Didto sa unahan,

ang dako ug habog nga tigguyod

munas’ ginhawang nagbala

og kargamentong bali'g tonilada

wa moayad sa panghagad

nga pakighawok ni Vicente

lakip sa wa’y preno nga hinagwaay

taliwala sa karsada!

--DESIDERIO R. LIBRE

Samboan, Cebu, Philippines

virus

a

ha

aha

letra

usa ka

letra nga

nanganak

og laing letra 

nga nanganak 

og lain pa ug kini

nahulma ngadto sa

usa ka pulong ug unya

nanakod og lain pang mga

pulong ug unya nanakod pa

ug milamay pa gayod ngadto

sa pagkahugpulong nga sama

sa gidahom kini nanakod og lain

na upod ug lain pa gayod hangtod

nga milamay na kini ngadto sa usa ka

paragrapo ug nanakod ug nanakod pa

gayod ug karon hingpit na kining usa ka

sugilagming ug inanay kini nga mohupong

ngadto sa pagkasugilanon ug manungha ang 

daghang anib sa mga sintomas ngadto sa dako 

uyamot nga nobela nga di na gayod katambalan

manakod ug manakod ug manakod pa gayod kini 
ug ang iyang mga kagaw wala na gayo'y kataposan...

--DESIDERIO R. LIBRE
Samboan, Cebu, Philippines

retorika sa romansa

nanginit namugnaw

kining kaadlawon

tugbang sa udtong tutok  

sahi sa talagsaong kalipay

lakbit sa imong kasakit

kay bag-ohay lang nagdugo

ang daang samad 

nga ang kapula nadanlog

sa lunsay nga kaputi

duyog sa dagayday

nga luha sa kalipay

patya ako sa kalalim

aron banhawon na pod

ang salimuang unya

sa lain pang langit

-- DESIDERIO R. LIBRE 
Samboan, Cebu, Philippines

kadtong duha ka persona nga akong nailhang nagdupa

Hubo. 

Kinabuhing halad alang sa tanan.

Hagbay rang gipaila-ila ni mama

Gikan pa sa lola sa iyang lola.

Among dumdomon matag semana.

Hubo.

Atol sa kasumaran daghan 

Ang modumdom bahala'g mapandol

Dili paulahi sa panaad nga gitultol

Bisan sa mga wala'y purol!

-- DESIDERIO R. LIBRE

Samboan, Cebu, Philippines

multiple personality disorder

Ingon nila buotan kuno kaayo ko,

dili gani kabuak og baso..

Uy, wala lang sila mahibalo

pila na kabuok gisunggo

ug gipakamang sa santako 

sa akong mga balak ug sugilanon. 

Pastilan, kuwang na lang gani 

moluhod sa pakiluoy 

ang akong protagonista

nga nangutana kon nganong

timawa lang ang iyang papel 

hangtod sa kataposan diin 

siya namatay samtang

galabyog akong tingog sa awit 

nga daghan nang naagtang...

Ingon nila, mapaubsanon kuno ko.

Uy, wala lang sila mahibalo...

--DESIDERIO R. LIBRE

Samboan, Cebu, Philippines

omnivorous

Pagkaduslog, baboy!

Pagkalaog, butakal!

Mabisan unsa, way pili, lamoy!

Daghang naangin sa kahigal!

Mabaktin, mawa'y lutas,

bisan pa gani'g bigal

nagbilig uyagik nga kutas

sa nagkaigit nga tangkal!

--DESIDERIO R. LIBRE

Samboan, Cebu, Philippines

sa pagbalak

Mao ra'g sayon, apan lisod

kay bisan mubo, pagkataas diay 

sa panahon nga itukaw 

ug ikawot sa opaw.

Mahimo ba ang manghihilot mohilot 

sa iyang piang? Kun ang tigtupi 

sa iyang kabang? Kay kon mao, 

mag-unay ko'g talidhay sa akong apan 

kay intawon wa ma'y laing namakpak 

sa nikaratil nakong dagang.

Mao ra'g sayon, apan lisod

kay labihan kabudlay diay

ang pagbanyos sa natagong piang, 

ug pagpatag sa kabang. 

Na hala, bisan di ko kabalo 

manambal ug dili pod usa

ka barbero, nia lang gihapon ko 

andam sa ilang pamaagi nga labing 

lantip ug bagtikan, ug kini lang

ang padayon nakong atangan…

-- DESIDERIO R. LIBRE

Samboan, Cebu, Philippines

pagbantay sa hilomon

kon ang mobulhot 

mao ang nagpuot

kapin sa panuhot 

pastilan makalagot

kon modahunog sama sa dalugdog 

dili angay ikasubo kay walay baho

apan pagbantay lang sa buhagay

nga nagtigom og lanag sa kahilom    

kay intawon daghan

ang mapasanginlan

lakip ang napagan

sa wala pa mailhan

-- DESIDERIO R. LIBRE

Samboan, Cebu, Philippines

panimpalad

Ang suba nga akong giubogan gapatin-aw sa kakulba lapaw sa hilom nga katugnaw. Nganong langoyon pa ang kinasang-an tadlas sa makapagan nga sambunot sa lilo ug balod? Takulahaw lang, ug nasud-ong nako ang sulog. Gidis-og ang unahan. Pwera buyag, mapangahason ko sa pagpadayon ngadto sa mahagitong dapit diin dugo, singot, ug luha ang bulok sa tubig!

Karon, nahidangat na gyod ko sa kinatumyang bul-og sa ganganga nga suba. Uwat na lang unya mahabilin sa mga pangos ug samad, mosugid sa akong paglahutay ug pagbarog. Gaatubang ko sa dili masukod nga kanawkanaw lahos sa lawod.  Lain na pod ang maghulat: amihan, habagat… Ug nalantaw nako ang usa ka isla bisan sa iyang gilay-on. Bantang kaayo ko sa sidlakan, mapahiyomon.

-- DESIDERIO R. LIBRE

Samboan, Cebu, Philippines

inertia

Buot kong modagan

sa wa'y paghunong apan hilabihan 

nga nanghawid nako ang kabug-at

sa akong agianan:

kakabos, 

kagubot, 

ug kining mga pinitik sa dughan

nagpalawom sa mga libaong. 

Pukawa ko. Palihog

kuhita,

handosa

ang akong nag-urong

nga kalibotan.

-- DESIDERIO R. LIBRE

Samboan, Cebu, Philippines

bayad sa pag-ampo alang sa ulan

Nag-oracio ang mga obispo

kay gikuridas sa ting-init

ang Mayo ug Hunyo.

Diriyot wa gidayon ang flores

kay nagsinggaak ang ave

sa gipangdungoy nga mga kalatsutsi

ug ang make-up sa pangasaw-anon

gibanlas sa singot sa pagbagulbol.

Natandog ang langit.

Gipahilak ang panganod.

Nanguhit ang dagat.

(Nanukot og balig

singkuwenta kapin nga tibuok,

wa pay labot sa namising 

nga mga sentimos.)

Karon, nag-oracio ang mga obispo

aron mobalik ang  ting-init sa pagtuo 

labaw sa tingtugnaw.

-- DESIDERIO R. LIBRE

Samboan, Cebu, Philippines

emperador nga labing gamhanan

ang kalibotan 

gituyok

gituyok

duyog sa letsong manok 

nga gidigwa ug gapasad 

sa ulohan sa ulipon nga 

galigdas lakip sa binuyok 

kay ang baso

giliyok

giliyok

-- DESIDERIO R. LIBRE

Samboan, Cebu, Philippines