Galakaw sa kaiinit sa adlaw
ug ang dirhams* nga nabilin
kay igo na lang pamiliti.
Wa kapamahaw, wa sad kapaniudto.
Sa kadanghag, nasaag pa gyod
kay sayop ang nakopyang adres.
Ahaka, asa ba ning Al Khayata LLC?
Kagahapon diha koy interbyu,
ang amaw nga Arabo gasige man lang
hinuon og tutok sa akong dughan.
Niingon nga dawaton ko niya
isip personal nga sekretarya,
pero, sus, ang karaho mopasukip
bitaw og pasumbingay kung pwede
ba kuno ko niya himuong habibi.*
Habibi sa iyang kagaral!
Bug-at ang matag tikang pauli
labig way klaro kung madawat ba ko
sa akong ika-usa-ka-libong interbyu.
Ug dinhi sa akong gamayng kwarto
sulod niining huot, pit-os nga villa,
ihigda ko na lang ning akong lawas
sa inabangang higdaanan nga intawn
kurtina ray miali sa tupad nga kama.
Ug di pa gyud ko ani kapahuway
tungod sa kaalingugngog sa palibot.
Naay hinagawhaw sa manag-uyab,
Naay nanag-away nga magtiayon,
Ug sa pulipuling tyabaw sa cellphone.
Tua na, mikuyog sab og tibi
ang akong kaugalingong cellphone.
Unsa na sad ni – tawag sa Pinas?
Gatuo tingalig nakatrabaho na ko
ug gadawat nag dakung sweldo.
Tingali mamarayeg nig pabayad
sa kuryente o kaha pangunsumo.
O basig magpatugon og bag-ong
sapatos, perfume, o kaha alahas.
Andamon ko na lang ba kaha
ang akong kaugalingon sa balita
nga ang buotan kong bana
nikagiw kuyog sa iyang kabit?______________________________________________
* dirham – kuwarta sa United Arab Emirates
* habibi – Arabic nga buot pasabot “pinangga”
* villa – tawag sa panimalay sa mga Arabo nga paabanganan-- TERESITA PEÑABangkok, Thailand
