(para sa folklore nan Pilipinas)
Dagat an nagsumpay sa ato mga pusod
An luha na modagayday sa kadugyom nan panganod
Dagat sab an pahiyom sa kada adlaw na masuga
Kon diin si Kaptan an ginoo para sa mga Bisaya
Sa Luzon lingin sab an kalibotan, na tagtungaan nan kadagatan
Daya nan diyos nan Igorot si Lumawig an hulmahan
Sa mga Ilokano si Angalo an dagat tag-ihian
Para mapuno nan tubig an kalibotan na taghoy-an
Kon mokadto kaw sa Cotabato, si Alimugkat an mosugat sa imo
Isa ka anito na naghuya sa gingharian na parat
An sinugdanan nan kinabuhi sanan lugar nan pagsumpaki
An tagikanan sanan kataposanan pati sa mga mumbaki
Sa madugo na mito nan T’boli sanan Maranao
Tagkamatjan nan mga datu an dagat na malinaw
Timan-anan nan dugay na pakigbisog
Tagtukyod nan lain-lain na katujuan daya kaisog
An dagat mahimo sab gingharian sa tubig
Binantayan nan mga diwata sa kangitngit
Sa Subanen ini an utlanan nan dayan
Basehan sa barangay na tagkayujagan
Gikan sa mga puyo nan Mindanao abot isla nan Luzon
Sa jagan nan kinabuhi dagat an taghimo timon
Kahadlokan kun mangisog, pero kasaligan sa kalisod
Mahunong man an tanan, sa dagat jaoy pasingdan
Kay kita an dagat.
-- AVA MARIE A. VILLAREAL
Surigao City, Surigao del Norte, Philippines
