exquisite corpse

                        Palapasa. 

Pasa og?                                Lapas sa? 

                        Pasayloa. 

Saylo gyod?                           Pasayloon kay? 

                        Papasa. 

Unsay ipasa?                         Papason ang? 

                        Paabta. 

Abot asa?                              Abton si? 

                        Pabalaka. 

Balak ni?                               Kabalaka nga? 

-- ADONIS G. DURADO 

Athens, Ohio, USA

kalabera sa parador

Daghan kog kalabera sa parador. 

Mga balak nga wap-a mahuman, 

o di ko kahibawng mohuman, 

o wa lang ba gayoy kahumanan. 

Ang ubay-ubay niini way kasway, 

kuwangag gusok, wap-ay ulo. 

Kanang usa diha gadahom molupad 

apan natugkan hinuog kapay. 

Ayg tagda nang usa nga galurat— 

gabitik-bitik ra na sa iyang utot. 

Kanang gigusa kunohay sa gugma 

tusdikonon ang nana sa kabidli. 

Sinyalan. Simang. Puros sabod. 

Diha anang hunosa, gitigom ko 

ang pangaghong way suwang,

kahidlawng kuwangag sakyod, 

pamalandong sa way kataposang 

pamalandong sa way kataposan.

-- ADONIS G. DURADO 

Athens, Ohio, USA

sambol

Gasambol ang luas sa iyang ngabil 

hinungdan nga maglisod siyag litok. 

Kon dunay mangutana niya, igo ra 

siyang moyango ug molingo-lingo. 

Dayon sa mga adlawng wan-a siyay 

tingog-tingog, morag nakampanting 

nahiluna pag-ayo ang iyang kinabuhi. 

Nakamatikod siyang nakabhangan 

og taman ang mohasol-hasol niya. 

Busa nihukom siyang dili na pod

mousik-usik og pulong o moyawit 

o mosabat kon way nada -- kon di 

pangutan-on, kon di estoryahon. 

Ug tuod man, milungtad kinig tuig,

hangtod usa ka dekada, hangtod 

nalimot na ang tanan nga kaniadto

kaantigo diay siya nga mosulti-- 

di amang nga kon hinabion siya

agion na lang nilag senyas-senyas. 

-- ADONIS G. DURADO 

Athens, Ohio, USA

bun-og

ang trahedya 

sa griyego 

dihas lagom 

nga epiko 

sa usa ka sipi 

sa saging 

nga nakusian 

og gatosang 

mga tudlo 

aron susihon 

unsa kahinog 

ang hinog 

 -- ADONIS G. DURADO 

Athens, Ohio, USA

sumpay tinai

Kon ugaling wa pa ka kakaon og dabong, 

Wap-a diay ka katilaw og sungay sa yuta. 

Nakasubad ra kag kumingking sa tangkong 

Ug laway sa saluyot. O kaha tahod sa okra, 

Ikog sa batong, pakô sa pako, tikod sa ubi, 

Nangahingong ngipon sa nilubo nga mais, 

Kinudkod nga utok sa bagulbagol sa lubi, 

Kasingkasing sa adlaw sa tam-is nga tambis.

 -- ADONIS G. DURADO 

Athens, Ohio, USA

lagom og ilok

ingon sila 

kon unsay kolor 

sa ngabil 

maoy kolor 

sa atngal 

ang lagom 

og tangkugo 

lagom sad

kunog bugan 

ang buwagaw
og buhok 

kay buwagaw 

sag bulbol 

apan ikaw 

nga lagom 

og ilok arang 

putiag ngipon 

kon mopahiyom 

-- ADONIS G. DURADO 

Athens, Ohio, USA

unsaon nimo pagbuak sa usa ka tawo?

Mayta kunog banga, sayon rang itikwang. 

Kaha garapon nga sayon rang itulimbang. 

Mayta kunog botelya, sayon rang tiradoron. 

Kaha plato nga sayon ra kaayong tikdolon. 

Mayta kunog tasa o baso, daling hisikdolan. 

Kaha jolen o kasing nga sayon rang burakan. 

Kay tawo man, gahi og ulo, baga og nawong. 

Mokubol o moluom, mohupo o di moharong. 

Balatian niya tig-a, apan mokagay ra siya, 

Kon panggaon mo ang iyang pinalangga. 

 -- ADONIS G. DURADO 

Athens, Ohio, USA

mamugna ra ang baruto kon kini molawig

Ang baruto 

nga wap-a 

kataak og tubig 

dip-a baruto. 

Di ra layo 

sa troso 

nga wap-a 

katilaw og tigib. 

Ang baruto 

maingon 

nga baruto 

sa higayon 

nga magkabunbon, 

kon hikamrasan 

sa pansilon 

nga baybayon 

dihang misagirit 

paingon sa kinis 

nga dagat, 

ug sa dihang 

natugkag kapay 

ang tigbugsay 

nga nanguros 

padulong sa tuya 

sa lugitom 

nga panganod.

-- ADONIS G. DURADO

Athens, Ohio, USA

tutok sa lihok

Di ba 

mahimong 

di tubagon ang puol 

ug makanunayong pangutana

kon mingawon ba gayod ko nimo,

apan pasanongon ko lang kining bukton

aron ikaw-it sa imong bukton-- o kaha abaga?

Ug di pa ba

igo ang pagyango

ning akong mga mata

ingon sa pagdul-it sa tanod

diha sa mata sa dagom-- way timik,

way pamilok-- tando sa amang nga tanday?

Apan

hisayring

kon ang pulong 

maoy saad sa panganod,

ang lihok maoy binuhagay sa uwan.

-- ADONIS G. DURADO

Athens, Ohio, USA

lawom

“Lawma sad ani, uy,” pasiaw pang 

Ma’am Hermosa dihang gibasa

ang bag-o kong balak. 

Sama sa naandan, mikanga ko 

dayog lingiw dihang ako na pod 

nasigpatan ang lawm nga kimba 

sa tumtomon niyang dughan.

-- ADONIS G. DURADO

Athens, Ohio, USA

metapisika

ang tibuok mas labaw kaysa sa iyang bahin

tibuok ang bahin kaysa sa iyang mas labaw

mas labaw ang bahin kaysa sa iyang tibuok

labaw ang iyang bahin kaysa sa mas tibuok 

kaysa tibuok mas labaw ang sa iyang bahin

sa iyang bahin kaysa ang tibuok mas labaw 

iyang labaw ang tibuok kaysa sa mas bahin

bahin sa iyang mas labaw kaysa ang tibuok

-- ADONIS G. DURADO

Athens, Ohio, USA

alang kang myke nga takigan kanunay sa katugnaw sa kansas

Pwerte diayng uwana ganinang kadlawon. 

Kay pag-abri nako sa bintana, ang bungtod 

sa atbang mora gyog giyab-ag espesong tuno 

sa lubi. Haskang bagaa sa niyebeng nilukop 

og putos sa tibuok palibot. Ang gatuk-ong 

nga kabalayan ingog mga kato nga gabugdo 

sa balhibo sa puting iro. Ug ang mga punoan 

sa kahoy human malaroti sa ilang mga dahon

kay nabulit og kaspa sa halhag niining buhok. 

Mayna lang gani may igong kainit nga nibuot 

sulod sa balay human nako buylohi ang heater 

kagabii, ug karon nakaako na lag sando-sando. 

Sa kabugnawon karon sa gawas, seguradong 

mag-aso-aso ang baba bisag wa manabako, 

ug ang sinagpaan sa hangin kay makakaging—

makapakurog o makakuyos sa mokuyosay. 

Kon wa pa lang lagi untay kabilinggan ning 

buntaga, kaayo bang dili ilakaw. Kaayo bang 

paundayonan ang katapol o kalaay nga lagmit 

motumaw sa panahon sa tingtugnaw. O kaayo 

bang ihigop og utan bisaya, kaayong ibuyok 

og bugas mais, kaayo isugba og buwad lawlaw—

mamahaw sa tumang kahidlaw, bahala nag 

way tubang ikatumar, mopatukar lag Yoyoy, 

dayog syagit sa gawas: Bayle, tibuok kalibotan!

-- ADONIS G. DURADO

Athens, Ohio, USA

dili

Dili.

Dili ingon.

Dili-ingon-nato.

Nadili-ingon-nato.

Nagpadili-ingon-nato.

Nagpaka-dili-ingon-nato.

Nanagpaka-dili-ingon-nato.

Nanagpaka-dili-ingon-nato dili.

Nanagpaka-dili-ingon-nato dili ingon.

Nanagpaka-dili-ingon-nato-dili-ingon-nato.

--  ADONIS G. DURADO

Athens, Ohio, USA 

pagbisita sa patay

“Ceferino Angco, 47, wanted to visit the graves of his family and relatives in Carmen town, Bohol during All Saints’ Day but did not have money for a boat fare. Working as a scavenger in Cebu, Angco said he could not afford to buy a ticket for a boat ride to Bohol. So he decided to swim and cross the Cebu Strait, which separates Cebu and Bohol islands.”  -- Cebu Daily News

Usa ka dakong lawod ang gilay-on sa kinabuhi 

Ug kamatayon – kitang buhi ug sa mga patay. 

Sa sugod ug sa kataposan. Sa anaa ug sa wala. 

Sa gilubong sa marmol ug sa gilubong sa limot. 

Kitang mga pobre ug silang mga mata-pobre. 

Sa may ikadagkot ug sa di antigong molangoy.

--  ADONIS G. DURADO

Athens, Ohio, USA 

wa kamata

Kadlawon to dihang nahitabo ang dahili—

dihang ang pikas aping sa bukid nakanlat 

ug ang nakankan nga yuta mihinayhinay 

og dalin-as padulong sa kabalayan sa ubos. 

Kay kadlawon lagi, si Tatay wap-a kamata. 

Si Nanay sab ug ang tulo ko ka mga igsuon. 

Ang binuhi namong iro wap-a pod kamata. 

Si Tiyo Nitoy ug si Tiya Sisay nga ang balay 

kasikbit ra sa amoa kay wala pod kamata. 

Hasta ig-agaw kong si Junjun ug si Gaga. 

Ang silingan namong si Miyong, ug apohan 

ni Miyong, ug tibuok pamilya ni Miyong, 

lakip pa ang iyang hiniktang mga manok 

ug binatnang mga baboy, wa pod kamata. 

Ang banay Campanilla, banay Lobiano, 

banay Siton, banay Moral, banay Aguanta, 

banay Omambac puros tanan wa kamata. 

Morag ang tibuok sityo gilubong og buhi 

kay ang tanan wa man gyod tawn kamata. 

Dugay na baya namong gireklamo ang siak 

sa yuta, ang sigeng pagpang-upaw sa bukid, 

ang makabungog nga pagkabkab o pagmina, 

ug ang taga gobyerno wa man gyod momata. 

--  ADONIS G. DURADO

Athens, Ohio, USA 

cinéma vérité

Ug nanampiling sa kabusog ang langaw

nga gapatong sa nalawayan nga lollipop.

Ug kay lagi ang iyang mga mata adunay

sobra sa libong mga lente, abtik nakalihay

dihang nitugpa og kalit sa iyang tungod,

daw nahagsang atop, ang gihubong panti.

Ug nitugdon siya sa baba sa botelya sa bino

ug igmat nitapon sa unipormeng nagum-os,

ug pahiping nitabok sa antiparang de grado.

Wa ra sab danti, nihukom siya nga mobatsi

dihang nagkakusog na ang kango sa katre

ug hapit masikari dihang may nanlimbasog

og lugnot sa pagtuya sa balhiboon og lubot.

--  ADONIS G. DURADO

Athens, Ohio, USA 

usa ka dosenang tweet ni mister sa wap-a reglaha si misis

tapoka imong lubi kay moabot ang kudkuran #kaligonadaan

* * *

ipakanaog ang timba sa tabay sa dip-a ko uhawon #evilgrin

* * *

ang baki nga maligo magabii, mahumod sa iwag sa buwan #mutyasasagingtindok

* * *

ang makaob nga kulon pagahayangon sa akong luwag #pwerabuyag

* * *

di kalas og habol ang piot nga katre #tandaykanunay

* * *

ang kabaw sa tunaan di mahadlok magkabulingit #naturalborndiver

* * *

bisag unsaog luto ang buwad, buwad lang gihapon :) #kinaham #kalami

* * *

RETWEETED: traduttore, tradittor #iloveyoutodotodowaybreakwaykambyo

* * *

yoga-yoga pod tag ginagmay @mamabear #maldito

* * *

ang bugnaw mong tinughong init-initon inig kadlawon #maghimayaka

* * *

ang itlog mabugok kon di lumloman #ayayay

* * *

RETWEETED: ain't over till the fat lady sings #iringgilaygit

--  ADONIS G. DURADO

Muscat, Sultanate of Oman

self-portrait 3.7

dunay nakamaohan ang santan

nga maskin ang mga santos di kamao.

kat-oni ang tubig diha sa kabo,

ingog gakat-og tubig sa kalawran.

-- ADONIS G. DURADO

Muscat, Sultanate of Oman

balhiboog dila

Wala mahimutang si Tiyo Paquito

dihang nakaplagan nga nataltagan

og balhibo ang igtataring buwanting.

Matod pang Tiya Corazon ngadto

sa banang nahinuklog ang nawong:

“Ang usa o duha ka balhibong nalagas

dili makaopaw sa imong sunoy.” 

-- ADONIS G. DURADO

New Delhi, India

kay lingin ang kalibotan

ang tubig
sulod
sa banga

miawas

ang tubig
gawas
sa baruto

miawas


--ADONIS G. DURADO
St. Louis, Missouri, USA