kaskas pang inka

Nindot ang nangka basta edaran
Ingon pang Inkang nangaskaskas

Pero puros naman linghod
Way kalahias’ plywood

Ay’g tuo anang sultisulti
Paminawag lanog ba


-- GERARD Y. PAREJA
Cebu City, Philippines

panty

Hoy! Nganong di na sad ka mokaon? Na-depress ka? Kay na unsa naman sad ka?
Meeeooow

Nanga'a ka? Mabdos na sad ka? Wa bayay nagsugo nimo pag pamabdos buanga ka.
Meeeooow

Sige'g pangayog pagkaon unya kon tunulan molingiw, ugma ka lang …
Meeeooow

Okay ra nang mamiga, ayaw lag panganak.
Meeeooow

Na-stress ka kay gilaswaan nakog binukal imong lover boy nga sungkaban.
Meeeooow

Muy yawa! Ipa-apil to nimos' rasyon tong kibol nga pawot? Wa na tay budget, uy!
Meeeooow

Tingalig nanganak nasad ka. Asa nasad nimo tagoi imong mga liwat. Manimaho nasad tang patay ani.
Meeeooow

Imo nasang gitaguan para dili nako sila ipalabay sa taytayan?
Meeeooow

Dili ta adoption center ha. Undangon na nato nang imong bisyo.
Meeeooow

Mao nga ugma palitan na tikag panty.
Miaw?


-- GERARD Y. PAREJA
Cebu City, Philippines

gi-bluetooth sa alien

(alang ni Epsi nga mipanaw, ni Janrax nga may pangutana, ug ni Eli nga gahimo sa linya)

Duna koy amigo
Nga niambak sa pangpang
Nag-una ang iyang ulo
Nabali iyang liog
Paglabay sa mga semana
Ang iyang lawas nadugta
Pipila ka bulan
Una kini nakit-an
Unsa'y nasu'd sa bagolbagol?
Unsa'y nakapasuol?
Basin lang tingali'g

Gi-Bluetooth sa alien
Gi-Bluetooth sa alien
Ang iyang hunahuna
Gi-Bluetooth sa alien

Ang dalaga sa takdol
Mikatkat sa poste
Wala siya manaog
Sa tibuok gabii
Mao kini ang kasagaran
Kon sa silingan siya hilabtan
Mao nga ang katilingban
Gahan-ay na lang og mattress
Alang sa iyang pag-landing
Apan sa tun-og ug sa stress
Naligas siya sa ending
Kay

Gi-Bluetooth sa alien
Gi-Bluetooth sa alien
Ang iyang pangisip
Gi-Bluetooth sa alien

Giputos ko sa panyong itom
Ang mga damgo ko'g pagmahay
Ug gilubong sa tungod sa lubi
Nga di layo sa baybay
Hinaot dili kini anuron
O tangagon sa iro
O tuhikon sa piso
Kay unya basi'g

Ma-Bluetooth sa alien
Ma-Bluetooth sa alien
Ang akong damgo, simbako'g
Ma-Bluetooth sa alien

Busa ang imong pangandoy tagoi
Ug ayaw kini'g pahangini
Ayaw i-expose sa adlaw
Ilikay sa microwave
Ayaw'g ipatong sa TV
Ug ipalayo kini sa cell phone
Kay kuyaw kaayo kini'g

Ma-Bluetooth sa alien
Ma-Bluetooth sa alien
Ang inyong pangandoy, simbako'g
Ma-Bluetooth sa alien


-- GERARD Y. PAREJA
Cebu City, Philippines