'
“God is an infinite sphere, the center of which is everywhere, the circumference nowhere.”
-- Hermes Trismegistus
Daan na hadto mag-iriba
An tingog han amon mga dila
Pero nasasantop namon an kada tagsa.
Naglarang magtindog hin tore
An mga gamhanan
Nga namamangulo ha sentro han Sumeria -
An Babel.
Nagtuha hira hin milagro
Tikang ha mga ziggurat –
Ginpasiga nira an adlaw bisan gab-i
Ngan nagkahahanaw an mga bituon.
Nag-aasoy kuno ini nga kinahanglan
An mga yinaknan han Sumeria
Mag-urusa
Ngan magasto kuno an pag-iba-iba
Ngan magbubunga kuno ini hin araway.
Basi kuno makab-ot an langitnon nga himaya
Magtitikang an pagkaurusa ha ira
Ngan igpapatik ha usa la nga pinulongan
Ha mga palki han kasaysayan.
Kami naman,
Nga tikang ha kasidsiran,
Ha kabukiran,
Ha mga ligid han dagat,
Ha mga kagurangan,
Nahugay han mga milagro
Ngan mga saad hin pag-urusa.
Sumugot kami han ira mga plano.
Naglakaton an mga babayi ngan mga lalaki
Tipakadto ha sentro,
Ginbiyaan an mga paghinumdom
Han mga tinikangan
Kay bug-at kuno ini
Han karadtuon nga larang.
Samtang hagdan-hagdan
Nga nakakab-ot han tore an langit,
Ginbuhat han Ginoo an iya milagro.
Igsurat ini ngan igpasamwak
Hadton namamagtuo han nahiaraan;
Imbes nga mga dila,
Ginhukasan niya
An amon mga mata.
Ikaduha tikang ha pinakahitaas nga balitang
Nakit-an namon an kahusay
Han ubos nga pag-ukoy
Ha amon mga tanaman,
Ha mga hawan ha tiilan han bukid,
Ngan ha mga tangpi han katubigan.
Ginhuring han anghel han Ginoo
Ha amon mga talinga
An abat han mga pulong nga nalimtan;
Ano kalipay an pulong han kasakit?
An pulong nga paglimot, ano kakusog gumunit?
Ano katahom ngan kamaka-uuraw
An mga pulong nga hapit na maanaw
Sugad han iroy, nasod, pinulungan,
Kalibutan, kinabuhi, pag-angkon, pagtalumpigos,
Pagpatay, pagdukwag, gugma, pagsalikway
Kun ginyayakan ha pulong
Nga hirani ha kasingkasing
Sugad han mga kamot
Nga nagpadako ha im’?
Ngan nakit-an namon an amon mga payag
Didto han mga kasidsiran
Nga ginlalam-oy han madlos hin tapo-tapo ha disyerto.
Didto liwat han pungkay,
Han di pa tapos nga tore
Ginlalatob hin ikog pagi
Hin gwardia nga taga-Babel
An akon bugto.
Diri kuno ha yinaknan han sentro
An pakig-istorya niya hadton namamangulo;
Gintinawaan an akon bugto
Ginhuboan hin saruwal
Hasta kumirugtol na la hiya ha ligid
Ngan nagyinamyamon kun ano adto an hubad
Han mga pulong nga “husto na” ngan “pasayloa”
Namagting an mga buyayaw
Ha mga dila han mga taga kasidsiran.
Ginpangastigo namon an mga taga sentro.
Kami nga dirudilain an yinaknan
Nagkalusad nga urusa an mga dughan.
An sumunod nga mga hitabo,
Nakapatik na ha kasaysayan, syempre,
Ha bersyon han mga gamhanan.
Pag-uli ko ha amon
Hadto ko la kakit-i,
Ilarom han kagabhion,
Nga kun itatanding ha tore,
Huruharani an bulan
Ha atop han ak urukyan,
Ngan an kabitun-an,
Dirudilain an kahayag ngan kadagko,
Ugaring nga tanan hira mahihimo nga sentro
Han uusa nga uniberso.
-- KENNETH ALVIN CINCO
Salcedo, Eastern Samar, Philippines
