bantay baya, manong!

Kahait baya anang imong tinutokan— 

gilamoy ko nga wa’y panit-panit, 

gikitkit lakip akong kabukogan, 

gitupsan sa katam-is lupig pa’y tubo. 

Apan ayaw baya intawon ko tintala. 

Basi’g makalimot hinuon ko ug mahinayak 

pagbitad nimo sa akong lawak. 

-- HAZELEN C. COBOL

Argao, Cebu, Philippines

pagbanaw sa aping, paglutaw sa unlan

Asa na gani ka? Abi baya nako’g gakuyog ta 

Samtang gadag-om ang kabuntagon 

Dinhi sa Luyang. Moulan tingali unya… 

Kalami na gyod untang ihuyatid tupad 

Sa akong iring nga kabang kon dili pa lang 

Laagan ug kanunay mokuyog sa kundatan! 

Maghinawiray unta ta dinhi sa higdaanan 

Kay basi'g maanod ko sa akong pagdamgo. 

-- HAZELEN C. COBOL
Argao, Cebu, Philippines

kay dili na matakdo ang gihunahuna ug ang gibati

Lab-as ang mga isda ug tamala 

Nga imong gibitbit sa una. Aya-ay 

Ang dagat, wala’y hangin. Nagdag-om 

Apan wala moulan. Katam-is sa init 

Nga sabaw sa gitula nga danggit

Pinarisan og bag-ong gigaling nga humay 

Ug diha pa’y hinog nga saging lakatan. 

Gihagpatan nimo’g bukog ang isda, dayon 

Gibutang sa akong plato. Nagkinamot ta, 

Wala’y tingganay kay lanog na 

Ang kainit nga atong gisaw-an. Apan 

Karon, bisa’g lami ibalik og handuraw, 

Lamaw na lang ang salin sa dughan. 

 

-- HAZELEN C. COBOL 

Argao, Cebu, Philippines

kaudtohon: pamalandong sa malipayon

Ikaw ug ako ilawom sa dakong punoan

sa abokado, galantaw sa halapad

nga wanang sa umahan.

Gipasayaw sa hangin ang mga dahon

sa mais. Aduna gyod diay

katumanan ang tanan.

Bahala’g moabot na unya ang talisalop.

Bisan pa’g mangitngitan ta,

dili ko kini igsapayan.


-- HAZELEN C. COBOL                                                                                                                 Argao, Cebu, Philippines

pasumbingay sa pagmahay

Ug kalit nibalik ka sa akong panumdoman-- 

ikaw nga sa akong mga garay gihalaran.

Nag-inusara ka ug ako bugtong 

nahayagan sa imong pasundayag

nga labaw pa sa tingtakdol. 

Pagkaanindot untang palandongon. Ikaw--

tipik na lang sa damgo nga natugaw.

-- HAZELEN C. COBOL

Argao, Cebu, Philippines

kapuol gikan sa kapungot uban sa kaguol

Ambot nimo nganong ako lang gihapon

ang kanunayng' unod sa imong pangagho?

Pastilan, dong! Wala pa ba diay ka pul-i?

Abi nako'g naabot ka na sa imong panaw 

Palayo nako? Igo na, uy! Baya ka, kapoy 

kanang magdagan bisan pa

wala gukora ni bisan kinsa!

-- HAZELEN C. COBOL

Argao, Cebu, Philippines

pagpukaw pahilayo sa kamingaw

Piyongan nako

ang paglantaw 

kon unsa'y gitagoan-- wala damha

nga mga bagulbol ug pagbasol--

hangtod masuta nako nga ako,

wala'y lain, ang dili makighinabi 

sa akong kaugalingon. Ug ako ra

ang mopabangon

ning pag-inusara.

-- HAZELEN C. COBOL

Argao, Cebu, Philippines

inig lunop sa iyang luha

buang nang bayhana

nga magpabilin dinhing dapita

puno sa kamingaw

ug kawad-on nga galapaw 

apan kon siya mahigugma

ug mao'y hinungdan nga siya 

maungot sa espidno

maanod ra siya gikan sa damgo

-- HAZELEN C. COBOL
Argao, Cebu, Philippines

luyo sa landong

uban nianang nasalop nga adlaw

ang kasadya sa kangitngit

kahabog sa nihit nga kamingaw

kalanog sa landong nga gaping-it

-- HAZELEN C. COBOL

Argao, Cebu, Philippines

gahalok nga landong

nag-uban kitang nangandoy kaniadto

pagtuman sa atong panaad

kadugay sa panahon hangtod 

masukod na sa atong 

gilay-on nga usa ka pulgada 

kining sikit nga landong sa kangitngit   

-- HAZELEN C. COBOL

Argao, Cebu, Philippines

pagkalos pag-usab

kalawom sa kangitngit

kamingaw sa dalan padulong 

sa hubas nga atabay

-- HAZELEN C. COBOL

Argao, Cebu, Philippines

kasadya sa kagabhion

hagip-ot nga dalan

daw dili maagian sa kangiob

danlog sa siyam na ka adlaw

nga pagbunok sa ulan

dili malilong ang pagsadya

sa uhaw nga buwan

--HAZELEN C. COBOL

Argao, Cebu, Philippines

ang imong luna

nindot kining imong luna
maayong magpalandong dinhi panagsa
labi na sa init nga kaudtohon
maghumol sa tunaan magsalum-salom
maminaw sa tinagaktak
nga katin-aw sa imong mga pulong

-- HAZELEN C. COBOL
Argao, Cebu, Philippines

hawid

bisag asa ako
atoa ka usab

bisag naunsa ko
anaa ka mohalok

ingon gyod ini
ang tawo nga

andam mohawid

sa kamatayon

aron gakson
ang kinabuhi


-- HAZELEN C. COBOL
Argao, Cebu, Philippines

panimalos

salbahis ang siling kulikot
sa iyang kagamay

magpadugmok kini
magpakahilom

magpalumos sa itom
nga patis ug suka

apan pagbantay
dili imo ang tanang kalipay

sa iyang pagkapulpog
iya unya ang katawa

andam siyang mopahilak
ug sa walay duha-duha

pangitaon mo ang tubig
aron ibanlas ang iyang

init nga panimalos


-- HAZELEN C. COBOL
Argao, Cebu, Philippines

pagpangandam sa kataposan

nabati ko ang kay-ag kong kasing kasing

sa matag tuyok sa akong hunahuna

nga nagpahawan sa akong pag-inusara

buot kong molingkawas ug magpalayo apan
sayod ko nga wala'y makalapas sa kamatayon

nga gasapnay sa tubig ug hangin

anaron nako ang pagpalawom sa katugnaw

apan dili ulipon kay andam nga mabungahon

kanunay pagtugyan sa akong kaugalingon


-- HAZELEN C. COBOL
Argao, Cebu, Philippines

higala

dan-ag sa adlaw
takna sa kaudtuhon
kamalipayon

halog ug hagwa
mga yanong pakigdula
kamabulukon

-- HAZELEN C. COBOL

Argao, Cebu, Philippines

sa lapyahan

kinsay magdahom
ukabhang sa aninikad
diha sa agtang sa hunasan
ilawom sa mga tunob
karon dunay padulngan
inanay nga gapalayo
sa iyang kahaw-ang
sukad siya gipuy-an
sa latagaw nga omang

-- HAZELEN C. COBOL

Argao, Cebu, Philippines

sapa sa luha

ang sapa sa luha
adunay buhing isda
mabingwit ug mapuslan
sa pagpakabuhi dinhi
sa mala nga yuta
ilawom sa langit

pulong pa sa dagsa


-- HAZELEN C. COBOL

Argao, Cebu, Philippines

wala ka'y mabasa

walay nada
ang akong mga adlaw karon

maong ayaw ako paabota
wala kay mahagdaw kanako

inig abot sa ika-pitong adlaw
diha pa unya ko mag-asoy

gikan sa akong pagpulaw...

-- HAZELEN C. COBOL

Argao, Cebu, Philippines