kanugon: siday para kan Resil Mojares

Makasurobo nga balita

An umaabot sa sosyal media 

Septembre 5, 2026 

Tumalikod na sa kadayunan 

Si Resil Buagas Mojares 

Sa Edad nga Otsyenta y Tres. 

Kalit nga kamatayon 

Nahikalasan kami nga mga Waraynon 

Kay usa nga bantugan nga Cebuano 

Sa rinda san panuratan 

Ginkuha na san Taglarang. 

Nakalabay pala una nga adlaw 

Dida paghuni san kalaw 

Ikaw nagsalin-urog 

Natawhan nga takna. 

Kay nano malara nga balita 

Dayon nagpaabid san amon mga luha. 

Kanugon nga manunurat ni Resil Mojares 

Awtor san mga hag-id nga libro nga namantala, 

Premyado san magkurukadilain nga paisan-isan. 

Usa nga historyador ug kritiko—harigi san mga Cebuano. 

Kanugon nga magturotdo, bag-angan san San Carlos 

Kanugon nga obrero sa kultura, 

Taghimugso san 

Pag-aradman san mga Cebuano. 

Kanugon nga sangkay, kanugon nga amay, kanugon nga katagay— 

Diri la san irimnon kundi san kinaadman nga iya iginlaygay. 

Diri la Kabisayaan an nailo 

Kundi bug-os nga Pilinas nagsusubo 

Kay siya usa nga 

National Artist, utok san nasud san mga Pilipino 

Tinahud ug ginpaparayaw san mga Cebuano. 

Bisan mabug-at pero amon kakarawaton 

Nyor Resil bumaya ka na sa amon. 

Diri ka na igkakahimangraw, amon iiliwon 

Mga pulong mo nga matahom. 

Salamat san imo pagpaambit san imo kinaadman 

San imo kinanuhom nga panuratan. 

San imo kamaupay sa igkasi tawo 

Sa amon dumdum ikaw pagbibilngon. 

Padayon paglakaton sa kamingawan. 

Igsangpit na la kami san mga nag-una kan 

Nyor Tem Adlawan ug Nyor Erning Lariosa 

Ug san iba pa nga mga tumabok na. 

Hikaplagan mo unta an kapawa 

Kaupod an Makagarahum 

Sa dayuday ikaw pumahuway 

Amon manunurat nga pinalangga.

-- PHIL HAROLD L. MERCURIO
Calbayog City, Samar Philippines