5.30.2014

liwas


I
gitangtang na ang mga bandiritas 
ug gihipos na ang inabangang bapols

nag-abot sa kusina
ang labhanang mantel habol punda kurtina
ginamit nga baso kutsara tinidor plato
kawa kandil kaserola kaldero

walay ganahang magpundo sa balay
dili igkita sa bidyokehan ang mga tambay
walay nag-itsa-itsa sa basketan

ang nabugnawng agipo
gidaro-daro sa iro

II
dunay daw hadyong sa buyog
nga moduyog sa matag paglinog
ug dili sama sa kasikas
nga mabati ta sa gawas
wala tay kalibotan kon diing espidnoha
nanukad ang maong kabalaka
sa makadiyot mora tag mga bata
nga gihadla-hadla gihagwa-hagwa
sa kon si kinsa may nagpuyo ilawm sa yuta

unya taliwala sa monunot nga kahilom
mobanos ang laing mga pag-uyog
nga kita ra gyoy makadungog


-- IOANNES ARONG
Lapu-Lapu, Cebu, Philippines

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.