rayaban y borraban
la luz de los espacios.
— El ángel de los números, Rafael Alberti
Timawa ang mga anghel
kay sa tanang panahon sila
balaan.
—Mao ra gihapon, Omar Khalid
Gibanhigan sa mini nga mga
numero ang agianan paingon sa bungtod ibabaw sa sapa sa kilumkilom, ang bungtod
sa kaluwasan. Nagpanon naghitak
nagbuntaog sila nga nanggimok daw salmon sa walang bahin nga gisalig sa bungkig
nga mga bantay. Gitun-an ta ang sa ilang
posisyon ug maniobra. Gikan sa lawod
nasuta nato nga sila hagpaton sa taob ug hunas sa dagat, nga ang ilang mga
lawas mapaubsanong modawat sa gabok nga mensahe sa hangin, letra por letra, nga
sila, entonses, mga ulipon sa kinaiyahan.
Sayon silang isulod sa laang, bantaawng mga biyugol—sama sa huwego de
ohos, sama sa usa ka lasang o ermitanyo diin luwan sa mga giyon sa iyang lambod
nga bungot nagpunsisok ang mga pungway ug ang wala mahimutang nga mga
kalag. Nasabtan ta ang hagit sa sangka
nga naghulat kanato, ang mga layat ug sulbong, bisan tuod sa atong mga ensayo
migamit kita og mga modelo nga de-makina, dili sigon sa napamatud-ang pagdumala
sa kahayag sa tiunay nga batalya (nga sa kasamtangan gipaubos sa panitik sa
walay kinutobang paghunob sa tigmi sa kawanangan). Apan gitugyan ko na ang mga detalye tekniko
sa mga dibuhante ug sa kwerpo de inhenyeros.
Wala silay makita madungog isulti matimahoan nga dautan, alang kanila
nga mga panit ug bukog ang panahon wala maglambigit kanila, maaghop man o
mait-on, ni saag nga tabog sa mga saad nga giluwatan aron sapupohon. Ah, el hambre propone! Gibaid ang ilang
kaigmat sa nagkahanap nga handurawan sa kanhi nilang kinabuhi. Gibaid ang ilang kaigmat sa nagkahanap nga
handurawan sa kanhi nilang kinabuhi isip mga manulonda. Diyos ko!
Kinahanglan ko lang matumbok ang labing huyang nga langgikit sa ilang
depensa, o day-a nga giblang ubos sa suwang sa usa ka ultimo sa amihanang
kasadpan gikan sa atong nahimutangan.
Kaha usa ka huy-ab o haw-ang nga pamilok sa gwardyang linga o
nagduka-duka. Kadelikado baya intawon sa
gimbuhaton sa propeta! Ang kinagamyang sayop mowalis sa telon sa langit ug sa
kahangtoran mahitandangan ang atong kaliwatan sa pinahagsa nga ikamatayng
dagaang sa kamatuoran.
-- VICENTE VIVENCIO
BANDILLO Dhaka, Bangladesh
