tanos

damgo kong mahipos ang katanos

sa hapsay nga dagat

aron mahimo kining kuwerdas sa akong gitara

ug ang paghalok sa tubig sa baybayon

damgo kong matigom sa akong mga tudlo

aron sa pagduyog ko sa awit sa atong lalawigan,

madungog mo pag-usab

ang awit sa atong kasaysayan--

huni sa talidhay ug panag-usa sa atong pagkabata

matag ligo nato sa dagat sa atong tugkaran

human ta motabang nilang Mama ug Tiya

matag Sabado,

matag tapok nato og sigay alang sa luto-luto

human magbansay sa pag-awit

alang sa misa kada Dominggo,

matag sul-ob nato sa mga pako

para sa langgam-langgam

human sa atong pag-anghel sa Flores,

matag pagbalak mo’g tubig-tubig sa may baybayon

samtang ako naggitara niaadtong nadalaga na kita.

damgo kong mahipos ang katanos

sa hapsay nga dagat

aron mahimo kining kuwerdas sa akong gitara

ug ang paghalok sa tubig sa baybayon

damgo kong matigom sa akong mga tudlo

aron motaob pagbalik atong panag-usa

sa atong luto-luto, langgam-langgam, tubig-tubig.

pagkabalita man god nimo

nga nasabtan ko nag nadawat

ang mga pagtulon-an nga gipaambit

sa mga babaylan sa kolehiyo,

nabugto ang kuwerdas sa akong gitara--

nilukot,

sama nako nga nawad-an sa katanos

sa imong mga mata.

-- DESIREE L. BALOTA


Talisay City, Cebu, Philippines