Nabuak ang bildo sa kahilom, ug mibuhagay
ang udtong tutok. Mikaratil og dagan
ang orasan, gigukod sa bakol nga panahon.
Nagpangusmo ang dugdog duyog sa sa gawiris-
wiris nga liti. Miakob ang dag-om sa nanuyhakaw
nga bungtod lahos sa kahidlaw sa ugang yuta.
Midagayday ang mga lugot ug sapa-sapa,
ug gabulhot ang mga truso sa gahaguros
nga suba. Dili mapugngan: bul-og sa himaya.
-- GENE LARIOSA
San Fernando, Cebu, Philippines
2 comments:
Gene,
Anak o pag-umangkon ka ba
ni Erning Lariosa, akong suod higala ug bantogang magbabalak
sa natad sa Katitikang Bisaya?
Nindot nga balak.
Padayon paghablon.
-mananambalak
Sir M,
Morag mag agaw mig mag tagurha ni tio Estoy kay ang iyang amahan nga si anhing Noy Marcial ig agaw man og ang akong amahan nga si Ben Lariosa, pero mag tio ko niya kaw mas taas man siyag pangidaron kay nako, ni testing lang gud ko og tuslo sa akong kumingking ning natad sa pamalak sir M, kay matud pa nila init og nagdilaab kunu ang kalayo ning dapita, og wa gyud ko masayop hapit gyud mapaslot hasta akong kumagko, akong nabati ang dinagaang sa kainit sa mga mamamalak ning dapita..Daghang Salamat sir...
Post a Comment