Diha sa kang-a sa bentana
nangapkap ko sa imong nawong
sa nagdagtom nga panganod
sa nahigmata nga kagabhion.
Gihinol ko ang kada suok
sa gapason natong panumdoman
samtang nangamig ang akong kamot
nga naghakop sa imong kahaw-ang.
Apan bisan sa hingpit nga pagkumkom
miipsot gihapon sa akong mga kuyamoy
ang lusok sa imong ngalan,
ug pat-ak-pat-ak kining nangatagak
bugsok sa akong dughan.
-- ALDEN ARSEN
Daanbantayan, Cebu, Philippines
