Siyam ka Adlaw nga Pag-ampo Alang sa mga Buhi ug sa mga Minatay
I
Alang sa Kalag nga Wala Nato Hingpit nga Nailhi
MANANABTAN:
Alang sa kalag kansang ngalan dili nato litokon,
kinabuhi mga tipik lamang ang atong nasayran,
kansang mga samad atong nakita,
apan kansang tibuok sugilanon wala gayod nato masabti.
Alang sa mga kamatuorang iyang gidala,
sa mga kamatuorang wala niya isugilon,
ug sa tanang butang nga dili na nato mahibaloan.
Mangamuyo kita.
TANAN:
Ginoo, hinumdomi siya diha sa Imong kaluoy,
sama sa atong paghinumdom sa mga tawo nga iyang gibiyaan.
II
Alang sa mga Samad nga Nahinumdoman ug Nalimtan
MANANABTAN:
Alang sa matag kasakit nga iyang gidala
nga daw bag-o pa lang nahitabo,
ug sa matag samad nga tingali iyang nahatag
nga gidala usab sa laing tawo.
Alang sa mga pulong nga milungtad
bisan wala na ang misulti niini,
sa mga sumbong nga wala malubong,
sa mga pangayo’g pasaylo nga nangadunot
hangtod nahimong walay kataposan ang kahilom.
Mangamuyo kita.
TANAN:
Ginoo, hinumdomi siya diha sa Imong kaluoy,
sama sa atong paghinumdom sa mga tawo nga iyang gibiyaan.
III
Alang sa mga Gasa nga Nahimong mga Utang
MANANABTAN:
Alang sa kamot nga nanghatag
apan naglista sa mga gihatag,
sa kaayong gihimong utang,
sa pagkamanggihatagon nga nagpaabot
nga suklian kini og pagkamaunongon.
Alang sa mga midawat
ug sa mga mibati nga adunay utang,
sa matag panaghigalaay nga nagkagamay
tungod sa gibug-aton sa usa ka utang
nga wala gayod hisgoti.
Mangamuyo kita.
TANAN:
Ginoo, hinumdomi siya diha sa Imong kaluoy,
sama sa atong paghinumdom sa mga tawo nga iyang gibiyaan.
IV
Alang sa Garbo nga Milungtad Labaw sa Panaghigalaay
MANANABTAN:
Alang sa mga dekadang nabungkag
tungod sa kataposang pulong,
sa mga sekreto nga gitugyan
ug sa ulahi gihimong armas batok sa nagpadayag niini,
sa kadaugan sa kataposang panaglalis
nga mas dako pa ang gibayad
kaysa sa kahilom nga unta gipili.
Alang sa mga wala makahimo sa pagpaubos,
sa mga dili gustong mobalik,
ug sa mga dugay nang naghulat
nga adunay motabok sa gilay-on tali kanila.
Mangamuyo kita.
TANAN:
Ginoo, hinumdomi siya diha sa Imong kaluoy,
sama sa atong paghinumdom sa mga tawo nga iyang gibiyaan.
V
Alang sa Gugma nga Nakapasakit sa Gitinguhang Panalipdan
MANANABTAN:
Alang sa bata nga gigakos
ug usahay nasakitan sa maong mga kamot,
sa gugma nga nasagolan og kahadlok,
sa pagpanalipod nga nahimong pagpanag-iya,
ug sa mga pulong nga gisulti diha sa kasuko
ngadto mismo sa kasingkasing
nga gitinguhang panalipdan.
Alang sa mga anak nga kinahanglang motubo
ug molabaw sa mga samad nga nabilin
sa mga nagpadako kanila,
ug sa mga ginikanan nga wala gayod makat-on
nga ang gugma kinahanglan usab
mahibalo
sa pagpaminaw.
Mangamuyo kita.
TANAN:
Ginoo, hinumdomi siya diha sa Imong kaluoy,
sama sa atong paghinumdom sa mga tawo nga iyang gibiyaan.
VI
Alang sa mga Matahom nga Butang nga Wala Makapuno sa Kahaw-ang
MANANABTAN:
Alang sa mga butang nga gipakita
ug sa mga kawalay-kasigurohan nga gitago,
sa pagdayeg nga gipangita
apan dili gayod makatagbaw,
sa mga matahom nga panagway
nga wala makapahilom sa dili
mahimutang nga kasingkasing.
Alang sa mga nasayop sa pagtuo
nga ang pagtagad kaluha sa pag-ila,
ug ang kasina sa uban
katumbas sa paghigugma.
Mangamuyo kita.
TANAN:
Ginoo, hinumdomi siya diha sa Imong kaluoy,
sama sa atong paghinumdom sa mga tawo nga iyang gibiyaan.
VII
Alang sa mga Mibiya ug sa mga Gibiyaan
MANANABTAN:
Alang sa mga mipahilayo
sa dihang ang pagpabilin nahimong laing samad,
sa mga gibiyaan ug sa mga mibiya,
sa mga kaminyoon nga dili na maulian,
ug sa mga panaghigalaay nga nahimong mga yuta
nga dili na luwas balikan.
Alang sa mga nag-inusara
sa matag kilid sa siradong pultahan.
Mangamuyo kita.
TANAN:
Ginoo, hinumdomi siya diha sa Imong kaluoy,
sama sa atong paghinumdom sa mga tawo nga iyang gibiyaan.
VIII
Alang sa Lima nga Tingali Motambong
MANANABTAN:
Kaniadto, iyang nahisgotan
nga tingali lima ra
ang motambong sa iyang lubong.
Lima ka tawo sa daplin sa lubnganan.
Lima ka tawo nga maoy mahinumdom kaniya.
Lima ka parisan sa kamot
nga magbilin og mga bulak ibabaw sa yuta.
Wala kita masayod kon
moabot ba ang lima.
Wala kita masayod
kon kinsa ang motindog didto,
kinsa ang dili moanhi,
o kinsa ang magbangotan
nga dili gayod maihap.
Alang sa mga mosukod sa usa ka kinabuhi
pinaagi sa gidaghanon sa mga nagtigom
sa kataposan niini.
Mangamuyo kita.
TANAN:
Ginoo, hinumdomi siya diha sa Imong kaluoy,
sama sa atong paghinumdom sa mga tawo nga iyang gibiyaan.
IX
Alang sa Kalag nga Labaw sa Atong Paghukom
MANANABTAN:
Alang sa mga minatay, kansang mga sugilanon
dili na nato mapangutana;
alang sa mga buhi, kansang mga handomanan
dili kanunay magkatakdo.
Alang sa mga kamatuorang nahitabo,
sa mga nasaypan,
sa mga giantos,
ug sa mga kasakit nga gipahinabo.
Alang sa mga nakasaksi
sa pagkabungkag sa usa ka panaghigalaay
apan wala masayod unsaon kini pagluwas.
Alang sa mga naglukdo gihapon og kasuko.
Alang sa mga nakapasaylo na
apan dili na makabalik.
Ug alang niining kalaga
nga wala nato hinganli,
hinaot dili nato himoong laing higayon sa paghukom
ang iyang kamatayon.
Hinaot maabot sa kaluoy
ang dapit diin matapos ang atong pagsabot.
Hinaot makakaplag og dalan ang pagpasaylo
diin mapakyas ang pagpasabot.
Pahuwaya ang mga minatay.
Buhii ang mga buhi.
Ug inig mapalong na ang kataposang kandila,
inig malaya na ang mga bulak,
inig makauli na bisan ang lima,
hinaot magpabilin ang gugma
diin napakyas ang atong mga pulong.
Mangamuyo kita.
TANAN:
Ginoo, hinumdomi siya diha sa Imong kaluoy.
Hinaot mabuhian ang mga buhi.
Amen.
-- GERWIN VIC E. BHUYO
Bangkok, Thailand
