Ang imong pahiyom nasaag sa lasang.
Ang imong kamot gihikap ko.
Ang imong buhok itom pa sa kangitngit.
Nahikatulog ka taliwala niining dugoong kagabhion
Nga nagtungtong sa pako sa kaadlawon.
(Nagtungtong ikaw sa pako sa akong damgo.)
Laberinto ang hiniusa natong mga lawas.
Ug ang reyalidad masigo lamang sa atong mga kamot.
Nagpadayon og dagayday ang sapa
Paingon sa sabakan sa kinaunhang halok.
Sa halayong dapit, sa labing gikalisangang takna
Karon moabot ang siglo sa atong kasakit.
Gunit sa akong kamot.
Dili ko na ikaw hikalimtan, parapo
Sa akong mga pag-ampo.
Aduna ba kaha'y ugma ang nahabiling
Mga adlaw sa atong kagahapon?
-- LEONEL QUILLO
Intramuros, Manila, Philippines
No comments:
Post a Comment