pagmaya nga linghod pa ang adlaw
di matugkad ang lubnganan aron buntogon mo ang kamatayon
gaksa ang hangin nga makapaigking sa imong kalag
makapangagho sa mananabtan
makapangawot sa alimpo sa mananagna
salom sa dagat ug sayri diin gikan ang kaparat niini
aron tul-iron mo ang bakak nga kamatuoran
tam-is-pait man diay ang kinauyokan sa pasipiko
diin mopahulay ang naglatagaw nga kalanggaman
kansang awit motagbaw sa giuhawng mga balod
lupad, lupad, susama sa abog
maoy binhi nga gisabwag sa kapanganoran
migitib misupang nahimugso ang mga balas sa baybayon
diin ikaw miyarok og bino ilawon sa bulan
tun-i ang sambingay, mao kini ang awit sa balak
ngulngol nga samad, tinubdan sa pagkat-on
tunla ang luha aron mohikyad ang biyuos sa rosas
diha sa imong kalimotaw ang subayanan sa imong damgo
kon ugaling mahisalaag ka sa imong mga lakang
hinumdoming ikaw ang mipaturok sa kabituonan
lakaw, pagmaya daw ang ugma usa ka tigmo
kansang tubag masayran sa imong kaugalingong pulong
-- JOVANIE B. GARAY
Fujian, China
No comments:
Post a Comment