ofw sa arrival

Mao kini  

ang dapit diin kaduha 

sila nitugpa. 

Una, 

ang ilang mga tiil nga gibikog, 

giguyod sa mga pamasin 

ug damgo. 

Ikaduha, 

ang ilang nagkintong 

pangamuyo. 

Samtang nagprosisyon sila padulong sa immigration, 

nagbanos-banos og sabat sa ilang panumdoman 

ang saksak-sinagol nga pagpagikan, ang mga libaong 

nga dalan padulong sa puwerta lahos 

sa uban pang mga puwerta, 

ang mga bougainvilla nga 

nangumpayot sa koral nga kawayan, 

ang mga pundok sa maya ug goryon dapit sa 

simbahan, 

ang nangamay nga putomaya ug sikwati 

ni Nang Sindang, 

ang tuktugaok sa manok sa kabuntagon, 

dungan sa sininggitay sa nakabagdok 

sa Jai-Alai,

ang gihayhay nga mga listahan sa utang 

sa tindahan ni Inday Mely, 

ang nahabiling litrato sa kamagwangan nga 

ni-graduate sa highschool sa niaging Marso, 

ug ang balay nga wala nahuman. 

Didto sa gawas 

niining bag-ong dapit 

naglinya ang mga dili mailhan. 

Ang nagpaabot. 

Ang langyaw nga huyuhoy 

daw nihunghong kanila, 

segun sa pinilo-pilong 

mga pinulongan— 

nangahas, 

ug usa ray masabtan: 

You belong here/ You don’t. 

Busa, ilang ipandong
ang naandang langit. 

Ilang ikupo ang tanang 

gikuptan. 

Ug lagmit 

isalibay ang tanang 

gitugyan. 

-- CORAZON M. ALMERINO
Ontario, California, USA