10.07.2012

pananglitan


(1)
Kinsa kaha'y masayod kon sa akong pagsuroy sa dagat tagsa-tagsaon
nako'g lugit ang kalimutaw sa mga bituong naglurat sa hunasan?
Ang kataw bang wa'y puas nga nagtuhog og damgo sa mga buskay ug balod?
Kun ang parat ba nga silik sa ukoy samtang iyang gilubid ang bangaw
ug gipanitan ang pasil? Kun ang daman ba sa kabugason nga nasangit sa parola?
Kun, di ba kaha, ingon niini: hilom ang gidalit nga limbong sa ngiob nga limod.
Mosuksok sa kahayag ang mata sa kasag. Ug likod sa nanighawak
nga dagkong pagatpat, nagtakoban ang mga aninong way dila.
    
(2)
Inigpamugnaw unya sa amihan ug kalit mosagunto ang akong panaw
ngadto sa way ngalang lasang, kinsay saksi kon sugdan nakog kuot ang hagok
sa naghuot nga yamog ug isunod nakog kumot ang panghupaw sa mga lumot?
Ang nipis bang gabon nga nahisagipot sa pilok sa mga kabog?
Kun ang laag ba nga huyuhoy, mipilit sa pako sa mga saag nga alindanaw?
Kun ang siplit ba sa mga ilahang baki luyo sa gamayng sapa-sapa
human kurawa ang huyunghuyong sa mihaguros nga lilo ug unos?
Kun, di ba kaha, ingon niini: nanapot sa bato sa lim-aw ang himbis
sa nagluno nga baksang wa gani masayod ang mga umang nga nahitabo
ang maong pagkamatay-himugso. Ug kilid sa way saba nga suba,
miduak ang mga kogon aron modimdim sa natagak nga Buwan.


-- NOEL P. TUAZON
Dauis, Bohol, Philippines

1 comment:

M said...

near perfection
almost complete mastery of language
lunsayng Bisayang mga pulong
sa bulawang parnaso gapadulong
si Noel Tuazon

-mananambalak


Daghang salamat sa mga maniniyot nga gapaambit sa ilang mga hulagway sa Google ug Flickr.