Taliwala sa akong hangin ug uwan
ang kahagip-ot sa inyong panimalay,
ug sa inyong pamahaw: mga tumang pangandoy
nga miangkon kanako.
Gidayeg ko ang inyong kaisog
sa akong pagkulikot sa inyong dughan,
bisan kini ningkipos,
madungog nako ang mga tipak-tipak
sa inyong natun-as nga gininhawa, nisubli kini
kanako, miukiot sa yuta,
apan mitapot sa akong mata
ang inyong paglimot sa pag-amuma
sa akong mga igsuon--dili na nako sila mailhan;
bisan ilang mga ngalan inyong gikalimtan;
ang inyong kaugatan, inyong giutlanan.
Pasayloa ko, apan gibundak ko kaninyo
ang akong pagkahunlak, mao kining taknaa
nga akong bawion ang inyong mga kaugalingon
aron inig balik ini, ang mga kalasangan, dagat ug uwan
matinud-anong mangita sa inyong mga tudlo ug palad.
-- CINDY VELASQUEZ
Cebu City, Philippines
No comments:
Post a Comment