tagsingko ra ang bali'g libo nga disgrasya

Taudtaod, 

gitubilan ni Vicente 

og bali'g tunga sa bul

ang diriyot namad-an nga tangke

sa estasyonan sa kang Mario-Este

aron kuno permanente ang kalantip

sa makahubog nga biyahe.

Taudtaod,

gipukaw ni Vicente

ang nagtagpilaw nga binabaye.

Gisikaran ang bat-ang

ug mingulob intawon

ang bagulbol sa naalimungawan.

Kinsa’y di mokaratil og dagan

kon kumoton og taman

ang tuong dalunggan.

Taudtaod,

ang barahan nagmantala na 

og gikusgong marka-bahala.

Didto sa unahan,

ang dako ug habog nga tigguyod

munas’ ginhawang nagbala

og kargamentong bali'g tonilada

wa moayad sa panghagad

nga pakighawok ni Vicente

lakip sa wa’y preno nga hinagwaay

taliwala sa karsada!

--DESIDERIO R. LIBRE

Samboan, Cebu, Philippines

passive aggressive

Gaimpake ka na sab.

Asa na pod ka paingon?

Sa iya na pod, no?

Ingni ra god ko unsa’y naa anang Sugbo.

Kamagayan? Aduna man ko’y Cruz-Taal.

Carbon? Aduna man ko’y Cogon.

Colon? Aduna man ko’y Divisoria.

Lahi ra gyod didto?

Gisumhan na ka’g tsada?

Gusto ka’g nindot?

Di na ka’g lingaw?

Gapangita ka’g alegre?

Hala lakaw.

Layag didto.

Kay kon pul-an na siya nimo

sa ako ra ba ka mobalik.

Ayaw lang pagdahom

nga sa pag-uli nimo

ako pa ang Kagayan

nga imong gibiyaan.

-- MAI SANTILLAN

Cagayan de Oro City, Philippines

hubad sa akong balak nga "silliman beach in the moonlight" (1969)

(alang nilang Wigberto Fuentebella, Merlie Alunan, Rowena Tiempo, ug Fred Yuson)

Gitungab ko ang dagat. Mga balod gadaling

misulodgula O mga imahanduraw* ning dila!

Anaang paraygong bahakhak mo. Balitaw

sa mga bersogaray. Mga kagiki sa aninongbulan

Nagtinikbong uban kanato kanang tangerine nga bulan

Imong tabontabon ug kilay mga taklubo

Mga pilok mo anemone. Kalawasan ta sumbalikhayag

Sa lawing udtokating. Kaluhang bugdo bungdong bunbon

Gisuyop ko ang dagat. Ikaw mitapyatapya sahi

Sa bulan nga nagpauraray ning sabakan tugob sa pagbatisip*

 ___________________________________________________

* imahanduraw ug pagbatisip: mga pulong dagmay minugna ni Myke O.

-- MELQUIADITO M. ALLEGO

Lake City, Florida, USA

tulo ka tipik sa panahon

Domingo sa Buntag

Nahinanok pa gihapon

ang mga lumot sa bato

sa akong lapalapa

samtang gikitoy ko

sa mga tudlo

ang nangumbitayng

yamog sa mga kogon.

Martes sa Hapon

Nangudlot ang kangitngit

sa langit ug madungog

lakdop sa kabog.

Nauyog ang bituon.

Tistis sa pispis.

Lunes sa Buntag

Uphag ang buntag nga wala ka.

Sa bintana, gilantaw ko

ang kalibotan: way upoy

ang anino sa talisay,

nanag-awit sa tinagurha

ang mga lansiyang,

humig sa yamog ang kahayag.

Kiyuom nga mga pako

ang alibangbang sa ngabil.

-- NOEL P. TUAZON


Dauis, Bohol, Philippines

balit-ad

sa mapa diha

sa imong likod

natultulan nako ang kinaham

sa dalan

sa imong dalunggan luyo

sa imong aping

sa imong agtang

sa gabon sa imong labong

nga buhok

labing lamian

ang akong nakit-an

sa dihang mibalit-ad ka

sa dihang nabali usab

ang akong kalibotan

wala nako damha ang dan-ag

sa langit

-- RIC S. BASTASA
Katipunan, Zamboanga del Norte, Philippines

kabalo motultol ang kasingkasing

Sama sa naandan

Wa'y pakyas nga mamalik

Ang mga kabog

Atol sa pagpamunga

Sa tambis sa tugkaran

-- GRATIAN PAUL R. TIDOR
Dipolog City,  Zambonga del Norte, Philippines

akong binasahan sa balak ni Samuel Menashe nga maoy akong gigamit pagsaulog sa bag-ong tuig

Sa ngilit

Sa kalibotan

Halayo sa akong mga mata

Matahom

Nasayod ako nga ang pakahimulag

Kanunayng lunhaw sa paglaom—

Ang sapa

Nga dili nato matabok 

Nagadagayday hangtod sa kahangtoran

-- VICENTE VIVENCIO BANDILLO
Dhaka, Bangladesh