1.15.2016

passive aggressive


Gaimpake ka na sab.
Asa na pod ka paingon?

Sa iya na pod, no?

Ingni ra god ko unsa’y naa anang Sugbo.
Kamagayan? Aduna man ko’y Cruz-Taal.
Carbon? Aduna man ko’y Cogon.
Colon? Aduna man ko’y Divisoria.

Lahi ra gyod didto?
Gisumhan na ka’g tsada?
Gusto ka’g nindot?
Di na ka’g lingaw?
Gapangita ka’g alegre?

Hala lakaw.
Layag didto.

Kay kon pul-an na siya nimo
sa ako ra ba ka mobalik.

Ayaw lang pagdahom
nga sa pag-uli nimo
ako pa ang Kagayan
nga imong gibiyaan.


-- MAI SANTILLAN
Cagayan de Oro City, Philippines

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.