cinema, anemic

Napuno sa alibangbang nga salamin ang dalan 

Nag-amag ang hulma sa numero gikan sa kalendaryong salamin 

Ang gipatik nga titik sa lapidang salamin
Timaan sa patayng lawas nga salamin 

Niining taknaa, ang kalibotan gantuong sa salamin 

Mga walhong pako sa salampating salamin 

Mga kinulit nga kasingkasing nga salamin 

Mga estatuwa nga nagsuka og plemang salamin 

Nahibat ang kuwadradong arko sa bangaw nga salamin 

Misinggit og “Jackpot!” ang maton nga salamin 

Mitabas sa hangin ang espada sa berdugong salamin 

Naghigda sa ER ang pasyenteng salamin 

Mikatawa ang mananambal nga salamin 

Sa gawas, nabuslot ang kadahonan sa ulan nga salamin 

 -- OMAR KHALID 

Metro Manila, Philippines

panganuron

Sa dagat niya iginpapanod an amon kabubuwason, sugad san kun paanano naabuyon an baras nga ginkakadkad san tubig dida sa mga tiil, may sugad kapinit nga nag-uuripon sa iya san padayon nga paghulat. Sa pag-inusahan, nagkakaabot sa iya huna-huna an rason san padayon nga paglutop san rapadapa: an maabot nga bagyo, pag-umento san paraliton ngan kami nga iya mga anak. Kakulop, ginsugad niya si Tatay nga ayaw la anay pagpalawod. Ginbaton la siya nga masuna niyan an bulan. Kagab-i, ginsalinurog nira an pareho nga hagkot san dagat ngan tuna. Maaram ak nga diri gin-iihap ni mama an sibad ni Tatay. Kay labaw pa san iya hingyap nga makasibad san damo nga isda, an pagtapod sa kadagatan nga ig-uuli nga nakakabugsay pa an iya asawa. Yana nga aga, andam igdikit an palad sa agtang para tahuban tikang sa namumuhay-puhay nga dan-ag an mga mata nga nagkikinita san linya kun diin an langit ngan dagat dayuday nga nag-uusa. Ginhuhulat an pag-ulwat san tulbok nga igbubutang sa katapusan san iya kabaraka. 

 -- REYNEL M. IGNACIO 

Calbayog City, Samar, Philippines

upat ka garay alang kang mawo, akong amigo

I.

Mitungha siya gikan

sa suok sa kuwarto. 

Nagkinto sa mga anino 

 sa imong damgo. Hait 

iyang kalimutaw 

daw gibaid sa kahayag 

nga nagsil-ip sa bintana. 

Sabton mo unta ang pinulongan 

sa iyang pagtuaw ug mga badlis 

sa abohon nga balhibo. 

Nagtutok siya nimo 

ug limod sa kahilom. 

Nagpabilin og lanog 

ang huyang niyang pagtuaw. 

II 

Wala nimo siya hinganli’g mga ngalan 

nga halangdon o dagnay nga nasanga 

sa iyang ari, ug wa pod nimo kutlo-i 

gikan sa iyang kolor sama anang 

Whitey, Blacky, Browny, ug uban pa. 

Imong gisipra ang iyang pagmanya-manya. 

Mitubag ka mora’g bata nga 

nakakat-on sa unang pulong. 

Nagtinan-away mo sa usa’g usa. 

Ikaw nagpuyo, naminaw kon giunsa niya 

pagtukaw ang kahilom. Ug anam- 

anam nagtinubagay mo’g “mawo”. 

Sa higayon, mora mo’g mga amaw 

nga naghinganlan og bisag unsa 

sa wanang daw kamo lang duha 

ang nagsinabtanay sa kalibotan. 

III. 

Nianang gabii, naghinuktok ka dapit 

sa pultahan, ngadto sa gibiling kahaw-ang, diin 

nakita usab ang mga higayon sa tingpauli— 

gikan sa pagkabatan-on hangtod 

sa pagtrabaho, nagpaabot siya 

diha sa pultahan, diin mikalit siya'g 

layat diha sa hawakan sa puti mong uniporme. 

Gakatkat paingon sa imong dughan 

aron magpagakos. Apan 

sa imong paghinuktok, nakita mo usab 

ang panghitabo sa miaging adlaw, diin 

napalgan mo siya sa salog, nagluya. 

Gipahigda nimo sa sabakan. Sa imong 

paghapuhap sa iyang balhibo, ningarab siya 

bisan pag gihutoy. Gihagkan niya 

ang imong tudlo sa wala pa moabot 

ang ulahi niyang pagpiyong. 

Nianang gabhiona, nadawat na unta 

ang nahabilin nga kahaw-ang diha sa pultahan,  

apan paghimas nimo sa imong dughan, 

nagkahapdos usab ang nahabilin niyang kamras. 

IV. 

Ang gibati 

nga kabug-at 

niadtong 

hapona, 

wala sa pala 

nga gibitbit nimo 

ug sa yuta 

nga gikalot 

sa luna luyo 

sa inyoha. Anaa 

sa tanang giugot 

sa paghuman 

og pagpahiluna nimo 

kaniya sa kangitngit. 

Taliwala 

sa kurog nimong 

pag-ampo, nayagyag 

ang nagpabilin niyang 

alingawngaw nga dili

malubong sa kahilom. 

 -- TON DAPOSALA 

Cagayan de Oro City, Philippines

alang kang lolo

Lo, moangkon kong dili lalim kadtong mga gabiing magdu’g ta’g katulog. Mga gabii diin ang kalbaryo gisubay sa hutoy, mitugaw sa akong kahinanok. Hutoy mong bisag akong bungol-bungolan, molapos man gyod gihapon bisa’g gitabonan ko’g unlan ang akong dunggan. Gani, gumikan sa di na maagwantang kapungot, kausa giampo nako nga unta mawala na lang ka aron makatu’g nako’g sayo. Apan karon, Lo, sukad ka mipanaw, labing lisod diayng’ katulgan kining gakarat nga kamingaw.

 -- JOJIE E. OGAOB 

Barili, Cebu, Philippines

galab sa takdol

Ania kami alang sa ani, niining gabii sa pagbadbad sa among panumpa. Dili kami modawat og pahinungod kay suhol na alang kanamo ang pagtagamtam pag-usab sa kalalim sa pagbakyaw sa sanggot nga mogutlob sa uhay ubos sa silaw sa bulan nga mibad-ay sa aping sa nanghiting nga kahumayan sa kalibotan diin ang hangin dili makadumili pagtukbil sa among kalimot ug sa maong paagi hikabsan kami sa palad. Sama sa balod nga mapusgay. Sa baybayon. 

 -- VICENTE VIVENCIO BANDILLO 

Metro Manila, Philippines

ayad, baid, tahi

Eletrik pan, 

Wasing mashin, 

Naayad! 

Paayad, Sir! 

Bas' di pumaso an im' ulo.

Bas' gihap malabhan 

An maitom mo na
Nga kalag. 

Sundang, kutsilyo 

Naba-id, payong, sapatos 

Natahi! 

Ayaw na pagpabaid, Mam!

Magtarom na an im' 

Buyayaw. 

Ipatahi nala lugod iton 

Bas' kamo magin 

Mamingaw. 

 -- ERIC ASEO
San Julian, Eastern Samar, Philippines

ugma

ako tong iro 

gawas sa tindahan, kato pung isda 

sa puthaw nga screen (giduyogan 

sa ginagmay’ng dilaab), ako tong 

batang gasamok-samok sa inahan, 

katong iring sa trapal 

gatabon sa sakyanan (apan wala kini 

mag-inusara), ako ang pinikas nga botelya 

sa softdrink: gitam-nan og 

alugbati, gay, ug ubang sagbot. 

Sa wala ug unahan, sa kataposang liko—

didto ang pipila ka ako ubay-ubay 

nga matangtang ug ang saag nga ako 

mahibalik ugma: mosubay 

sa nagkalainlaing ako 

nga sa karon wala pa intawon 

mailhi. 

 -- JAN ANGELIQUE DALISAY 

Cebu City, Philippines

tinagutlo nga tigmo

Sa daplin sa baybayon sa Barili, 

Sa tubig nga wa’y unod, ayaw pamukot. 

Sa kagabhiong wa’y bituon ayaw pangab-ot. 

Sa nagsalimuang nga dughan 

Igaid ang tinguha ngadto sa lawod; 

Ihunghong ang aligutgot ngadto sa mga bawod. 

Sa imong gituohang langit 

Damgoha ang giliming sonata sa uwan 

Ubos sa nagsinanggot nga buwan. 

 (alang kang Jojie Ogaob) 

-- LEONEL QUILLO 

Malalag, Davao del Sur, Philippines

hungihong

Nagkagubot ang mga sulugoon 

sulod sa naghirig nga mansyon 

nga ginama sa liking kawayan. 

Sukad sa dakong lunop 

nga milamoy sa dakbayan gibahin-

bahin nila ang nasalbar 

nga mga kabtangan 

sa mga agalong nangalisang pa 

intawon gumikan sa katalagman. 

Wa pa gani mahuwasi ang mga agalon 

gikan gitakigan, nag-iya-iya na 

ang mga sulugoon og takos 

sa ginamos, asin, ug mantika, dayon 

nagbinirahay sa tinakloban 

nga buwad-tamban. Apan naukang 

ang tanan sa balita nga ang gisugo 

pagpalit og gas alang sa nahubsang 

sugaan wa mahinayon kay nahadlok 

magabin-an. Kuyog sa mikuyanap 

nga anuos ang mga hungihong nga 

dili maayong mogamit og sugaan 

kay kini kuno’y hinungdan 

 nga nangahiwi ang papangig sa silingan.

 -- PAUL RANDY GUMANAO 

Koronadal City, South Cotabato, Philippines

bulan

Ang siga sa bulan 

Misabay sa mga nagdagang mananap sa kalasangan; 

Misunod sa mga naglupad nga Manghak sa kahanginan; 

Nagpatingkad sa mga dahong nahibasa gumikan sa luha 

Sa mga bituon sa kawanangan. 

Nihalok sa akong panit. 

Nisunop sa namugnaw kong kalawasan ang kainit. 

O, nagsigang bulan, dili ka malikayan! 

Midagayday na sa akong kaunoran ang mga tan-aw mong 

Makadani. 

Sa imong kaanyag, milanog sa kalasangan 

Ang mga hinagunghong nga daghong sa kahidlaw. 

Apan, pamati! 

Saksi ang mga nagdukong punoan sa hagawhaw 

Nga pagtubod sa kalipay. 

Ang mga mananap nga nakasaksi ug ang alingising 

Nga mga langgam sa yuta, nagkapagkapag 

Sa nahimong paglagpas. 

Dag-om. 

Karon adunay laing katalagman nga moabot 

Nga sama ka makahahadlok 

Sa pagngulob sa dalugdog. 

Apan sa higayong ako maghandom 

Sa mga taknang nagsiga pa ang bulan, 

Nakamata na lamang ako sa mainit nga hikap 

Sa adlawng' mikusi sa akong panit: 

"Bangon! Giabrihan na ang langit." 

Ug midali ako pagpahid sa di mapugngang tulo 

Sa pag-antos sa nawalang bulan. 

 -- MARIANNE HAZALLE J. BULLOS 

General Santos City, Philippines

kinilaw

Samtang naghiwa ko 

Sa lamas ang lab-as nga tamban 

Imong giputlan og ulo, gihagpatan 

Og bukog, una pa gihugasan 

Sa panaksan ug gisala sa makadaghan. 

Matag witik nako og asin 

Imo pod kining labtikan og bitsin, 

Dayon naglumbaanay ta og puga 

Sa lemonsito, nag-unhanay og pusa 

Sa sili human kini lumsi 

Og igong kaaslom sa suka. 

Nanaad ta nga atong tilawan 

Ang nagsagol nga lasa sa parat, aslom, 

Ug ang kahalang atong saw-an hangtod 

Motiyabaw atong mga dila ug magpangita 

Sa katam-is nga manab-it sa atong wait 

Sa dihang tagayan ta'g tuba kining lab-as nga 

Kahangol sa usa’g usa. 

 -- DAVE PREGONER 

Lapu-Lapu City, Cebu, Philippines

labada

Kabug-at sa imong mga kamot. Sa planggana, 

unsaon kaha nako paggginhawa? 

Sa imong pamati, gilok 

nga gisubay sa imong mga tudlo 

ang akong pagkakum-ot. Apan, napaksit hinuon, 

nakamrasan. Gibali-bali, gibanlawan 

daw latos sa akong kalawasan. Gikumot- 

kumot, gipuga, gipaspasan pagkuso- 

kuso sama sa pagkiskis og mga bato hangtod 

niawas ug nahupas ang mga bula. 

Di ba, bisan pa’g usa ra ko 

sa imong mga bulingon, ngano man 

nga kanunay ko nimong sul-obon? 

Apan bisan pa’g ang kainit sa usa ka 

halok mabati nako sa imong panit, magpabilin 

ang akong kalangto ug magbalik– 

balik ang mga mantsa. 

 -- IVAN RIDGE ARBIZO 

Davao City, Philippines

tigmo: “dili akoa, dili imoha; sa tanang tawo gipanag-iya”

1

Kalibotan kini nga wala’y kahingpitan ang pag-angkon. Dili molungtad ang gitukob nga tumong  sa kahayag ug kangitngit— ulo ug ikog sa kapakyas sukad gapulipuli sa pagbalikos. Mabalhinon, malipoton. Sama sa nailhan sa pinaangkan nga dili gyod madala’g tambag ni Manding Karya, ug wala’y gidalit nga agik-ik duyog sa mga awit ni Yoyoy. Sayon rang sul-obon ang maskara. Dali ra ang paglingiw diin ang alimyon kanunay dagiton sa huyuhoy, mobaliwliw sa mga buyog. Ingon ini ang atong kaagi. Pastilan, makasingkaw ug makalisa kon layo’g abton ang paghuyatid sa panumdoman. Bisan hagbay nang patay si Noy Tiago, ang akong tighilot sa wala pa ko’y buot, kab-oton ug hapuhapon unta ta niya pag-usab. Ug kon mahimo pa lang, mahilam pod unta ang kawanangan sa kamingaw nga gibati ni Salayaw, usa sa upat ka Mangyan ug uban pang mga lumad natong kaliwat nga gikatahong gidagit sa mga Kano aron ipasundayag sa 1904 St. Louis Exposition sa Missouri. “Nahisulat sa hangin ang tanan…,” segun pa sa usa ka haranista. Paminaw, atubanga ang upat ka suok sa katugnaw. Kon di masayran nganong kanunay pikas ang dagway sa kalimot, wala ta’y kalibotan. 

Dinhi ang buwan 

ug dama de noche 

uyon sa uwan. 

2

Middle Passage tadlas sa dili matidlom nga urom. Historia de Las Indias ni Bartolomé de las Casas. Trail of Tears sa mga nasod nga Chickasaw, Choctaw, Creek, Seminole, ug Cherokee. Mga panid sa gabii ni Elie Wiesel. Mga hunghong sa mga hibakusha. Mga landong sa kalunhaw nga gilambosan og Agent Orange. Mga bata sa Syria nga gipatuskig sa Sarin gas…. Kausa, matod pa ni Bronislaw Malinowski, nakighinabi siya og usa ka tiguwang nga kanibal. Kabahin sa dakong gubat sa Europe nga iyang nadunggan, gisukitsukit niya si Malinowski giunsa paghabhab sa mga taga-Europe anang labihan kadaghan nga unod sa mga tawo. “When I told him the Europeans did not eat their slain foes, he looked at me with shocked horror and asked what sort of barbarians we were, to kill without any real object,” pamatuod pa niya dihan sa libro nga Argonauts of the Western Pacific. Kon nanginit pod imong aping sa kaulaw ni Malinowski, sama ra tingali’g nanghilam-os ka sa inalisngaw sa Fukushima. Ingon ini pod tingali ang hinungaw sa mga tiningob nga lubnganan sa Tacloban alang sa mga nalumos nga wala-hiilhi samtang ang ilang mga minahal padayong galutaw sa kasubo: wala’y kalibotan. 

Dinhi ang adlaw 

sa laing tingpamulak 

tipon sa lamaw. 

 -- MICHAEL U. OBENIETA 

 Topeka, Kansas, USA

tago-tago

Miingon si Ysabell, “Dali, Lola, manago ta!” 

ug ako mitubag, “Sige, Ysabell, 

manago ta sa kortina sa ulan. Puston ta 

ang atong lawas sa mga pilo sa tubig 

ug didto, masihag ta ang kabalayan 

nga naglinya sa daplin sa karsada; 

may mga tawo nga nanambo sa mga bintana, 

may mga pulang pultahan nga mga dagkong kanbas

nga gipintalan sa salibo sa uwan. 

Sa kilid sa bungtod, ang mga kakahoyan nagkapa-kapa, 

mga polis nga nagkupo ug berde, nangita, 

nangitag mga tawo nga naglibod-suroy, 

walay mga tumong, walay kapaingnan, 

ug dagiton nila ngadto 

sa prisohan sa mga yaweng walay kandado, 

prisohan sa mga tutonlan, 

ug mga baga nga gustong molupad. 

Manago ta, Ysabell, 

diha sa taligsik nagpahipi 

ang imong agik-ik; dili ta nila hikit-an dinhi, 

sulod sa humok nga seda sa uwan; 

dili ta nila hidakpan nga naghupo 

sa sidsid sa habo-habo; 

apan unya, unya inigtuwak na, 

inigkayab sa panganod, 

mobalhin ta ngadto sa langob sa bangaw.”

-- ESTER TAPIA 

Nordrhein-Westfalen, Germany

katipunera sa kaadlawon

Usa na lang ka oras, 

mobiya na ko. Andam na 

ang akong armas. Sakto na 

pagkabaid 

ang akong pagtuo. Nagpanikad na 

ang akong mga lapa-lapang 

motunob sa dalan 

sa pakigbisog. Apan sa dili pa ko 

monaog sa among panimalay ngadto 

sa ngitngit nga palibot, ania 

ang mga kataposan nakong 

panamilit: halok sa nahinanok 

nga manghod, gakos 

kang Nanay nga nanambok 

gihapon sa pag-ampo, pagkupot 

sa namugnaw nga kamot 

ni Tatay. Hinaot unta 

masabtan ni Tatay 

nganong ako 

nga hanas na sa kusina 

ug makapabusog na daw 

og bana pwede gyod 

moharong sa gubat 

sa bag-ong kaadlawon. 

 -- DELORA SALES-SIMBAJON 

Butuan City, Agusan del Norte, Philippines

ang matang sa tubig nga makauhaw

Tubig nga gihikaw. 

Tubig nga gibugwak ngadto sa kalungsoran. 

Tubig nga taga-liog sa katawhan. 

Tubig nga midagayday sa nawad-ag balay. 

Tubig pula sa tawong sa daplin nagbad-ay. 

Tubig nga gibomba sa tilaok sa pinosasan. 

Tubig nga gipasirit sa nagpanon sa dalan. 

Tubig nga gikawat sa dato. 

Tubig itom nga mililo sa banga. 

Tubig nga mibutoy sa ulo sa batang nagkutoy. 

Tubig nga tin-aw sa baso sa mayor. 

Tubig sa agtang sa nagpas-an og sako. 

Tubig nga gisag-ob sa mga langyaw. 

Tubig binotelya. 

Tubig nga kinoral. 

Kagahapon, sa pagpasidaan sa kilat ug dugdog 

nga nagsingabot na ang bul-og, 

nagkaratil og panago ang mga ilagang paw't. 

 -- JANUAR E. YAP 

Talisay City, Cebu, Philippines

art exhibit

Ang dakbayan usa ka dakong museyo, ug kita ang mga obra nga gipangsab-it sa tagsa-tagsa ta ka espasyo. Way timik nga mga anino sulod sa binungbongan tang kalibotan. Giiwagan sa mini nga kayahag. Ako nga naghinuktok atubangan sa bintana. Ikaw nga nagkupot sa imong cell phone. Siya nga nagpakli-pakli og usa ka basahon. May babaye nga gainusara sulod sa cafe. May managtiayon nga wa magtingganay. 

Sa matag karon ug unya, may mga estranghero nga manglabay. Mohunong sa atong tungod aron tutokan ta sa makadiyot, estudyohan ug kuhaan og hulagway. Ug sa ilang paglakaw, bitbit na nila ang tagsa-tagsa ka impresyon ug interpretasyon sa kon unsa ug kinsa kita. Mora ba’g kini-- lakip ang atong kagul-anan, kasakit, pag-inusara, pagbati, pagkatawo-- mga souvenir lang sa usa ka bakasyon. 

-- GRATIAN PAUL R. TIDOR 

Dipolog City, Zambonga del Norte, Philippines

huwaw

                                                                                     ang 

                                                                           usa ka tuig nga 

                                                                                  huwaw 

                                                                               tagbawon 

                                                                    sa kataposang tulo sa 

                                                                                       u 

                                                                                       w

                                                                                       a 

                                                                                       n 

 -- JOVANIE B. GARAY 

 San Isidro, Davao Oriental, Philippines

pasidaan

Ang laway sa tabian 

mga lagong nga puwa’g 

lubot, misuksok 

sa imong dunggan; manusuktusok 

sa kahiladman. Kulkoga kini, kuhaa 

aron di madaot ang

imong pangdungog 

kon kini mangitlog. 

 -- JONDY M. ARPILLEDA 

Tandag City, Surigao del Sur, Philippines

panupak sa pasidaan

Hagbay rang misuksok ang lagong 

sa imong dunggan sa wala pa kini 

gitandi sa laway sa tabian. Tingali, 

wala nimo masuta kon unsay 

kalainan sa dayag nga batikos ug 

hagunghong sa tikasan. Mao nang 

dili katingad-an kon nganong 

makabungol ang kamatuoran. 

Sa suok sa napan-os nga kahiladman, 

napusa ang mga itlog sa hubag 

nga bulatik. Basin ang mga ugat 

sa utok gipistahan og mga ulod. 

 -- TON DAPOSALA 

Cagayan de Oro City, Philippines

bun-og

ang trahedya 

sa griyego 

dihas lagom 

nga epiko 

sa usa ka sipi 

sa saging 

nga nakusian 

og gatosang 

mga tudlo 

aron susihon 

unsa kahinog 

ang hinog 

 -- ADONIS G. DURADO 

Athens, Ohio, USA

liog sa takna

Ugma sa gabii, 

sa takna sa pangadye, 

adunay daghang liog, 

lain-lain nga mga liog: 

adunay hagkan, 

adunay paakon, 

adunay tuk-on, ug 

adunay lubagon o 

di ba kaha bitayon. 

Mopili ra ka sa pamaagi 

sa imong kamatayon: 

halok sa saad 

nga di tumanon; saad 

sa gugma nga di tinud-on; 

gugma sa tawo nga 

dili matinud-anon, o tawo 

sa gugma nga dili matinud-anon, 

o di ba kaha magaid sa gibati 

nga dili paminawon. 

 -- ELVIN E. RUIZ 

Liloan, Cebu, Philippines

alpha et omega

gikulit ibabaw sa pligo sa tubig 

nga mibad-ay sa sikbit nga panas 

ang mensahe sa lunhawng lim-aw 

alang kanatong mga pinili 

mga saksi sa pagburot sa aping sa mga anghel 

nga mohuyop sa pasakalyeng mga nota 

sa Simponiya sa Kamugnaan 

o kaha ang tulin nga panaw 

sa gadilaab nga bugway sa abog-wanang 

nga gakugos sa saag nga binhi 

nga walay pangalan ni panalangin 

tungod sa kalaay mahisimang 

lusot sa gansal nga mga ugsok sa kangitngit 

ug mahitumpawak sa kahangtoran 

-- VICENTE VIVENCIO BANDILLO 

Metro Manila, Philippines

abo sa atong mga mata

Nangataktak, 

naglutaw-lutaw ang imong 

mga buak nga larawan 

nga giguhay-guhay sa talinis ug

kalit nakong pagkidhat. Unya, 

sa paghuros sa hangin, manuksok 

ug mang-uk-ok kini 

sa mga gingi-gingi sa atong kalimutaw 

ug magpangita sa tagsa-tagsa nila 

ka dapit. Lugoron o ipikat-pikat man 

sa tubod sa tin-awng sapa 

ilawom sa nagdagtom nga kalangitan--

mosamot kini pagdaghan, magtapok 

ug magtibug-ol hangtod mopilit 

sa salabotan. Busa, langga,

inig kaugdaw sa atong gihaling 

inig bundak sa uwan, 

manghangad unya ta ug

manghilam-os. 

 -- MICHAEL FLORENTINO 

Ormoc City, Leyte, Philippines

kang mama kining balak sa kadlawon

Ping-ot sa akong ilong, 

        balik sa akong dughan, 

aron di ka magdugang- 

dugang sa gitiyabaw 

        nga dul-ay sulod sa usa 

ka duyan. Matag pugos 

nga ginhawa sa baga, 

        makasikma’g bala, balas 

ug balahibo sa iring nga 

gatulog-tulog ilawom 

        sa hagdanan. Antosa’g 

dala ning kabug-aton 

tungatunga sa ilong ug 

        buna hangtod mohupong 

og lubi. Lanlana gyod ang 

gata sulod niining bunga. 

        Mahunad na gyod nang 

kugmong nagbitay sa ilong, 

tutonlan, ug kilid-kilid 

        sa unlan. Ay’g banlasi’g 

luha ang duyan kay 

lahos-lahos na ning 

        pagluspad sa gabii ug 

pagpulapula sa buntag 

ug pagmatamata nga

        galaway, gabuwa-buwa'g 

ginagmay nga awit. 

Matag piti: gadungan 

        sa koro sa alibangbang 

ug bukalbukal sa init- 

tubig didto sa kusina. 

        Ping-ot sa akong ilong, 

balik sa akong dughan, 

aron di ka mahimong 

        takuri: nabutdan ang 

tiyan, nabutha’g simod. 

-- MIGUEL ANTONIO B. GARCIA 

Zürich, Switzerland