kalidad batok kantidad

Kalidad di kantidad

Ayaw pagpugsa
Kon walay musa

Balak pinugos
Samag nanglugos

Turagas mga pulong
Gatuwad bubalintong

Batoning disiplina
Parnasong bahalina

Balak usa ka gatos
Usa duha ray santos

Higaladagang
Hinayhinay lang

Di kini lumba
Adunay Ugma

Kalidad di kantidad


-- MELQUIADITO M. ALLEGO, M.D.
Palm Harbor, Florida, USA

Hulagway ni: TITO ALQUIZOLA

nahikatulog nga manulonda: usa ka panan-awon

daligdig sa tun-og nga hangin
sama sa balhibo nga natagak
gikan sa tutonlan sa alimukon
ang mapahiyomong dumuduong mipadal-os
sa iyang lawas
lusot sa huot nga gawang
sa katingalahan niyang sakyanan
ug sa atong kahadlok
nga wa nato maabi-abi ang mikagiwng ting-init
milingiw ta dihang dihay panganod
nga mitugdon sa atong dughan
sama sa gininhawa
sa usa ka manulonda nga nahikatulog
luyo sa salamin sa kahaponon


-- VICENTE VIVENCIO BANDILLO
Dubai, United Arab Emirates

resulta sa bunyag

(hubad sa balak ni Octavio Paz)
















Ang batan-ong si Hassan
Buot magminyo sa usa ka kristiyana
Nagpabunyag.
Ug daw usa siya ka Viking,
Ang pari
Nagngalan kaniyag Eric,
Karon
Aduna na siyay duha ka pangalan
Ug usa ka asawa.


-- LEO BOB FLORES
Bukit Batok, Singapore

sa dihang nangluod nako ang musa

Niundang ang dagayday sa tubig sa suba.
Niurong ang balod sa tunga sa dagat.
Nituskig ang dahon nga wala nakatugdon.
Nihilom ang taghoy sa alimukon.

Samtang ang akong mga kamot
Nga nagkapot sa laptop nga naghulat
Sa akong mga mando naghinuktok usab.
Naghulat kaming tanan
Sa pagbisita niining luoran
Nga musa sa kawanangan.

Gibaliw nako ang akong kasingkasing
Aron madunggan ang taginting.
Gipiyong nako ang akong mga mata
Aron makakita ko sa himaya.
Gihalad nako ang bulawan
Ug sa pagpanguyo gipatabanan.

Apan wala koy laing nahimo--
Kini rang balak nga nagbakho.


-- MARIA VICTORIA BELTRAN
Cebu City, Philippines

ang hangin, usa ka masin-ag nga adlaw

(hubad sa balak ni Antonio Machado)
















Ang hangin, usa ka masin-ag nga adlaw, mitawag
sa akong kalag uban sa kahumot sa jasmine.

“Akong ibaylo ang kahumot sa akong jasmine,
sa tanang kahumot sa imong mga rosa.”

“Wala akoy mga rosa; ang tanang mga bulak
sa akong hardin nangamatay na.”

“Na, akong dad-on ang mga tubig sa imong mga fuente,
ug ang lawos nga mga gihay ug ang lalag nga mga dahon.”

Ang hangin mibiya. Ug ako mihilak. Ug miingon sa akong kaugalingon:
“Unsa ma’y imong nahimo sa hardin nga gipiyal kanimo?


Paghubad ni:
-- URIAS A. ALMAGRO, M.D.
New Berlin, Wisconsin, U.S.A.

sa gabii

Ayaw kahadlok. Ang tingog sa linti
Tingog kana ni Tatay. Ang hagunos sa hangin
Tambag ka na ni Nanay. Ang kilat
Kihat kana ni Ibyang.

Katulog lang. Ayaw kabalaka kay niining

Nasod sa kalayo, ikaw ang tubig.
Sa imong balay sila mga anino
Lamang. Manglabay lang sila.
Ikaw ang tinood nga lawas.
Ug magpabilin ka.

Kon makakita ka og
Sigbin nga nagtuwad sa imong salog,
Ayaw kahadlok. Ikaw kana nga gisulaya’g
Lumping sa kahayag sa bulan
Ia imong bintana diin
Daghang lumot.

Basa ang siradora. Ayaw kahadlok
singot lang kana ug mga higala mo sila.
Tinuloan sa imong atop nga buslot.
Miulan na . Nagsugod na
Og tulo. Ayaw kahadlok
Nga ikaw mabasa. Miyukbo lang nimo
Ang langit. Gihatdan ka lamang
Sa daghang linya sa imong
Mga balak karong gabhiona.

Ug anaa na pod ang mga baki,
Pamatia. Nagsugod na og pangharana.


-- RIC S. BASTASA
Katipunan, Zamboanga del Norte, Philippines

islamorada

Mga inanong pulo nanagdugtongay Mga
katunggang yawe sa lapalapa sa Miami
Usa ikaw niini

Miambangol mga balod nangapusgay pagtamparos
sa baybayon Balaybakasyonanan balaskastilyo
nangatumpag Nabanlas mga gapnod kondon tong
sanglas sandal ubp Pantiyong ulan-hangin
giitsa-itsa sa natarantar huramentadong dagat

Lilang bulok sa kalawran gisul-ob mo karon:
Wa panumbalinga ni tagda sa ganghaan
Namukpok hubog urakan

-- MELQUIADITO M. ALLEGO, M.D.

Palm Harbor, Florida, USA

haiku: ang pak-an

gilak sa lim-aw,
adlaw'ng misalop-- langgam
mubo og lupad


-- CANDICE SALAZAR
Calgary, Alberta, Canada

tantrum

Saba diha uy! Laparohon tika ron.
Ingon ka ako'y kinakusgan
Sa mga tawong imong nailhan.

Pultahan ra gani imong gisirad-an--
akoa man lagi'ng gihilakan.


-- CHARISSE MARI S. FONACIER
Cebu City, Philippines

kon ako malipayon

(nga talagsaon ra kaayo)
















mosulat kog
gagmayng
mga balak,

nga tingali
baratohon,
apan dili

mapalit,
sama sa
pahiyom

sa usa ka
anak nga
gihilantan.


-- VICENTE VIVENCIO BANDILLO
Dubai, United Arab Emirates

lunes sa b-flat

(hubad sa balak ni Amiri Baraka)

Ako nag-ampo
Tibuok adlaw
Apan ang Ginoo
Wala wala moabot.

Apan kon ang akong tawagon
911
Ang demonyo
Mobutho
Dinhi

Sa pipila lamang ka gutlo!

-- LEO BOB FLORES
Bukit Batok, Singapore

kanunay

Matod pa ni John Keats. Ang katahom
Mao ang kamatuoran. Apan dinhi
sa atong handurawan, nanguhit--panuway--
kada adlaw ang kangil-ad. Kanunay.

Kagahapon, gikilaw sa amahan
ang iyang kaugalingong anak.
Karon, gilabay sa tanan
ang ilang basura sa dalan.
Dili na ko matingala kung
ugma magpadal ug bomba ang nasod
sa Russia padung sa ilang silingan
sa Georgia samtang sa Kidapawan,
nagkaguliyang ang atong kaigsuonan.

Lisod tunlon apan ang kangil-ad
kanato giladlad. Mao na ni karon
ang katahom sa panahong gaalindasay.
Kini atong kamatuoran. Kanunay.


-- MARIA VICTORIA BELTRAN
Cebu City, Philippines

hubad sa usa ka balak ni rumi

(sumala sa bersyon ni Robert Bly)

Nabuhi ako og gatosan ka libo ka mga tuig nga usa ka mineral,
Ug unya namatay ako ug nahimugso pag-usab nga usa ka tanom.

Nabuhi ako og gatosan ka libo ka mga tuig nga usa ka tanom,
Ug unya namatay ako ug nahimugso pag-usab nga usa ka mananap.

Nabuhi ako og gatosan ka libo ka mga tuig nga usa ka mananap,
Ug unya namatay ako ug nahimugso pag-usab nga usa ka tawo.

Unsa man ang akong napildi sa akong pagkamatay?


Gihubad ni:
-- URIAS A. ALMAGRO, M.D.
New Berlin, Wisconsin, U.S.A.

kon ako inyong pabasahon sa akong mga balak

Kon ako inyong pabasahon sa akong mga balak
Sa inyong atubangan
Ako usang hangyoon nga palungon
Ang tanan nga mga suga
Aron unta ninyo maaninaw pag-ayo
Ang akong dyutay nga kahayag
Ug basin ako mabuta ug masunog.

Idugang pod nako’g hangyo
Ang dyotay nga kahilom.

Hadlok ko nga ang akong mga pulong
Dili ninyo madungog sa taliwa
Sa kahigwaos ug sa kasaba sa atong panahon.

Maglatay ako sa alambre sa akong mga pulong
Sa tumang kangitngit ug kahilom.
Inyo unta akong dunggon
Inyo unta akong paminawon.


-- RIC S. BASTASA
Katipunan, Zamboanga del Norte, Philippines

bungog

Gikapoy ka na tingali'g basa
sa akong blogspot:
Katloan ka balak.
Napulo'g usa ka awit.
Liboang adhetibo
mahitungod kanimo.

Gipul-an ka na siguro.
Sobra ko ka-emo?
Lagi, di ko maimo.
Sum-ol na, no?
Puros reklamo,
Tuyok-tuyok,
libot-libot.
Mora ra ba'g duna'y maabtan.
Ambot kaha kon asa.

Gikapoy ka na tingali'g basa.
Naabot ka man lagi ngari
sa kataposang linya?

(Ha ha, katloan ug usa.)


-- CHARISSE MARI S. FONACIER
Cebu City, Philippines

humana ba ang kuwaresma?

Humana ba ang kainit
sa udtong tutok niining
baybayon diin nangaliki
ang mga patay nga kinhason?

Humana ba ang imong
tinagoang pagtukaw sa dihang
ang atong mga lawas niligid
sa lapok gikan sa atong pus-on

Nawagtang na ba ang kusog
sa imong mga braso sa paggakos
susama sa mga sanga
nga wala na’y mahuptang dahon?

Nahupsan na ba imong dughan
kay dili ka na man moyamyam
og"pwera pungag" sa katahom
ug alimyon sa Flores de Mayo?

Natapos na ba ang tanan
ug wala na’y laing katuyoan
gawas sa imong paglabay lahos
og biya sa akong pagkalawos?


-- LIYO DENORTE
Cebu City, Philippines

ugma damlag, gikan sa akong pagkasaag

Pasagdan, dili nako balihon akong gisul-ob
Sa higayon nga lamyon ko sa lasang kutob
Sa kigol sa salumsom. Tunlon lang pod nako
Akong dila kon molayat ug mopilit ang tuko
Sa akong dughan. Igo lang kong mohunong
Kon ang halas mowitik sa iyang hunghong
Tadlas sa suliyaw taliwala sa kangitngit--
Kaguliyang sa gangis, baki, kikik, kwaknit.
Tingali’g ilang gisaw-an ang pagbangotan
Sa buwan, gahuwat sa pagbawi sa hinulman
Nga kahayag. Mobalik ra gihapon ang adlaw.
Sa kinasang-an sa katingala ug alimungaw
Mahimong tapot sa akong panit ang gabon,
Gatultol kanunay paghabol sa mga dahon.


-- MICHAEL U. OBENIETA
Topeka, Kansas, USA

pula

inig pakasal nako ugma
isul-ob nako ang bistida
nga bulok pula

gugma
sa isig ka usa
kalayo
sa kaldero
rosa
sa akong mga mata
swerte
sa negosyante
buylo
ni kupido

ug inig labang nako sa da'n
hunong mong tanan
aron dili mo maligsan


-- MARIA VICTORIA BELTRAN
Cebu City, Philippines

baraha

Human saksaka
ug kortihi
ang baraha sa atong mga adlaw,
tagsatagsa kitang giapod
og tagpito kabuok.

Kita ray maantigong mobahig
ning gibahin kanatong mga baraha
ug kita ray makamaong mopili
kon hain man ning atong mga gikuptan
kadtong atong ibilin,
kadtong atong ibiya.

Ug kita ra usay mahibalo
kon dibuynas
o dimalas ba
kay tua na man didto sa taliwala
ug di na mabawi
ang atong mga kinabuhi
nga atong gitaon,
atong gihurot pagposta.


-- URIAS A. ALMAGRO, M.D.
New Berlin, Wisconsin, U.S.A.

sa silangan ug sa kasadpan

Samtang ang mga bata
Sa silangan

Nagtampisaw sa
Pangaligo sa ilalom
Sa ulan

Lahi usab didto
Sa kasadpan

Diin ang tigulang
Nagpungko

Sa iyang pag-inusara
Namati sa tingog
Sa ulan

Naglantaw
Sa pagkahulog niini

Sa yuta nga sa kanunay
Nagpaabot sa
Kataposan

-- RIC S. BASTASA
Katipunan, Zamboanga del Norte, Philippines