tankadarohan

lunhawng balili

mga kiay gabayli

tabanog hagtos

ang hangin gahaguros 

ang kanding gahingiki 

-- DENNIS S. SARMIENTO                                                                                                                 Baltimore County, Maryland, USA

terra nova

(nunot sa “Frau bei der Selbstbefriedigung” ni Gustav Klimt)

Dihang gitutokan tika’g maayo

buwak ang imong sayal

nga mibuswak sa wanang

sa imong pagbilangkad.

Diha sa imong gisimhotan,

gidimdim pod nako

ang gialilang mong tanaman.

Sa imong pagkuray,

ang mga linya nga angay

untang ilatid sa imong hugis

nawiris. Taliwala sa birisbiris

sa imong pagkuray,

imo dayon gitudlo kon asa

agihon ang ganghaan paingon

sa himaya nga imong giduaw

ning higayona. Unta lang

inig padayon ko sa pagsusi,

moabli ang imong mga mata.

Kay, na, mogawas gyod ka

sa imong gitugpahan

aron makasaksi sa gakadaiyang

bulok nga gakampat sa wanang

sa higayon nga mohupaw ko

sukad sa pagtutok nimo.

-- TON DAPOSALA                                                                                                                        Cagayan de Oro City, Philippines

magic johnson

lupig pa may

nakaikyas sa taro,
sa nag-asong sabaw
sa bakang linat-an,
diriyot nakatunob og hinulmang
tinagak nga kainit sa kabaw
sa basang kabuntagon
(paingon kon asa ang timon),
iro nga daling nakaipsot
sa naghagong nga sakyanan
sa kahigayonan,
kinumot nga katuigan,
nadakdakan daw linusak
sa maalamong kamot
sa manulonda,
kay karong tungora,
pugngan pang biga
nga naanod sa baha,
napaso na gyod
intawon sa kalendaryo.
pero kaluoy sa diyos,
wa pa biya madakpi
sa lanat sa pagkabata,
naabti sa hunas sa bagsik
ug kalagsik, pwera buyag,
mabagatan man tuod
og tun-og panagsa
apan way panuway nga
di makurat sa lingo-lingo
ug wara-wara sa kwanggol
nga manlanlanay
og hilawng kinhason.
hala, gukod, kamatayon!
gukod!

-- ERIK E. TUBAN                                                                                                                                   Muscat, Oman

misogynist

gilaksi gimugna gikan sa maambong gusok

gikasilagan nagpakaaron-ingnong kahuyang

tumban tampalingon kong katahom nagpunsisok

nganong niyuhot naniyot ning hambong higdaanan

-- MELQUIADITO M. ALLEGO                                                                                            

Pensacola, Florida, USA

lapas sa kaadlawon

Samtang hilom nga gaalirong

ang kabugnaw— kining nabahaw 

nga salin sa kagab-ihon— gahinay-

hinay pod og huyatid ang sidlakan 

duyog sa paugat sa sunoy .

Gahagok pa ang kahaw-ang

sa lawak. Gahuwat pa intawon ko

sa nasaag nga kahinanok samtang

gaandar pa ang tambutso lahos

taliwala sa akong duha 

ka dunggan, kining biniyaan nga

kanaas, gasubay sa hangin 

nga gaapas kanimo…

-- R.L. BERTULFO                                                                                                                            Talisay City, Cebu, Philippines

iya-iya

nagpalami ko

nagpalami ka

wala na gani kita
makalung-ag

nia buntag na
nagawsan ka

ug ako wala pa

-- RIC S. BASTASA                                                                                                                      Katipunan, Zamboanga del Norte, Philippines

pagpaabot

Naanad ko’g luto alang sa pito ka tawo.

Apan, karon nga nag-inusura na ko,

labing lisod pa man dia’y magluto

alang ra nako, lakip ang akong anino.

Wala na’y mga kagubot sa kusina.

Wala na’y mga mumho sa lamisa.

Wala na’y mga plato nga biyaan.

Wala na’y mga sugilanong giambit.

Wala na’y mga pagdayeg sa sud-an.

Wala na’y mga pahiyom ug katawa.

Maong karong gabii, magluto ko

sa tanang ninyong mga kinaham.

Pito ka plato ug daghang adobo.

Adto ta kaon sa gawas duol atong

punoan sa santol ug kaymito.

Maghuwat ko sa inyong pag-abot

sama sa paghuwat ninyo sa akong

pag-abot gikan sa Hongkong.

Apan, nahanaw bisan ang mga punoan

gikan niduaw ang bagyong kinakusgan.

-- CINDY VELASQUEZ                                                                                                                        Cebu City, Philippines

kinahanglan modag-om ka aron ko makapahiyom

Misakay na ko sa purlon, ‘day.

Wala ko makapalit og kalipay

Nga matod mo makita sa kamay sa pinaypay.

Gabilar ko tibuok adlaw kagahapon,

Namasin moabot ang kagabhion

Sa kang-a sa udtong tutok,

Namasin mobalik ka sa akong atubangan,

Dili sa akong kiliran nga samaran.

Kon mobalik ka, maabtan pa ko nimo.

Makasakay ka padung sa de-aircon nga espidno

Uban sa akong duha ka kagirong iro 

Nga magtambisay ang laway kon makakita 

Sa imong halang nga mga bukog,

Mouwang duol sa imong tuhod kon makatimaho

Sa imong pahumot nga gikan sa lalaking way baho. 

-- KEVIN A. LAGUNDA

Lilo-an, Cebu, Philippines

gapula, gahubag

Sayon ra baya

ang pagtambal sa piskat.

Pagkuha’g lima ngadto

sa pito ka palwa sa kamunggay.

Pilia nang gulang. Sagoli’g ugat,

kanang linghod, uban sa bunga:

tunga sa kumkom. Dukduka.

Ang duga salaa, dayon patuloi

ang mata. Unya, ang gikusgon

sa tiyabaw mag-agad

sa kahalang sa kalimutaw.

Mawala ang piskat apan

ang kabulhog hayan

magpabilin.

-- DON FERROLINO                                                                                                                  Norzagaray, Bulacan, Philippines

silaob

espidnong gadilaab

akong kasingkasing
sukad gisilaban mo
ang akong mga luha

-- RODELIO BARELLANO                                                                                                                  Caloocan City, Philippines

ang lahing dagway sa luha

Balaan kining matanga sa yamog

nga sagad mahulma kon matandog

ang pulang tigbayon sa sulod—

dali rang moungot ug lisod 

ang hapsay ug hingpit nga dailos

kon wa’y gibug-aton ang katim-os.

Pangga, ayaw na lang katingala

nganong kanimo dili ko mauga.

-- JOJIE E. OGA-OB                                                                                                                           Barili, Cebu, Philippines

ang katungod sa bulak

Ang tanang bulak adunay katungod

mabuhi. Adunay katungod mobukhad

malawos madugta. Ang rosas, ang bombil,

ang waling-waling. Bisan ang yano

nga bulak sa kipi-kipi adunay katungod

nga moangkon sa iyang pagkasiya.

Gani, bisan ang plastik nga bulak

nga walay pagkalawos—nga gikoloran

og dyubos nga baratohon, nga gisulod

sa plastik nga plorera nga gigunitan

sa manikin nga walay kalimutaw—

adunay katungod nga tawgon og bulak.

Plastik nga bulak, akoa na ang imong kahingpit.

-- VICENTE VIVENCIO BANDILLO                                                                                                        Dhaka, Bangladesh

tuyhakaw

Mga mata ko gipanumban mo sa yuta

Mituasik lagi ang mga aninipot

Didto sa nawong sa itom nga dag-om

Di pa mahugpong baya ang kahayag

Nga naninguha karon nga di mapawong

Samtang may talinggab pang tumoy

Sa damgo ko sa pagpakabuhi.

Gukdon man nako o di ang katumanan

Dakong buhi lang gihapon ang pamasinbasin

Nagahigda lang ko naggakos sa paglaom

Nga nagpitokpitok pa nagtutok sa litik

Nga nagtikungkong sa akong tudlo

Nga sarang ba makapaligtiw sa balhibo ko

Aron motugpa didto sa lapad nga dughan

Sa bungtod nga buot mo sad latason.

-- ERNESTO D. LARIOSA                                                                                                                     San Fernando, Cebu, Philippines