1.26.2010

may nagtihol diha sa kangitngit
















May nagtihol diha sa kangitngit
Ang iyang talinis nga tihol milusot sa taas ug buhok
Hait ug kuyamoy nga kawayanan
Nga tuskig nga nagtindog sa walay timik nga hangin.
Ang iyang tihol migaras sa batoong karsada
Misamad sa mga blankong anino nga mikapyot sa kadahonan.
Nasayod siya nga sa dihang mohunong siya ug molingi
Ang purlon sa iyang luyo magpaduol
Ug maapsan siya niini bisan pa man sa iyang kabatan-on.
Ang upat ka ligid niini mopulbos sa iyang gusok
Bisan pa sa iyang ka pagka-walay kasal-anan.

Mao nga nagtihol siya og lain-laing mga tuno
Dunay husto, dunay hinimohimo lang,
Wala niya paminawa ang iyang huni,
Wala niya paminawa ang mga pitik
Sa natunawng mga taknaan.
Sa pagka-tinuod kadtong nagsunod niya
Kadtong nagguyod sa purlon
Nga nangandoy og kauban niining prosesyon
Mao lang ang iyang nag-inusarang tigpaminaw
Ang naghinam-hinam
Ang labing naikag sa kataposang nota
Sa katapusang bugwak sa hangin kadtong
Tiunay, walay bakak,
Timgas nga gininhawa
Nga wala ug wala gyod niya mapalgan.


-- ESTER TAPIA
Kathmandu, Nepal

1 comment:

M said...

ester,

tanghaga o gumonhap o sinamali
sa kanunay adunay
magtaghoy sa balisbisan sa kasingkasing sa kangitngit
moalingawngaw sa alimpatakan
sa kahimungaw ug pangindahay

-mananambalak


Daghang salamat sa mga maniniyot nga gapaambit sa ilang mga hulagway sa Google ug Flickr.