3.03.2010

haranamerica
















1.
Dili kini ang dapit nga angay hilakan. Ikaw nga nagpabilin diha sa atong inabangan nga lawak, gianinohan sa gayunyon nga panganod, ayaw ko tugawa. Pasagdi ko nga magtikaw-tikaw subay pagbalik sa imong panamilit nga wala nako lingia. Igo na nga kanunay kong gikamang sa katugnaw gikan diha sa sidlakan, gaalingasa sa lingla sa imong hagok. Kon dili ko nimo lung-an sa kahidlaw, basin maahat ko’g punit anang kinitkitan nga mansanas nga milugwa sa basurahan diri sa Wal-Mart. Wa ko magtiaw: Labayon tika ini ron! Katilaw gyod ka’g kurat.

2.
Dili tika pangutan-on: Kumusta na imong star-spangled nga mata? Makaanhi ra lagi unya ka, paghuwat lang. Ayaw pangluod ning akong isugyot: Gawas anang webcam, hinaot panaminan pod nimo kanang buwan nga bungol sa taghoy anang iro nga saag. Utang buot, ayaw intawon ko patas-i anang imong kilay kon dili pod ka motubag, igo rang molihay niining tigmo-tigmo agukoy: Nganong dili ra ako mao’y imong ka-chat gabii, ‘day?

3.
Dili tika tug-anan sa akong naagian diri. Ambot sa akong sampot kapila na kaha ko nadakdak sa snow. Wala’y pulos ang pamalikas kon imong ngabil igo rang paksiton sa gatibugol nga huyohoy. Labi na’g imong bagulbol igo rang pahilomon sa hutoy nga mopakurog og apil sa imong kigol. Kaayong ikidhat sa libat! Kon makadunggog pa lang ka—pastilan!—kalami unta ikatawa.


-- MICHAEL U. OBENIETA
Topeka, Kansas, USA

1 comment:

M said...

flamboyant
and
exciting
inventive
and
creative

-mananambalak


Daghang salamat sa mga maniniyot nga gapaambit sa ilang mga hulagway sa Google ug Flickr.