latagaw nga balay sa balak

1

Sa kanunay adunay kabugangan sa ulan nga kalubgan
Adunay gilumotan nga mga koral mga tamsi mga lansang
Ug usab atop nga maoy latayan paingon sa lawak-ilisanan
Kansang kisame ug mga bintana tinaptapan og mga balak

2

Ang usa ka imahe mahanaw ug magtuman pagkahanaw
Alang sa iyang kaugalingon dala ang iyang mga bungbong
Ang dunot niyang sandayong ug ang tanan nga nadugang
Sa imong pag-abiabi niini ug usab sa imong paghikalimot

3

Sa imong pagmata ang sapa wala lang gihapon mausab
Sa imong paglabang ayaw kalimot nga dili kini pantawan
Ianod sa tugnaw nga sulog kanang gibitbit mong mga bato
Ug ayran sa dagat kanang gisung-ay mong kahangtoran

4

Kinsay naggukod kanimo lagbas sa walay timik nga lasang
Paingon sa panganod saka sa nagtabyog-tabyog nga hagdan
Kon molingi ka wala kay laing makita gawas sa gilay-on
Sa miligad nga kabukiran nga lahi na nga imong gibiyaan

5

Ang kataposang linya mao ang kamot nga mobitad kanimo
Pagpadayon og baktas paingon sa bag-o mong pinuy-anan
Pagsalikway sa pasidaan nga kon magpadayon kag pamalak
Ang imong anak maoy ibayad sa giusikan mong panahon


-- VICENTE VIVENCIO BANDILLO
Koror, Palau