mikidlap ang pahiyom sa iring dihang
nakita niya ang inun-onang nakalimtan
paghipos ni esing nga isalin unta para
sa iyang bana nga nagwandog-wandog
sa eskina.
kalit lang morag may pista sa kabos nga kosina.
unya mikatkat ang iring sa atop ug
nakighambogay og panug-ab sa mga
kuwaknit nga nakigdakop-dakop sa insektong
kahayag sa bulan. buot niyang ipamatuod
nga siya nga usa lang ka sungkaban mao
diay labing palarang linalang sa kalibotan.
kalit mihiyos ang pagbukad sa iyang dughan
dihang nabati niya ang lamba sa sera
puwerte niyang igpota dihang ang
kagabhion gipukaw sa kinadak-ang esena:
ang bakho ni esing nakighambogay sad
sa kinumo sa iyang bana; ang iyang bakho
nakigdakop-dakop sad sa baho sa ginebra.
-- OMAR KHALID
Medellin, Cebu, Philippines
4 comments:
richel,
ang ginebra
mibaha
sa hubogabii (hubo ug hubog pa gyod)
di na makatakmag
nagsusapindayng balak
-mananambalak
nyor mel,
maayo gyod kang modagmay (amalgamate) og pulong.
omar khalid
tipster,
kita mahanaw unya kapulihay
mga pulongdagmay manikaysikay
sa gilawalawaang epitapo
aron ampingan di ipanarapo
-ommar bathalasad allah
nyor mel,
motaliwan ang tanan tang kahidlaw
sa epimeral natong panahon
sama sa kidlap sa kandilaw
sa kapulihay kita mapalong.
Post a Comment