“Bus nga puno sa mga pasaherong Iranian national nahulog sa pangpang sa sityo Z, Barangay Cansomoroy, Balamban,Cebu pasado alas 10:00 Domingo sa buntag.”
– SuperBalita
Kon mabitad pabalik ang takna
gikablit nalang unta ka sa mga kumagko
sa balod nga imong maagian sa dalan Toledo.
O kon nieskirda ba hinuon
ang hago nimong manibela
sa halapad ug tul-id nga taytayan
sa Sangi ug Dumlog.
Ay, naunsa ba? Kalimot na tingali ka
ang mino sa kapalaran mangilad
bisan kapila ka pa magbali sa imong gisul-ob.
Apan kon itandi mas tam-is ang huyuhoy
sa hangin nga nanuotsuot diha
sa pangpang sa Balamban.
Sayod ko nadani ka lang sa alimyon
sa mga bag-ong tubo nga balili
nga mituyhakaw sa daplin sa dalan.
Sayod ko niadtong tak-naa ang pahiyom
sa imong asawa ang nagpabiling nangaw-it
sa nahabiling sanga sa imong hunahuna
Kon motadlas man ko pagbalik sa Cansomoroy
Buot kong isipon nga dihang lugara,
kauban sa imong mga pasahero,
igo ka lang nagpasalipod diha sa dakong bungtod,
nasaag sa pagsuroy taliwala sa kakahoyan
ug malipayong nanaghoy sa mga huni
duyog sa imong nalumping nga stereo.
-- GENALYN G. OMAPAS
Cebu City, Philippines
1 comment:
naatol nga namista ko sa tuburan.
adunay depekto sa brakes.
dili pamilyar ang drayber.
ang mga santilmo magdaghong
magdanguyngoy sa cansomoroy
ang nabasag nga stereo
anaa sa tiilan sa bakilid.
kon ikaw moagi
patalinghogi
ang nakay-ag huni
-mananambalak
Post a Comment