bilar alang sa albularyo

1.
Gakurog nga ngipon, napaksit nga ngabil. Nakatilaw na ko

sa kabangis sa snow, napiang na sa dalin-as nga kaputi

tadlas sa espidno. Kalami ihangad sa anino sa American Airlines
nga gilamoy sa dag-om. Kisaw sa takig, bugwak sa ubo-ubo
gikan sa kiting. Gikitkit sa hangin ang ganganga nga kugan
sa dughan. Mother, mother, I am sick...

2.
Kalawaton ko ikaw, O Tingtugnaw, pinaagi sa pinasugwak nga halad
sa akong kulihad. Tugbang unta akong katagbaw sa gabuswak
nga pulbora matag 4th of July bugti sa gapagaw nakong bagutbot.
Bisan gapislango, moalisngaw unta akong ginhawaan sa alimyon
sa tinustos ug lana sa lubi gikan sa kamot ni Noy Tyago.

Giuhaw ko sa iyang tuba. Tam-is ang kainit sa kamingaw.


-- MICHAEL U. OBENIETA
Topeka, Kansas, USA